¹ Nyo kumaksud, selamo ahli waris iye maseh anak-anak, iye pindok ado bedanyo ngan budak walaupun nye adolah pemilik segelo sesuatu. ² Iye berada debewoh kuaso pengawas ngan pengurus rumah tanggo sampoi waktu nyo lah detetapko ule bepaknye. ³ Upa iye lah jgo kite, ketiko maseh anak-anak, kite deperbudak ule roh-roh denia nie. ⁴ Cuma sebeleknye, ketiko hari penggenapon detong, Allah mengutus Anak-Nye, nya laher deri seurang betina ngan laher de bewoh Hukum Taurat, ⁵ untuk menobos mike nyo ado de bewoh Hukum Taurat enggakonyo kite depot menerimo pengangkoton upa anak-anak-Nya. ⁶ Ulehnyo kowe adolah anak-anak-Nyo, Allah lah mengutus Roh Anak-Nye ke delom hati kite, nyo memantou, "Abba, Bepa." ⁷ Jedi, kowe bukon lagi budak, cuma anak. Munye kowe adolah anak, Allah menjediko kowe ahli waris melalui melalui Kristus. ⁸ Tekalo e , ketiko kowe hopi mengenal Allah, kowe adolah budak deri hal-hal nyo podo dasarnye bukon Allah. ⁹ Cuma, kinie, elah kowe mengenal Allah atau sajo pasotnye dekenal ule Allah, upa mone mungkin kowe bebelek lagi kepodo roh-roh denia nyo lemah ngan pindok beguna? apokah kowe ingin deperbudak lagi? ¹⁰ Kowe menjelonko perayaon pucuk hari-hari, bulan-bulan, musim-musim, ngan tahun-tahun!. ¹¹ Ake takut jengon-jengon jerih payohke ngan sodah kulakuko untukme menjedi sio-sio. ¹² Ake memohon kepodome, dolor-dolor, jedilah upa ake jugo lah menjedi upa kou. Kowe hopi besaloh ngan ake. ¹³ Kowe tahu, podo mulanye ake memberitako Injil kepodome uleh saket badan nyo kualami. ¹⁴ Walaupon kondisi badanke merupako ujian bageme, kowe pindok menghina atau menolak ake. Sebeleknye, kowe menyambut ake seolah-olah ake nie malaikat Allah, , upa seakan-akan ake nie Yesus Kristus dewek! ¹⁵ Upomone ngan berkat nyo kowe rasoko iye kinie? Sobab, ake pacok besaksi tentang kowe dahulu, munye mungkin, mencukek matome ngan memborikonyo kepodoke pun kowe rela. ¹⁶ Apokah kinie ake menjedi musuhme ulenyo menunjukko kebonoron ngan kou? ¹⁷ Urang-urang iye berusaha menemuko kowe, cuma bukon ngan maksud nyo beik. Enye endok mengasengko kowe ngan harapon kowe nak mendelok mike. ¹⁸ Memang beik jika selalu besemangat melakuko hal-hal nyo betujuon beik, ngan bukon anyoketiko ake besamome. ¹⁹ Anak-anakke, demi kowe, ake rela sekali lagi menanggong saket melahirko sampoi Kristus denyatako delom kowe. ²⁰ Ake beharop, ake pacok besamome kinie ngan mengubah nada suarake ulenyo ake habis akol menghadapi kowe. ²¹ Kehatoko padoke, hai kowe nyo endok hidup de bewoh Hukom Taurat, Ibo kowe pindok ndongorko Hukom Taurat? ²² Ulenyo ado tetoles, Abraham ado dua anak Jenton; sikok laher deri seurang budak betina, ngan nyo sikok lagi deri seurang betina merdeka. ²³ Cuma hambuk, anak deri budak betina iye delaherko menorot deging, sedangko anak nyo deri betina merdeka delaherko melewati perjenjion. ²⁴ Kolekola kisah nie sebagai lambang ulenyo dua betina nie melambangko dua perjenjion. sikok adolah perjenjion deri gunong Sinai ngan melaherko anak-anak perbudakon. (Nye adolah Hagar) ²⁵ Kinie, Hagar melambangko Gunong Sinai de tanoh Arab, samo upa Yerusalem saat nie ulenyo nye hidop delom perbudakon besamo anak-anaknye. ²⁶ Cuma hambuk, Yerusalem nyo de atas adolah betina nyo merdeka, ngan nye adolah indok kite. ²⁷ Ulenyo ado tetoles, "Besukacitalah, hai betina nyo mandul, nyo hopi melaherko. Berseru ngan besoraklah, hai kowe nyo hopi merasako saket melaherko. Sabab, lobeh lobot anak deri betina nyo dewek deripado betina nyo ado laki." ²⁸ Dolor-dolor, kowe adolah anak-anak perjenjion upa Ishak. ²⁹ Upa saat nie, anak nyo laher menurut deging menyikso anak nyo laher menurut Roh, upa nyo terjedi kinie. ³⁰ Cuma Hambok, ape nyo Kitab Suci kehatoko? "gerahlah budak betina iye sereta anaknye ulenyo anak budak betina iye hopi nak menjedi ahli wares besamo ngan anak betina merdeka." ³¹ Ulenyo iye dolor-dolor, kite bukonlah anak-anak deri budak betina, hambok deri betina merdeka.