¹ Mengka, de boriko kenempatke sebuah buluh,wujudnye upa tungkat pengukur, dengan kehato, " Pogi ngan ukurlah Bait Allah ngan altarnye sereta mike nyo beibadah de delomnye. ² Cuma hambuk, biarkolah pelataran Bait Allah nyo de sebelah luor, jengon mengukurnye ulehnyo iye sodah de boriko kenempat bengeso-bengeso; ngan mike bakal mentinjak -tinjak kota suci iye selamo 42 bulan. ³ Ngan, Ake bakal membori kuaso kenempat dua sakseke ngan mike bakal benubuat * selamo 1260 hari dengan menggunako koin kabung." ⁴ Mike ni adolah 2 betong zaitun ngan 2 kaki dian nyo togok de hadopon Tuhan nyo memilikih behumi. ⁵ Ngan, munye ado urang nyo amat menyakiti mike, api keluor deri mulut mike ngan menghangusko musuh-musuh mike. Munye siape bae hendak menyakiti mike, enye bakal de bunoh dengan caro upa iye. ⁶ Keduanye nie memilikih kuaso untok menutup langet enggakkonyo hujan hopi turun podo hari-hari nubuat mike; ngan memilikih kuaso pucuk aek untok mengubahnye menjedi deroh ngan untok mengepuk behumi dengan setiap malapetaka, sesering mike amatko. ⁷ Ngan, tekalo mike lah menyelesaiko kesaksion mike, binatang nyo timbul deri delom jurang melawon mike ngan mengalahko mike, sereta membunoh mike. ⁸ Ngan, buntang keduanye bakal tegeletak de jelon kota godong, nyo secaro simbolis de sobut Sodom* ngan Mesir, tempat Tuhan kite jugo de salibko. ⁹ Ngan, deri segelo bengso ngan suku bahaso ngan kaum bakal mengoleh buntang keduanye selamo 3,5 hari ngan hopi bakal mengizinko buntang keduanye de berengko de kuburon. ¹⁰ Ngan, nyo tinggal de behumi bakal bersukacita pucuk mike ngan begembira; ngan mike saleng mengiremko hadiah sikuk samo loin ulehnyo kedua nabi nie menyikso mike nyo tinggal de behumi. ¹¹ Cuma hambuk, lah 3,5 hari, roh kehidupon deri Allah masuk kedelom ke dua buntang iye, ngan mike togok de pucuk kaki mike singgo nyo memperhatiko mike menjedi ketakuton. ¹² Mengka, mike mendongor suaro nyo karas deri serga buik kenempat mike," Noeklah kemai!" Ngan, mike pun noek ke serga delom awan de saksiko ule musuh-musuh mike. ¹³ Ngan, Tekalo iye, terjedilah gempo behumi nyo dahsyat singgo sepersepuluh kota iye runtuh; ngan tujuh ribu urang te'elek ulhnyo gempo behumi iye, ngan nyo hopi te'elek menjedi sajo takut, mengka memuliako Allah nyo de serga. ¹⁴ Bencana nyo kedua sodah lewat; kolehlah bencana nyo ketiga bakal njongok. ¹⁵ Mengka, malaikat nyo ketujuh behembus trompetnye, ngan tedongorlah suaro karas de serga nyo buik, " Pemerentahon denia lah menjdi pemerentahon Tuhan kite ngan Enye Nyo De urapi-Nye*, ngan Enye bakal memerentah sampoi selamo-lamonye." ¹⁶ Mengka, dua puluh empat tuha-tuha* nyo duduk de takhta mike, de hadopon Allah, besujud ngan menyembah Allah, dengan buik, " Kamie besyukur kenempat-Me, Ao Tuhan, Allah Nyo Mahakuaso, Nyo ado ngan nyo sodah ado, Ulehnyo Kowe lah mengambek kuaso-Me nyo godong ngan mulakih memerentah. ¹⁸ Ngan, bengeso-bengeso lah bemarah, Hambuk murka-Me lah njongok, Ngan waktunte lah sampoi bage urang-urang te'elek untok de hakimi ngan membori upah hambo-hambo-Me, Nabi-nabi* ngan urang-urang kudus ngan nyo takut bakal namo-Ke, nyo kecik ngan nyo godong, ngan untok menghancurko padong penghancur behumi!" ¹⁹ Mengka, tebukalah Bait Allah de serga ngan tekolehlah Tabut Perjenjion Allah delom Bait-Nye, ngan timbullah kilat ngan suaro guntur ngan gempo behumi ngan hujan es nyo lebat.