3

¹ مسیحیانَ یادآوری بوکون کی حاکمان و مقاماتِ دولتی جَه اِطاعت بوکوند، و همیشه هر کارِ نیکو رِه آماده بوبود. ² هیچکسِ پوشتِ سر بد نوگوید و دعوا و دوشمنی جَه دوری بوکوند، در عوض مُلایم بوبود و دیگرانِ مرَه فروتنی اَمرَه رفتار بوکوند ³ اَمَأنم پیشترانِ رِه نادان و نافرمان، و اَنواعِ شَهوتانُ لذّتانِ اَسیر بوئیم، و خودمانِ روزانَ کینه و حسادتِ اَمرَه گوذرانه ایم، دیگران اَمی جَه نفرت دَأشتد و اَمَأنم اوشَأنِ جَه. ⁴ ولی موقعی بوبُست کی اَمی نجات دهنده خدا، لطف و مهربانی آشکارَ بوست ⁵ و اَمَرَه نجات بدَه، اَ نجاتْ اَنِ وَسی نوبو چون کارایِ خوبی انجام بدَه بیم، بلکی مَحضِ خو رَحمت اَمَرَه نجات بدَه، و غسلِ مرَه، اَمَرَه تازه تولدی ببخشه و روحِ القدسِ مرَه، اَمَرَه تازَه کود. ⁶ خدا، به توسط اَمی نجات دهنده عیسی مسیح، روح القدسَ به فراوانی اَمرَه عَطا بوکود. ⁷ تا اونِ فیضِ وَسی کاملاً عادل به حساب بَأئیم و مُطابقِ اون اُمیدی کی دَأریم حیاتِ جاودانِ وارث بیبیم. ⁸ اَ گوفته یان همه دوروست و قابلِ اعتمادد، هَنه وَسی تی جَه خَأیم اَ حرفانَ اوشَأنی کی خدایَ ایمان بأورده دَأردَ تأکید بوکونی تا جی یاد نوبورد کی خودشانَ همیشه کارهایِ خوبِ رِه وقف بوکوند، چره کی اَ چیزان همۀ آدمانِ رِه خوب و مفیده. ⁹ بَحثهایِ اَحمقانه جَه دوری بوکون، بحثهایی کی دربارۀ شجره نامه یانُ عقاید و یهودِ شریعت پیش اَیه، چون اَجور بحثَأنْ بی فایده و بی اَرزشه. ¹⁰ اگر کسی تفرقه و جودایی یَ باعث بِه، یکی دو بار اونَ هُشدار بدن، بازن دِ اونِ مرَه کاری ندَأر. ¹¹ چون خودت دَأنی اَجور آدم مُنحرفَ بوسته و گوناهکاره، و خودشْ خودشَ مَحکوم بوکوده.

آخر ین نَصیحَتان

¹² در نظر دَأرم «آرتِماس» یا «تیخیکوسَ» اوسه کونم تی ورجَه، هر وخت ایتَه جی اَشَأن فَأرسد اویَ، تو سعی بوکون هر چی زودتر بأیی شهرِ نیکوپولیس می ورجَه، چون خَأیم زمستانِ رِه اویَ بِئسم. ¹³ تا جایی کی تَأنی زیناسِ وکیلْ و آپولُسَ کمک بوکون تا خوشَأنِ سفرَ اِدامه بدد، تی حواس بمَأنه تا چیزی یَ مُحتاج نوبود. ¹⁴ و اَطو اَمی کلیسائانِ اَعضا یاد بیگیرد کی خوشأنَ کارهایِ خوبِ رِه وقف بوکوند، و تلاش بوکوند تا احتیاجاتِ ضروری یَ رفع بوکوند، و اوشَأنِ زندگی هَطو بی ثمر نیبه. ¹⁵ همۀ می دوستان ترِه سلام رسَأند، تونم همۀ اَمی دوستایِ مسیحی یَ سلام برسَأن. فیض شیمی اَمرَه بیبه.