¹ Jedi, ulehnyo Kristus lah menderita secaro jasmani, hendokla kowe mempersenjatoi dirime ngan pekeron nyo samo, sabab urang nyo lah mengalamo penderitaon jasmani, lah berenti bebuat doso ² sehinggo delom menjeloni sisa hidop de dunia nie, nye hopi lage mengikoti keendok mendesio, meloenko kehendok Allah. ³ Sabab cokopla waktu podo masa lalume untok melakuko kebiasaon urang-urang nyo hopi mengenal Allah; hidop delom hawo nafsu, kemabokon, pesta pora, minom-minom, ngan penyemba patong nyo ponoh kekejion. ⁴ Kinie, mike sajo heran ketiko mendepoti behwa kowe hopi lage ikot delom kebejaton liar nyo mike lakuko. Ulehnyo iye, mike mempitna kowe. ⁵ Cuma hambok, mike nak membori pertanggongjawabon kepodo Nye nyo nak menghakemi urang nyo hidop ngan nyo mati. ⁶ Untok alason niela, Injil deberitako kepodo urang-urang nyo kinie sodah mati sehinggo meskipon mike sodah dehakemi de dunia nie sesuoi ngan setandar mendesio, cuma mike hidop secaro menorot ukoron Allah. ⁷ Akher deri segelo sesuatu lah parok. Ulehnyo iye, waspadala ngan bejago-jagola empoknyo pacok bedoa. ⁸ De atas segelo iye, terosla saleng mengasehi ngan bonor-bonor sabab kaseh menotopi sajo neman doso. ⁹ Tonjokola keramahon sikok ngan nyo loen tanpa mengeluh. ¹⁰ Ulehnyo setiap urang la nerimo karunia, pergunakola iye untok melayani sikok ngan loennye sebagoi pelayan nyo beik atas berbagoi karunia deri Allah: ¹¹ siape nyo buek, beikla nye buek sebagoi urang nyo menyampaiko firman Allah; ngan siape nyo melayani, beiklah nye melayani ngan kekuaton nyo Allah boriko sehinggo delom segelo hal, Allah demuliako melalui Yesus Kristus. Bage Nyelah kemuliaon ngan kuaso sampoi selamo-lamonye. Amin. ¹² Dolor-dolor nyo kukasehi, jengonla tekejot ngan api pencobaon nyo detong untok menguji kowe, seola-ola sesuatu nyo aneh terjedo atas kowe. ¹³ Hambok, besukacitala ulehnyo kowe mehilu bageon delom penderitaon Kristus sehinggo kowe jugo pacok besukacito ngan begembira podo saat kemuliaon-Nye denyatoko. ¹⁴ Berbahagiala munye kowe dehino ulehnyo namo Kristus, sabab Roh kemuliaon ngan Roh Allah diom de delom kowe. ¹⁵ Cuma hambok, jengon ado de antaro kowe nyo menderita sebagoi pembuno, pemuleng, pelaku kejahaton, apo sebagoi urang nyo endok mencampori urusan urang laen. ¹⁶ Cuma hambok, siape pon nyo menderita sebagoi urang Kristen, jengonlah nye malu, sebeleknye hendakla nye memuji Allah ulehnyo menanggong soboton iye. ¹⁷ Lah saatnyo penghakemon demulai deri keluarga Allah. Ngan, munye penghakemon Allah deri kite, upamonekah nasep urang-urang nyo hopi taat kepodo Injil Allah? ¹⁸ Munye urang saleh bae solet untok deselamatko, upamone ngan urang jahat ngan urang bedoso? ¹⁹ Ulehnyo iye, biarla mike nyo menderita ulahnyo kehendok Allah, mempecayoko jiwanye kepodo Sang Pencipta nyo setia, sambel teros melakuko apo nyo beik.