¹ Mengka, tekeleklah sebuah tando nyo godong de langet: seurang betina bepakoyon matoari ngan bulan de bewoh kakinye ngan mahkota deri dua belas bintang de kepalonye. ² Betina iye sedang bunting ngan delom penderitaonnye hendak melaherko, enye mekek kasakiton. ³ Mengka, tekeleklah sebuah tando loin de langet: seekor nago godong bewarna abong nyo memilikih tujuh kepalo ngan sepuluh tanduk sereta tujuh mahkota podo kepalonye. ⁴ Ekor nago iye menarek sepertiga bintang de langet ngan melemparkonye k behumi. Nago iye togok de depan betina nyo hendak melaherko iye enggakkonyo tekalo betina iye lah melaherko, enye pacok menolon anaknye. ⁵ Betina iye melaherko seurang Anak jenton, nyo bakal memerentah bengeso-bengeso dengan tungkat besi; hambuk Anak iye de robut ngan de unda kenempat Allah ngan ke hadopon takhta-Nye. ⁶ Betina iye belari menuju padang belantara, ketempat nyo de sediako Allah bagenye enggakkonyo de sane, enye de peliaharo selamo seribu dua ratus enam puluh hari. ⁷ Ngan, terjedilah peperangan de serga, Mikhael ngan padong malaikatnye beperang melawon nago iye. Nago iye beperang serompok padong malaikatnye, ⁸ hambuk mike hopi cukup kuat singgo hopi ado lage tempat bage mike de serga. ⁹ Nago godong iye de lemparko ke bewoh, si ulor tuha nyo de sobut beles atau Setan, nyo menyosotko segelo denia, enye de lemparko ke behumi, ngan padong malaikatnye de lemparko kebewoh serompoknye. ¹⁰ Ngan, ake mendongor suaro nyo karas de serga buik, " Kinie, lah njongok keselamaton, kuaso, ngan kerajakon Allah kite, sereta kekuasaon Kristus*-Nye ulehnyo si penuduh dulur-dulur kite, nyo menuduh mike de hadopon Allah tangah hari ngan malom, sodah de lemparko ke bewoh. ¹¹ Mike mengalahkonye dengan deroh Anak Domba, ngan dengan pembuikon kesaksion mike; ulehnyo mike hopi menyayangko nyawo mike, bahkan tekalo menghadapi te'elek. ¹² Ulehnyo iye, bersukacitalah, hai serga ngan segelo nyo tinggal de delomnye! Cuma, celakolah behumi ngan lout ulehnyo Beles lah turun kenempatme delom amarah-Nye nyo godong ulehnyo enye tahuko behwo waktu nyo de milikinye sajo pandok." ¹³ Tekalo nago iye mengoleh behwo enye lah de lemparko ke behumi, enye menganiayo betina nyo lah melaherko Anak jenton tadihe. ¹⁴ Cuma hambuk, betina iye de bori dua sayap burung rajawali nyo godong enggakkonyo enye depot terbang ke padang belantara, de mone enye de peliharo selamo sikuk maso, dua maso, ngan setengah maso jouh deri hadopon si ulor. ¹⁵ Ulor iye menyomburko aek nyo upa sungai ke arah betina iye, untok menghanyutko si betina de delomnye. ¹⁶ Cuma, behumi menolong betina iye; behumi membuka mulutnye ngan menolon aek nyo de somburko nago iye. ¹⁷ Mengka, nago menjedi sajo bemarah kenempat betina iye ngan pogi untok memerangi anak-anak loin deri betina iye, yaitu urang-urang nyo memeliharo perentah-perentah Allah ngan bepogong podo kesaksion Yesus. ¹⁸ Nago iye togok de topi lout.