¹ Kiamy Deuxurarybere: — Hãburiòre, kaa tyyrti rase birsỹkre, irahudi tahe makre Israel mhãdu-ò rybemy. ² Tai tahe wary reraynyre tahe tii tyyrti rase wadee riwahinyre ariròkremy. ³ kiamy rarybere: — Hãburiòre, kaa tyyrti rase adee rewahinyreri birokre; idi aweryri bitỹxinykre. Tahe reròre, bdiwsemy ibree. ⁴ Tahe kiamy Deuxurarybere: — Hãburiòre, makre, tahe aõmybo ararybekremy Israel mahãdu-ò marybekre. ⁵ Iwitxira mahãdu, irybesiramy rỹimyhỹre-ò aõkõ arateònyreri, Israel mahãdu-ò. ⁶ Iwitxira hãwahãkỹ-ò, irybe isaramy rỹimyhỹre-ò arateònykeki, tule irybereny bierykõmy, my mahãdu-ò makeki, arybe-ò ywimy roholarenyke. ⁷ Kiaõmy tahe Israel mahãdu tiu arybe-ò roholarenyõtyhy, kiemy warybe-ò ijohonaderarenyre. Butumy tiiboho tõhõtiõrenyre tule irybesiradỹỹrenyre. ⁸ Wiji tahe kai iwsereny araijenykre, õhõtiõmy tule ateremy, iwserenyle. ⁹ Ateremy arawinykre, mnatere wsemy tule jiamytxitere wsemy. Taiki tahe, uritre brebuõmy, ilaureny uritre brebuõkre. ¹⁰ Deuxurarybemyhỹ: — Hãburiòre, boholawikre, itxi õhõti reakre warybetxi. ¹¹ Irahudi tahe aijoireny-ò rybemy makre, wetxu-my rirahuremahãdu-ò. Diarỹ DeuxuAõmybo rarybererimy tamyreny marybekre, roholarenykre-wna tule roholarenyõkre-wna, ihãrele tamyreny marybekre. ¹² Tahe Deuxutyytby biu-txi riwadyre, tahe wahewo-ò rybe-ò raholare, biu ramytxinymyhỹre wsemy. Kiamy irà-ò raholamyhỹ: — Biu rariemy, Deuxururumy beàlàke! ¹³ Iròdu mahãdu dewodỹỹ-ò raholamyhỹ tee rihtenymyhỹ-ò, tule tewe wodỹỹ-ò raholamyhỹ, iwodỹỹnihikỹmy raholamyhỹ, biumytxi wsemy. ¹⁴ Tai tahe Deuxururu wamy rahỹỹnanyre, ityytby irbi riwadyre; tai tahe diarỹ reburere sõemy wawo-ki reburere. ¹⁵ Tahe Teò-Abibe-ò rare, Keba bero ijàti-ki roimyhỹre, tai judeo mahãdu rasỹnymy rỹiramyhỹ, wetxumy ridyrenyreu. Debò inatxi txu-my tai bde reijere, raberumy, aõmybo rabireki tule tamy raholareki. ¹⁶ Debò inatxi txu sỹtbymy, Deuxukiamy wadee rarybere: ¹⁷ — Hãburiòre, diarỹ Israel mahãdu-di itxeredu arasnyra. Kai biteòarinybenykre, timybo deòrxina adee ariwahinykremy. ¹⁸ Kaa diarỹ hãbu bina rurukremy adee ararybekreki, tahe kai biteòarinyõkreki, aõbina bina widỹỹ ixãwikemy, taumy rihedỹỹnykemy, tai tahe òrarunaki tii rurukre, taiki kaile irbu bdeòrarukre. ¹⁹ Kai hãbu bina biteòarinykreki, tahe tii aõbina bina ririõkreki, tiiemy òraruna-ki rurukre, kai tahe taiki buruõkre. ²⁰ -- Hãbu òbiti-õ aõbina bina riwinykreki, tahe diarỹ aõ iòhãtxi ariijranykre, tai rurukre, kai biteòarinyõkreki. Tahe diarỹ aõwiwi riwinyretxi wanohõti reaõtyhy. Tahe kai irbu bdeòrarukre. ²¹ Kai hãbu òbitimy nodu biteòarinykre-wna, òraruna widỹỹõmykremy, tahe tii arybe-ò roholakre-wna, òraruna widỹỹ-rbi ixawikre, taiki tahe tii ruruõkre, kai tule buruõkre. ²² WaDeuxururuterenihikỹ, wabireki ratximyhỹ, tahe kiamy wadee rarybere-ò raholare: -- Myike, hãwalò bde-ò makre, tai tahe adee ararybekre. ²³ Tai tahe hãwalò bde-ò rare, tai Deuxururuterenihikỹmy rabire, keba bero ijà-ki tuu rabire wsemy. Suu-txi waò-my resere, ²⁴ tahe Deuxutyytby wawo-txi ralòre, tii riwatmadỹỹnyre. Deuxuwadee rarybere: --Make aheto-ò tai tahe ijo ixidi biwerynykre. ²⁵ Kai hãburiòre, reruti-di mataataakre, bohonyke ihoõre. ²⁶ Adòrtò ariteredỹỹnykre, tai tahe iny mahãdu rybesidỹỹ biteòarinyõkre. ²⁷ Irahudi, ixby adee ararybekreu, ararybedỹỹnykre, iu tahe tamyreny marybekre, diarỹ Deuxutuu raryberamy. Ijõ iny-õ arybe-ò roholakre, ijõ taxe aõkõre, kiemyhe tii boho irybesiradỹỹrenyre.