¹ Ulehnyo iye, sebagoi sesamo penatua ngan saksi mato penderitaon Kristus, ngan jugo sebagoi urang nyo nak mehilu ambek bageon delom kemuliaon nyo nak denyatoko, ake mendorog para penatua nyo ado de antoro kowe: ² Gembalakola domba-domba Allah nyo ado podome! Jengon ulehnyo paksaon, cuma ngan rela, upa nyo Allah kehendaki; jengon melakukonye untok mendepotko keontongon nyo hino, cuma ulehnyo kesediaonme. ³ Jengon pula betindak sebagoi penguaso tehadop mike nyo depecayoko ke delom tanggong jawabme, cuma jedila teladan bage kunti me. ⁴ Ngan demikion, ketiko todo Sang Gembala Agong detong, kowe nak nerimo mahkota kemuliaon nyo hopi nak layu. ⁵ Demikion jugo kowe, nyo lobeh muda, tondokla kepodo tua-tuame; ngan hendokla kowe segelo memeleki kerendahon hati, nyo seurang kepodo nyo loen ulehnyo: Allah menantang urang nyo sombong, cuma Nye membori anugrah kepodo urang nyo rendah hati. ⁶ Sabab iye, rendahkola dirime de bowo tangon Allah nyo ponoh kuaso. Mangko, Nye nak meninggiko kowe podo waktunyo. ⁷ Serahkola segelo kekuateronme kepodo Allah ulehnyo Nye memeliharo kowe. ⁸ Waspada ngan bejago-jagolah! Musuhme, si Iblis, bejelon monda-munder upa singa nyo ngaum, delok pemukon nak nyo tolon. ⁹ Lawola Iblis! Togoklah togoh delom imanme ulehnyo kowe tahuko behwa de segelo dunia, dolor-dolor seimanme jugo menanggong penderitaon nyo kowe alami. ¹⁰ Ngan, setela kowe menderita untok sementaro waktu, Allah sumber segelo anugrah nyo lah memanggelme untok mehilu bageon delom kemuliaon-Nye nyo kekal de delom Kristus nak memulihko, menogohko, menguatko, ngan membengun kowe. ¹¹ Bage Nyelah, kuaso untok selamo-lamonye. Amin! ¹² Ake noles surat singkot nie kepodome melalui Silwanus, nyo kukenal sebagoi dolor seiman nyo setia. Ake endok membori semangot ngan kesaksion kepodome, behwa nie adolah anugrah nyo sejati deri Allah. Togokla togoh de delom anugrah iye. ¹³ Jemaat nyo ado de Babilonia, nyo jugo umat pilehon Allah, menyampaiko salam untokme. Markus, anakke delom Kristus, jugo menyampaiko salam untokme. ¹⁴ Borila salam sikok ngan nyo loen ngan ciomon kaseh. Damai sejahtera bage segelo nyo ado delom Kristus. Amin.