¹ لِموئیلِ پادشاه گبان. پیغامی کی اونِ مار اونَ تعلیم بدَه: ² «چی بوگویم پسرجان، ای می رَحمِ پسر، ای کی ترَه نذر و نیازِ اَمرَه بودونیا بأوردم. ³ تی جوانی نیرویَ زنأکأنِ رِه مصرف نوکون، و تی قوّتَ کسانی رِه کی شاهانِ هلاکتَ باعث بود. ⁴ ای لِموئیل، شاهانِ رِه دوروست نییه، شاهانِ رِه دوروست نیه کی شراب بوخورد، و حاکمانِ رِه کی مشروبَ مشتاق بوبود. ⁵ نوکونه بوخورد و قوانینَ جی خاطر بوبورد و نتَأند مظلومانِ داد فَأرسد. ⁶ شرابَ اوشَأنی یَ فَأدن کی مرگِ رأفإ ایسَأد، و کسانی یَ کی بدبختی و دیلتنگی میَأن گرفتارد. ⁷ تا بوخورد و خوشَأنِ فقر و بدبختی یَ فراموشَ کوند. ⁸ تی دَهَنَ وَأکون و بیچاره یان و بی زبانِ جَه دفاع بوکون. ⁹ تی دَهَنَ وَأکون و انصافِ اَمرَه داوری بوکون و فقیران و محتاجانِ داد فَأرس. ¹⁰ کی تَأنه ایتَه خُرمه زن خوره پیدا کونه؟ اونِ ارزش جی جواهرم ویشتره. ¹¹ اونِ مرد اونَ اعتماد دَأره و اونم وَأنَألِه کی اونِ مردأی چیزی یَ مُحتاج بیبه. ¹² همۀ خو عُمر خو مردَ خوبی کونه نه بدی. ¹³ پشم و کتانَ گیره و خو دسِ اَمرَه اونَ ریسه. ¹⁴ اون خوراک تهیه کودَأنِ وَسی، تاجرانِ کشتی مأنستَأن شِه راه های دور. ¹⁵ وختی هوا هنوز روشنَ نوبوسته جی خواب ویریزه، و خو خانواده رِه خوراک آمادَه کونه و خو کنیزانَ دستوراتِ لازمَه دِهه. ¹⁶ ایتَه زمینَ در نظر گیره و بررسی کونه و بازن اونَ هینه و خو دسرنجِ اَمرَه ایتَه تاکستان چَأکونه. ¹⁷ خو کمرَ قوّتِ اَمرَه دوَده و خو بازویَ قوی کونه. ¹⁸ خرید و فروشِ اُمورَ رسیدگی کونه و شبأن تا دیر وخت خانه دورون کار کونه. ¹⁹ خو دسَأنِ اَمرَه نخ ریسه و پارچه بافه. ²⁰ اون دس و دیل بازه و فقیرانَ کمک کونه. ²¹ برف و سرما جَه نترسه، چون همۀ خانواده رِه رخت و لباس بودوخته. ²² خودشه رِه هم پارچه های گران قیمتِ مرَه رخت و لباس قشنگ دوزه. ²³ اونِ مردَ دربارِ میَأن همه شنَأسد، و ولایتِ شیخَأن اَمرَه نیشینه. ²⁴ اون رخت و لباس و کمربند چَأکونه و، تاجرانَ فروشه. ²⁵ قوت و عزت اونِ رخت و لباسه، و آینده جَه ترسی نَئره. ²⁶ همۀ اونِ گبان پور جی حکمته، و اونِ نصیحت کودَأن محبتِ اَمرَه یه. ²⁷ اون تنبلی نوکونه و خو خانواده احتیاجانَ رسیدگی کونه. ²⁸ اونِ زَأکأن اونِ جَه راضید و اونِ مرد اونَ ستایش کونه و گویه: ²⁹ « تو همۀ زنانِ خوب و صالحِ میَأن نظیر نَئری» ³⁰ زیبایی و قشنگی پایدار نییه و جی میَأن شِه، ولی زنی کی خداترس بیبه یَ وَأستی ستایش کودَأن. ³¹ اونِ پاداشَ اونَ فأدید و وَألید همه اونَ تحسین بوکوند.