¹ Idi tahe Isaeli mahãdu-ò ibutumy Davi rarybere:— Wariòre Salomaõ heka iòlòmy Deuxu ritare tiihyyle, ihỹre heka itỹmyra tii rare, aõery aõkõ rare itỹmyradori rare. Iaõmysỹdỹỹna nihiỹmy heka rare iny hetoreny wese aõkõ riwinykremy tahe Deuxu heto heka, Templo widỹỹmy Deuxu-ò riwinykemy. ² WaDeuxu Templo widỹỹmy heka rexirurudỹỹnyre ibutumy aõna õna rebutunyre jiarỹ, womati tỹrỹrỹhỹkỹ, womati ura tỹrỹrỹhỹkỹ, borõsi womati, womatityhy, ônix maná, maná wiwihikỹ, mana wiwihikỹ iwitxira iwitxiramy idi awimy riwinykemy, maná wiwihikỹ urahakỹ sõwemy tule. ³ Deuxu heto templo widỹỹ-ò aõna õna sõwe rebutunyre tule rewahinyre, waõna õna wiwihikỹ, womati ura tỹrỹrỹhỹkỹ, womati tỹrỹrỹhỹkỹ wahõrõle, rewahinyre, ⁴ ijõ tule 100 mili iutxie womati tỹrỹrỹhỹkỹ heka sõwe sõwe rewahinyre, 240 mili womati ura tỹrỹrỹhỹkỹ templo woki idi rihetynykemy ⁵ katahe wiji heka mobo riwahinykre womati ura tỹrỹrỹhỹkỹ, womati tỹrỹrỹhỹkỹ Templo aõmysỹdỹỹdu mahãdu-ò mobo riwahinykre Deuxu-ò, Mobo ixidewimy riwahinykremy? ⁶ Tai tahe Isaeli mahãdu tamahãdu tamahãdu wedumy tamywi riwahinyrenyre, Isaeli mahãdu wedureny, sodadu mahãdu wedureny, iòlò aõna õna idi itxeredu mahãdu riwahi riwahinyrenyre tamyreny awi. ⁷ Myy riwahinyrenyre sõwe: Duxu heto, Templo widỹỹ-ò riwahinyrenyre; 170 mili iutxie sõwe womati tỹrỹrỹhỹkỹmy, 340 mili iutxie sõwe womati ura tỹrỹrỹhỹkỹmy, 615 mili iutxie sõwe borõsi womati, 3.420 iutxie sõwe womati tyhymy. ⁸ Inyõ mana wiwihikỹ ijõdire mahãdu heka riwahi riwahinyrenyre Templo widỹỹ-ò. Jeieli heka aõna õna, nieru iyrubudỹỹdumy, Templo idi aõmysỹdỹỹdumy tii Kesõ mahãdu heka rare, Levi mahãdumy ⁹ isali mahãdu heka sõwemy deysanareny-di taaõnarenymy riwahinyrenyre Deuxu-ò. Sõwemy riwahinyrenyre tai riteysarenyre, Deuxu tule riteysanyrenyre, Davi tule riteysanyre. ¹⁰ Tai heka Deuxu-ò iòlò Davi reàlàre Isaeli mahãdu koki rarybere myy:— Wanyrỹreny, Jaò iny labiereny Deuxu, tiemy ani heka ibutu ratyre heka rare, deysana tuhyymy! ¹¹ Deuxu nihiỹtyhy, ruruduhukỹ, loòsònatyhy, wiwihikỹtyhy! Ibutu biu-ki bede-ki rỹimyhỹre heka ahõrõ heka rare; iòlò tyhy tate, ibutu dinodumy. ¹² Ibutu aõwihikỹ aribile namyhỹde, arurudi heka ibutu dinodumy tate tulesỹ inỹõ aõtxile heka terurudỹỹnymy mahãte. ¹³ Wiji heka waDeuxureny, umy reàlàmyhỹrenyre, animy reàlàmyhỹrenyre. ¹⁴ Ihỹre heka Isaeli mahãduriòludunyõtyhy adee aõ riwahinyrenykemy ibutu dori aribile heka nade uri inyboho heka ô ixyby adeele rewahinyrenyrele. ¹⁵ Iny boho heka, iny labiereny kabede kabed-ki heka ele elemy uri riradumy iny boho roimyhỹre heka iny bededỹỹnanamy ubòròna wese keka rare, rubu ribi tiu rahenyõtyhy. ¹⁶ Ka ibutu aõwihikỹtyhy heka rebutunyrenyre heto Templo