¹ Jerusalẽ hãwã-ò ibutu hãwã hãwã sỹdu mahãdu heka ributunyrenykremy Isaeli Davi iòlò rarybere wedu mahãdu-ò. Tai heka Jerusalẽ hãwã-ò ributunyrenyre heka Isaeli mahãdu wedu wedumy, Isaeli mahãdu iólònarenymy aõna õna idi itxeredu mahãdumy, Isaeli tamahãdu tamahãdu wedumy, iòlò Davi heto heto idi itxeredu mahãdumy, iòlò iriòrereny nohõreny idi itxeredu mahãdumy, Davi heto iaõmysỹdỹỹdu mahãdumy, sodado mahãdu wedumy, ijõ wedu mahãdumy. ² Ikorenymy Davi lamymy roimyhỹremy rarybere tamyreny: Waijoireny, inysureny mahãdu, waseriòrereny boholabenykewa! Deuxu heto heka ariwinykremy taile Deuxu owòru wodỹỹ tỹrỹrỹhỹkỹ rirarenykremy tuhyymy, kia òwòru wodỹỹ tỹrỹrỹhỹkỹ (Arka) heka Deuxuwa elehyna dori rare, inyDeuxureny-ò ariwinykremy wowydyna-ò, tai rekàlànyrenykemy. ³ Ihỹrele heka Deuxu uritere wadee rarybere widỹỹõkremy, jiarỹ sodadu widỹỹmy raremyhỹ, tai sõwemy iny hãlubu rejuxunyre dori. ⁴ Jiarỹ, heka, wariòrereny, wariokorereny heka Deuxu ritare Isaeli mahãdu wedumy tuhyymy. Judá mahãdu heka tii ritare Isaeli wedumy: Judá mãhãdu ribi heka Waha mahãdule ritare tamywimy, waha riórerenymy ribi riwatare Isaeli mahãdu ibutu iòlòmy aratxikremy. ⁵ Deuxu sõwemy wariòrereny wadee riwahinyre, wariòrereny ribi heka Salomaõle ritare, Isaeli iòlòmy ratxikremy tuhyymy, Isaeli heka Deuxu iòlònamy heka rare. ⁶ Deuxu heka wadee narybede: “Davi, Salomaõ ariòrele heka waheto Templo Riwinykemy. Tii wariòremy rarekemy Jiarỹ retare tybymy Jiarỹ ararekre. ⁷ Tii idihyymy warybe-ò reòbekeki, wabede ywinarenymy riywinykeki, iwese wiji riwinyhỹre wese heka, iòlònamy ariwahinykre tuhyymy.” ⁸ Davi tule rarybere:_Tai dori wiji heka, inyDeuxureny koki heka, iny ka ibutumy rỹimyhỹre Deuxu mahãdumy Isaeli mahãdu koki heka, katahe aritidike, kaiboho ibutumy Deuxu rybemy heka òbitimy idi beòbybedenyke iwesele heka Deuxu rarybere iwesemy, ka inysureny wihikỹ heka adeereny ratxityhykemy idi heka tiemy ariòrereny mahãdumy kasu reurorenykremy dori. ⁹ Salomaõ-ò Davi rarybere:_ Wariòre, Deuxu bityhyny mahãke, boo Deuxumy bityhyny mahãke awo tyhy ribi, adewi awo ribi inatyhyna-di. Tii heka ibutu araryky ribi rierymyhỹre, ibutu aõ tarumahãte rierymyhỹre dori. Deuxumy biijekeki heka itxi mahãke, Tiihe araòbyke; tahe, iribi rexihejikeki tahe Tii ararike tiemy. ¹⁰ Inatyhytyhymy idi mohõtinyke Deuxu heka aratare heka taheto templomy biwinykemy aratare dori. Tai heka bexirurunymahãke! Tamy maõmysỹdỹỹnykemy! ¹¹ Iu heka Salomaõ-ò Davi riwahinyre Deuxu heto Templo iritinamy Deuxu-ò deàlàna timybo rawahinykemy wesemy kia heka roire ritina-ki, Deuxu heto templo iwo-ki inatxi rareamy rỹimyhỹre. Juhuu