( Pengakuon rombongon Rasul Atos Paulus) ¹ Empat belas tahon kemudion, ake belek lagi ke kota Yerusalem ngan Barnabas ngan ngundah Titus bersamo ke. ² Ake lari uleh suatu pernyataan ngan menjelasko kepado mike tentang Injil nyo ku beritako de entaro urang- urang bukon Yahudi. Hambok, ake melakukonye delom pertomuon, iye lah hanyo dengan mika nyo berpengaruh untuk memastiko behwa ape nyo ku kerejo ko ngan nyo lah sodah ku kerejo ko pi sio-sio. ³ Bahkon, Titus, nyo bersamo ke, pi harus de sunat walaupon enye adolah urang Yunani. ⁴ Hal niye tejedi uleh ado dolor- dolor pelsu diom- diom masuk ngan menyelibu untuk memato-matoi kebebason nyo kite punyoi delom Yesus Kristus empok nyo kite de undah belek kepado perbudak kon. ⁵ Uleh nyo hambok, kamie pindok on tondok kepado mika sesaat pun empoknyo kebonoron Injil tetap tinggal delom me. ⁶ Hambok, jak urang- urang nyo bepengaruh iye, nyo kedudukonnye hopi lah penting bage ke uleh Allah pi membeda- bedako, mike hopi menambohko ape- ape bage ke. ⁷ Sebeleknye, mike ngoleh behwa kepadoke lah depecayo ko Injil untuk urang- urang nyo pi bersunat, samo upa Petrus nyo depecayoko Injil untuk urang- urang nyo pi bersunat. ⁸ Sabab, Enye lah begawe melalui Petrus untuk menjadi rasul bage urang- urang bersunat, Enye jugo nyo begawe melalui ake untuk menjadi rasul bage urang- urang bukon Yahudi. ⁹ Setelah Yakobus, Petrus, ngan Yohanes, nyo de pandong sebagoi saka guru bage jemaat menyadari anugerah nyo de boriko kepado ke, mike memboriko tangon kanon persekutuon kepado Barnabas ngan kepadoke empoknyo kamie lari kepado urang- urang bukon Yahudi, sedangko mike lari kepado urang- urang bersunat. ¹⁰ Mike hanyo meminta kami untuk ingot kepado urang- urang miskin, sikuk hal nyo ake dewek sajo bersemangot untuk melakuko nye. ¹¹ Hambok sebeleknye, tekela Kefas jongok ke kota Antiokhia, ake terang- terangon menentang nye uleh en jelas enye bersaloh. ¹² Uleh sebolum urang- urang tertentu jak kalongon Yakobus jongok, Kefas sodah biaso makon bersamo urang- urang bukon Yahudi. Hambok, tekela mike jongok, enye mulai mundur ngan memisah ko diri uleh takot kepado kelompok urang nyo bersunat. ¹³ Urang- urang Yahudi nyo loen mehehilu bertindak munafik bersamonye, bahkon Barnabas pun tehilu-hilu uleh kemunafikon enye. ¹⁴ Tekela ake ngoleh behwa enye bertindak hopi sejelon dengan kebonoron Injil, mangko nye ake bekehato kepado Kefas de depan segelo urang, " Kalau kowe urang Yahudi hidop upa bukon Yahudi, upamone mungkin kowe memakso urang bukon Yahudi untuk hidop upa urang Yahudi?" ¹⁵ Kite adolah urang- urang nyo de laherko sebagoi bengso Yahudi ngan bukon urang- urang berdoso jak bengso bukon Yahudi. ¹⁶ Hambok, kite tau behwa hopi seurang pun de bonorko uleh melakuko hukum Taurat, meloenko melalui iman delom Yesus Kristus. Bahkon, kite jugo lah pecayo kepado Kristus empok nyo kite de bonorko uleh iman delom Kristus, bukon uleh melakuko Hukum Taurat. Sabab, hopi seurangpun de bonorko uleh melakuko hukum Taurat! ¹⁷ Cuma Hambok, sementaro kite beusaha untok debonorko delom Kristus, kite mendepoti diri kite juga pendoso, epekah berarti Kristus adolah pelayon doso? Tentu sajo hopi! ¹⁸ Munye ake membengun belek ape nyo sodah ake robohke, ake membuktiko behwo ake adolah seurang pelanggar hukom. ¹⁹ Sabab, melewati Hukom Taurat, ake lah teelek bage Hukom Taurat empoknye ake depot hidop untok Allah. ²⁰ Ake sodah de salib ngan Kristus. Bukon lagi ake hidop, meloenko Kristus hidop delom ake. Hidop nyo kinie nie ku hidopi delom degeng adolah hidop uleh iman delom Anak Allah, nyo mengasehi ake ngan lah memboriko diri-Nye untok ake. ²¹ Ake hopi membatalko anugerah Allah ulenyo munye kebonoron jongok melalui Hukum Taurat, sio- siolah kemation Kristus.