adee ariwahinyrenykremy, ani òbitimy ariwowydynyrenykremy ihỹre aõ ibutumy aribile nade inyde, kaa ibutumy heka ahõrõle heka rare. ¹⁷ Reeryrahe, inywo heka teurihimahãte iny òbitimy awimy tahamahãte, reeryra heka. Tai kaa aõna õna wiwihikỹ rebutunyra adeehe, wawo ribile inatyhy rewahinyre adee. Wiji heka wadeysareri ka idi retehemyhỹre heka ibutumy iny mahãdu kaò rexibutunyrenyre adeele reysamy rỹimyhỹre, aõ wiwihikỹ deysana- dilemy adee riwahinymyhỹrenyre taworeny ribile ibutumy deysanamy riwahinymyhỹrenyre. ¹⁸ WaDeuxu, Abraaõ Deuxu, Isaki Deuxu, Jaò Deuxu, idihyymy inyworeny-ki heka biwiòhenanyke awimy aratyhynyrenykremy òbitimy warawykyreny idihyymy adee òbitimy rakatxirenykemy. ¹⁹ Wariòre Salimaõ-ò òbitimy arybemy riòbyke tawo ribi tyhy, ibutu arybe mana òbitimy riwinykemy rexirurunykemy, aheto Templo adee tawo ribi riwinykemy tai dori kaa ka-ò aõna õna rebutunyre dori. ²⁰ Tai Davi ibutu Isaeli mahãdu-ò rarybere:_ Deuxu-ò Inynyrỹ beàlamyhỹbenyke! Ibutu Irsaeli mahãdu Deuxu-ó reàlàkre, Inynyrỹ-ò iny labiereny Deuxumy. Tai heka ibutumy tawotimy reserenyre takò su-ó ritidirenyre heka Deuxu-ò reàlàmy roire tule Davi-ò reàlàmy roiremyhỹ. ²¹ Ijõ txumy heka iròdu sõwemy rirubunyrenyre xiwenamy Inynyrỹ Deuxu-ò riwahinyrenyre irahudi heka Isaeli mahãdu-ò riroxirenykremy riwahinyrenyre. Kia txuu tule sohoji mili broreni hãbumy sõwe, ijõ sohoji mili budoeni hãbumy sõwe, ijõ sohoji mili budoeni hawyymy rirubunyrenyre idi risõtyhyre Deuxu-ò, vῖῖ tule sõwe riwahinyrenyre Deuxu-ò. ²² kia txuu heka Deuxu-koki sõwemy riroxirenyre reysa reysareny-di. Iribi tahe inatxinamy raryberenyre Salomaõ iòlòrenymy ralokremy tai heka Salomaõ iòlòrenymy risỹnyrenyre Deuxu koki tule ijõ Sadoke xiwena wahidỹỹdumy risỹnyrenyre. ²³ Tai tahe Salomaõ Deuxu Inynyrỹ rynana-ki runyre, tyby deròwymy Davi wahe. Idi heka Salomaõ sõwemy ratyhyra, tule Isaeli mahãdu ibutumy irybemy rityhynymyroire. ²⁴ Ibutu heka sodadu mahãdumy, sodadu wedu mahãdumy, Davi riòrereny mahãdumy Salomaõ rityhynyrenykremy raryberenyre. ²⁵ Salomaõ ibutu Isaeli mahãdu rityhynyrenykremy Deuxu riwinyre tule iòlò mahãdu ribi ratyremy Deuxu riwinyre. ²⁶ Davi, Jesé riòre heka Isaeli mahãdu 40 beòra-di ridinodunyre. ²⁷ Heborõ-ki heka debò inatxi reurò beòra-di ridinodunyre, Jerusalẽ-ki heka 36 beòra-di ridinodunyre. ²⁸ Tahe rurure matuari tyhy, ityhymy ibutu ratyre iriòre Salomaõ riteròwynanyre, Isaeli iòlòmy. ²⁹ Davi iòlò ijyymy heka iòraruna ribi iònana-ò Deuxu rybedumy idi rirytinyre: Samueli, Natã, Kademy. ³⁰ Davi ijyymy heka iòlònamy, timybo ridinodunyre, tarurunamy, ibutu aõhebo rotỹỹnyre iòlòmy rareu, timybo tii rare iwitxira su ludu mahãdu, ibutumy relyyre ijyymy.