1

¹ اَ نامه پولسِ طرفِ جَه یه کی خدا غلامْ و عیسای مسیحِ رسوله، من مأموریت دَأرم خدا برگزیده یانِ ایمانَ تقویت بوکونم و اونْ حقیقتی کی دینداری مرَه سازگاره یَ بوگویم، ² اون حقیقتْ بر اَساسِ اُمید به حیاتِ جاودانه، کی خدایی کی هیچموقع دوروغ نوگویه اونَ از اَزل وَعده بدَه بو، ³ و ایتَه زمانِ مُناسبِ رِه خو وَعده یَ، پیغامِ اِنجیلِ دورون آشکارَ کود، و پیغامِ اِنجیلِ موعظه کودَأنْ، اَمی نجات دهنده، یعنی خدا دستورِ اَمرَه، مرَه بیسپُرده بوبُسته. ⁴ به تیطُس، می حقیقی زأی، کی ایمانِ دورون مُشترکیم. خدایِ پئر و اَمی نجات دهنده عیسی مسیح ترَه فیض و آرامش عَطا بوکونه.

⁵ اَنِ وَسی ترَه جزیرۀ کرِت میَأن جا بنَم تا کارایی کی بمَأنسته بویَ سر و سامان بدی و هوطویی کی شخصاً ترَه دستور بدَم، هر شهرِ کلیسا رِه کشیشانی تعیین بوکونی. ⁶ کلیسا رهبر وَأستی بی عیب بیبه، و فقط ایتَه زن بدَأره، و زأکأنی با ایمان بدَأره کی کسی نتَأنه اوشَأنَ تُهمتِ هرزگی و یاغی گری بزنه. ⁷ چون کشیشْ خدا کارِ مسئوله، پس وَأستی بی عیب بیبه، اون نوَأستی خودخواه یا بی اَدب یا عَصبانی یا دعواگیر بیبه، و یا مَستَ کونه، اون نوَأستی طمع کار و پول پَرست بیبه. ⁸ بلکی وَأستی مهمان نواز، خیرخواه، عاقل، مُنصف، پاک و مُنظم بیبه، ⁹ و اون حقیقتی کی تعلیم بیگفته یَ ایمانِ واقعی بدَأره تا بتَأنه دیگرانَ دوروست و صحیح تعلیم بده و مُخالفانِ نظرَ ردَ کونه. ¹⁰ چون آدمایِ چرت و پرت گو و فریبکار زیادد، مخصوصاً مسیحیانِ یهودی نژادِ میَأن، ¹¹ کی وَأستی اوشَأنِ دَهَنَ دَوَست، چون خانواده هایِ زیادی اوشَأنِ حرفانِ مرَه راهِ راستِ جَه مُنحرفَ بوسته دَأرد، اَشَأنی کی اَجور تعلیمِ غلط دهد، فقط خوشَأنِ منافع نامشروع فکرد. ¹² حتی ایتَه جی اوشَأن کی اِدعایِ پیغمبری هم کونه بوگوفته دَأره:«جزیرۀ کرِت مردم همیشه دوروغ گوید و حیوانایِ وحشیَ مَأند، اوشأن تنبل و شکم پرستد» ¹³ اونِ حرف راسته، هَنه وَسی لازمه کی کرِت مسیحیانَ خیلی جدی حُکم بوکونی تا ایمانِ میَأن سالم بوبود، ¹⁴ و مردمی کی حقیقتِ جَه دورَ بوسته دَأردِ احکامَ، و یهودِ افسانه یانَ گوش ندد. ¹⁵ کسانی کی پاکدِ رِه همه چی پاکه، ولی اوشَأنی کی آلوده ید و بی ایمان، هیچی پاک نییه، چون اوشَأنِ افکار و اوشَأنِ وجدان آلوده یه. ¹⁶ اِدعا کوند خدایَ شناسد، ولی خوشَأنِ اعمالِ مرَه ثابت کوند کی دوروغ گوید، اوشَأن چنان منفور و مُنحرفد کی نتَأند هیچ کارِ خوبی انجام بدد.