2

¹ ولی تو اونچی جَه کی مُطابقِ تعلیمِ صحیحه گب بزن. ² پیرِ مردَکأنَ تعلیم بدن کی باوقار و سنگین و عاقل بوبود، و ایمان و مُحبت و صَبرِ میَأن شایستگی مرَه رفتار بوکوند. ³ پیرِ زنأکأنم یاد بدن کی رفتاری خداپسندانه بدَأرد، تُهمت نزند و شرابِ اَسیر نوبود، بلکی اونچی کی دوروسته یَ تعلیم بدد. ⁴ تا بتَأند زنانِ جوانترَ تربیت بوکوند کی خوشَأنِ مردُ خوشَأنِ زأکأنَ دوس بدَأرد و ⁵ عاقلْ و پاکدامن بوبود، و ایتَه زنِ خانه دار، مهربان، و خوشأنِ مردکأنِ مطیع بوبود، تا هیچکس بهانه ایی ندأره کی مسیحیانِ جَه بد بوگویه. ⁶ و جوانِ مردکأنِ نصیحت بوکون پرهیزکار بوبود. ⁷ هر چیزِ دورون تی خودتِ زندگی وَأستی نمونه بیبه. تعلیم دئَنِ رِه صداقت بدَأر و جدی بوبون، ⁸ تی حرفانْ وَأستی منطقی و عاقلانه بیبه، تا کسانی کی تی اَمرَه جَر و بَحثْ و مخالفت کوند نتَأند تی جه ایراد بیگیرد و شرمنده بوبود. ⁹ غلامانَ نصیحت بوکون کی خوشأنِ اَربابانِ جَه اِطاعت بوکوند و هر کاری دورون اوشأنَ راضی بدَأرد و و چونُ چرا نوکوند ¹⁰ و خوشَأنِ اَربابانِ جَه دوزدی نوکوند. بلکی عملِ مرَه نشان بدد کی هر چیزِ دورون اَمین و دوروستکارد. مردم شیمی رفتارَ کی بیدیند علاقمند بهد تا اَمی نجات دهنده، خدایَ ایمان بأورد. ¹¹ چون خدا فیضْ ظاهرَ بوسته و هَسَه نجات همه تَه پِشِ جَه قرار دَأره. ¹² و اَمَرَه یاد دِهه کی بی دینی و دونیا شَهوتانَ ترکَ کونیم، و خویشتنداری و عدالت و خداترسی اَمرَه اَ دونیا میَأن زندگی بوکونیم. ¹³ و اگر اَطو زندگی بوکونیم، تَأنیم اُمید و اشتیاقِ اَمرَه اون روزِ مبارکِ رأفأ بِئسیم، روزی کی خدایِ عظیم و اَمی نجات دهنده عیسی مسیحْ شکوه و جلالِ اَمرَه ظهور کونه. ¹⁴ اون خو جانَ اَمی وَسی فَدَه تا اَمَأن هرجور شرارتِ جَه آزاد بیبیم، و اَمرَه قؤمی پاک بوکود، قؤمی کی خودشه شین بیبه و هر کارِ نیکو رِه مشتاق. ¹⁵ اَ چیزانَ بوگو و اقتدارِ اَمرَه نصیحتْ و یا توبیخ بوکون، وَأنَأل کسی ترَه حقیر بدَأنه.