¹ Tuu rabireu, rariowyre tahe waò su-ò redere. Kia tahe rybe-ò raholare, kiamy rarybemyhỹ: — Hãburiòre, lmamy myike. Adee ararybekemyreri. ² Wadee rarybemyhỹ wnaletahe, Deuxutyytby wadee ralore tahe tii lmamy riwatmadỹỹnyre. Tahe rybe raholare, kiamy rarybemyhỹ. ³ Hãburiòre, diarỹ arateònyreri Israel mahãdu-ò, warybe rbiòtu rekoare, waòldu-my relerenyre. Wiji dore warybe siradỹỹmy ihỹrenyre, iwse ilabiereny rybesiradỹỹ-my roiremyhỹ wsele. ⁴ Tõhõtiõrenyre tule riwatyhynyrenyõmyhỹre. Tahe tamyreny rybemy arateònykre, diarỹ Deoxo, timybo tamyreny ararubekredi marybekre tamyreny. ⁵ Arybe-ò roholarenykre-wna, tule arybe-ò roholaõrenykre-wna, profeta taireny ratxiramy rieryrenykre. ⁶ Kai tahe, hãburiòre, uritre ilaureny brebuõmykre, tule aõmybo adee raryberenykreki. Tii boho adee rexiurirenykre tule ibinamy adi ratxirenykre; iykyrenyki matxikrehe aõma wsemy matxikre, itytibòrò kyki matxike wsemy. Ihãrele tahe, brebuõmykre rybesiradỹỹdu mahãdu lau, aõmy adee raryberenykreki tule. ⁷ butumy aõmybo adee ararybekre-my marybekre, rohorenymy aõbo da roholaõrenymy aõbo. Teery aõbo irybesiradỹỹrenyre. ⁸ Hãburiòre, boholakre aõmybo rarybereri. Rybesidỹỹmy uritre noõmy iwsereny. Ary biraynykre tahe birsỹkre aõbo adee ariwahinykre. ⁹ Tai tahe debò-my rabire, wadee riterenyreri-ò, tyyrti rase rase-di tebòki. ¹⁰ Tii wadee rirawere, kia tahe rybe tai rirtinymy roimyhỹ, iwebrò-ki tule. Irtine tahe kia roimyhỹ, aõdese-my lorari tai roire, sỹbina ta ohitxi ijõra.