¹ Sabab, ake ndok kowe tahu betapa beratnye perjuangon nyo lah ake lakuko untukme, ngan untuk mike nyo ado de Laodikia, ngan untuk segelo urang nyo bolum pernah betemu muka denganke. ² Tujuonke adolah empuk hati mike tehibur ngan depersatuko delom kaseh sehingga mike memiliki segelo kekayaon nyo beasal jak jaminon akan pngertion ngan pengetahuon jak resio Allah, yaitu Kristus dewek. ³ Delom Nye, tekerawo segelo reto jak hikmat ngan pengetahuon ⁴ Ake nggerako hal niye empuk hopi ado urang nyo nak nipume ngan perdebaton nyo kedongoronye masuk akal. ⁵ Sabab, meskipun tubuh jasmanike hopi ado besamome, hambuk ake besamomu delom roh, ngan ake besukacita ngoleh kedisiplinonme nyo beik ngan ketoguhon imanme delom Kristus Yesus. ⁶ Jedi, ulenyo kowe lah nerimo Yesus Kristus sebagai Tuhan, hiduplah terus delom Nye, ⁷ beakor ngan bengunlah dirime delom Nye, toguhkanlah imanme sebagaimone lah deajarko kepodome ngan melimpahlah ngan ucapon syukur. ⁸ Behati-hatilah empoknyo jengon ado seurang pun nyo menjorot kowe ngan filsafat nyo kosong ngan nyo nyosotko, nyo berasal jak tradisi mendesio ngan asas-asas roh dunia, ngan bukon pernsep-perensep Kristus. ⁹ Sabab, delom Nye bediom segelo keponohon keilahion nyo hidop delom bentok jasmani. ¹⁰ Kowe lah menjedi ponoh delom Nye, nyo adolah kepalo atas segelo pemerintah ngan penguaso. ¹¹ Delom Nye, kowe jugo desunat, bukon ngan sunat nyo delakuko uleh tangon mendesio, cuma ngan sunat nyo delakuko uleh Kristus, yaitu ngan notok badan kedegengon nyo bedoso. ¹² Delom bapteson, kowe dekuborko besamo ngan Kristus, ngan jugo debangketko besamo-samo ngan Nye melalui imanme delom kuaso Allah nyo membangketko Nye deri antaro urang mati. ¹³ Walaupun tekalohe kowe mati delom pelanggaron-pelanggaronme ngan delom kedegengonme nyo hopi besunat, Allah membuatme hidop besamo-samo ngan Nye sesodah Ye mengamponi segelo pelanggaron kito. ¹⁴ Ye lah membatalko surat hutang ngan aturon-aturon tuntotonye tuntononye nyo menghalangi hobongon antaro Allah ngan kito. Ye lah ngambeknye ngan memakukonye de atas kayu salib. ¹⁵ Ye melucuti para pemerentah ngan penguaso, lalu menjediko rombongon tontonon nyo memaluko uleh karna kemenangon-Nye de atas kayu salib. Jengon Mehilui Atoron-Atoron nyo Debuat Mendesio ¹⁶ Ulenyo iye, jengon biarko seurang pun mehakemi kowe ngan masalah makonon ngan minomon apo hari rayo keagamaon, perayaon bulan beheru apo hari sabat. ¹⁷ Segelonye iye bayangon tentang hal-hal nyo nak njongo, cuma wujod nyo sesunggohnye adolah Kristus. ¹⁸ Jengon biarko urang nyo senang ngan kerendahon hati nyo palsu ngan penyembahon kepodo malaekat-malaekat menghakemi kowe. Mike adolah urang-urang nyo endok ngan pengolehon hal-hal detail empoknyo membuat pekeron mike sombong ulenyo gagason-gagason duniawi. ¹⁹ Urang nyo demikian hopi bepogong taguh podo Kepalo. Kepalo adolah nyo menopang segelo badan, ngan segelo badan depersatuko uleh sendi-sendi ngan otot-otot, segelonye betumboh ngan pertumbohon nyo berasal deri Allah. ²⁰ Munye besamo Kristus kowe lah mati terhadop asas-asas dunia, mengka seola-olah kowe lagi menjedi melek dunia, tondok podo atoron-atoron upa: ²¹ "Jengon jamah, jengon dekicapi, jengon deraboh"? ²² Atoron-atoron nie nak binaso setelah dehilui ulenyo atoron-atoron iye debuat bedasar pado perintah ngan ajoron mendesio. ²³ Atoron-atoron upa iye memang kekolehonye bijaksana ngan menonjoko kompolon nyo bepustakaon podo diri ngan kerendahon hati nyo palsu sereta penyiksaon badan. Hambok, segelonye iye hopi ado nilainyo seloen untok memuasko kedegengon.