irareasana-ki Deuxu iòhònasỹ heka inire inatximy tai riritinymy roire, tule. òwòru wodỹỹ ratòbòna tikibo Deuxu iny òraruna riixãwidỹỹnymyhỹre wahe. tule ritina-ki roire Deuxu heto Templo iwo tyhy heka, taile iny òrarunareny risuhòmy roiremy Deuxu. ¹² Salomaõ-ò Davi tule riwahinyre ibutu ritinamy idi rõhõtinyre Deuxu heto Templo ubemy timybo urihixinamy roirekremy ibutumy; iube roiremyhỹ urihixinamy, iube werumy urihixinamy ratxikremy, Deuxu heto Templo-ki hitximy roikre tai iaõna õnamy riyrubunykremy tahe womati sõwe, aõ bese, adỹỹ, aõ idi xiwena Deuxu-ò riwahinykemy iwitxira iwitxiramy, iaõna õna idi riuherenykemy templo woki riyrubunyke, iwo tule ijõdikremy iube-ki. ¹³ Iaõmysỹdỹỹnarenymy ibutu timybo ratxikremy. Davi riritinyre idi riwahinyre ariòre-ò, xiwena wahidỹỹdu mahãdureny, Deuxu heto templowo-ki tai ratxirenykremy iaõna õnamy ibutumy idi riywinyrenykremy, riyrubunyrenykremy òbitimy. ¹⁴ Kia Davi riritinyre heka womati tỹrỹrỹhỹkỹ iutxiemy idi riuhekremy, womati tỹrỹrỹhỹkỹ iuramy kia aõna aõnamy iwidỹỹmy Deuxu heto Templo-ki womati idi urihixinamy ritidire tiwese iutxiemy idi riuhekremy. ¹⁵ Adỹỹ loosòna denamy Deuxu heto Templowo-ki rỹimyhỹkremy kia ibutumy Davi riritinyre, tulesỹ ¹⁶ womati iura tỹrỹrỹhỹkỹ-di òworu besemy riwinykremy, ijõ òworu besemy womati tỹrỹrỹhỹkỹ-di riwinykremy tai òworu besetyre-ki orotxu (paõ) brebuna deòtenamy rỹikremy heka Deuxu-ò xiwenamy riwahinykremy. ¹⁷ Atara sõwe, tesewa sõwe, watxiwi sõwe, dòsená sõwe, butxi iuja sõwe, butxityhy sõwe, iaõna õna sõwe sõwe tiwesebo womati tỹrỹrỹhỹkỹ raiutxienykremy riòbynyke, tiwesebo womati iura tỹrỹrỹhỹkỹ raiutxienykremy rióbynyke Davi riritinyre. ¹⁸ Kia ijõ xiwena deòtena tai riwosinykemy tỹnyre reakemy tiwese sõwe womati tỹrỹrỹhỹkỹ idi riuhekremy, ijõ tahe tewe riwinykremy tiwesebo womati tỹrỹrỹhỹkỹ raiutxienykremy tewetyre-ki hka ỹju ritxoo teubòròdile riwòmyhỹ òworu wodỹỹ ratòbònamy ritidikremy, kia òworu wodỹỹ heka Inynyrỹ Deuxu Arka heka rare. ¹⁹ Idi heka Davi iòlòmy rarybere:_Ibutu ka ritina-ki Deuxu wadee rarybere iwesetyhyle reritinyre heka, kia wesemy heka idi riwinykremy. ²⁰ Iribi heka Davi tariòremy Salomaõ-ò rarybere:_Iruruteremy matxikre, bexirurudỹỹnykre, aõmysỹdỹỹhe biòrarunykre! Aworexieryõmyke, berebuõmyke, Deuxu awanamy ararekre. Tiu arariõtyhy, tii awanahyymy rarekre ka templo rahudi xiery. ²¹ Kaheka roimyhỹre xiwena wahidỹỹdu mahãdu, Levi mahãdu tii boho ibutu templo aõmysỹdỹỹrenykremy ka roimymỹhỹre. Ibutu aõmysỹ ery mahãdu rexiywinymy roire ibutu arawiòhenanykremy, Isaeli mahãdumy tule, Isaeli mahãdu wedumy tule a rybe òbymy ibutumy kaki roimyhỹre.