1
عیسی هیرودیسِ پادشاه سلطنتِ موقع، بیت لَحمِ یهودیه میَأن بودونیا بأمو. اونموقع چن تَه مُغ مَشرق زمینِ جَه بأمود اورشلیم. اوشَأن وَأورسد:
2
«اون زَأیی کی یهودِ پادشاهه کَ یَ ایسَه؟ اَمَأن اونِ ستاره یَ مشرقِ جَه بیده ایم و بأموئیم تا اونَ پرستش بوکونیم.»
3
وختی اَ خبرْ هیرودیسِ پادشاه گوش فأرسه پریشانَ بوست و اورشلیمِ مردمم اونِ اَمرَه.
4
اونْ کاهنانِ سران و یهودِ مُلایانَ دخَأد و اوشَأنِ اَمرَه جلسه ایی تشکیل بدَه و اوشَأنِ جَه وَأورسه:«مسیحِ موعود کَ یَ وَأستی بودونیا بَأیه؟»
5
اونَ بوگوفتد:«بیت لَحمِ یهودیه، چون نبّی در اَن باره اَطو بینیویشته دَأره؛
6
"ای بیت لحمْ کی یهودا سرزمینِ میَأن قرار دَأری، تو دیگر فرمانروایانِ جَه کوچی تر نیئی، چون تی جَه فرمانروایی ظهور کونه کی می قؤم، اسرائیلَ شبانی کونه.»
7
اونموقع هیرودیسْ مُغانِ رِه پیغام اوسَه کود تا بَأید و اونِ اَمرَه خلوتی ملاقات بوکوند، و اَطو بفهمست کی ستاره دقیقاً کِی ظهور بوکوده.
8
بعدْ اوشَأنَ اوسَه کود بیت لحم و بوگوفت:«بیشید و اون طفلِ دونبال بگردید، وختی اونَ پیدا کودید مرَه هم خبر بدید تا بَأیم اونَ پرستش بوکونم.»
9
اوشَأن وختی پادشاه حرفانَ بیشتَأوستد حرکت بوکودد، ایمرتبه اون ستاره ایی کی مشرقِ میَأن بیده بود ظاهرَ بوست، و اوشَأنِ پیشاپیش حرکت کوده تا جایی کی اون طفل ایسه بو، هویَ آسمانِ میَأن بِئسَه.
10
اوشَأنْ وختی ستاره یَ بیدد خیلی خوشحالَ بوستد.
11
پس اون خانه یَ بودورون بوشد و زَأیَ اونِ مارْ مریمِ اَمرَه اویَ بیدد و بعدْ سُجده بوکودد و زَأیَ پرستش بوکودد. بعد هم خوشَأنِ صندوقانَ بازَه کودد و طلا و کُندر و مُر اونَ تقدیم بوکودد.
12
و وختی خوفته بود اوشَأنَ وحی برسه کی هیرودیسِ وَرجَه وأنگردد، پس ایتَه راهِ دیگرِ جَه وَأگردستد خوشَأنِ سرزمین.
فرار به مصر
13
بعدِ اَنکی مُغان بوشود، خداوندِ فرشته یوسفَ ظاهرَ بوست و بوگوفت:«ویریز و زَأی و اونِ مارَ اوسَأن و فرار بوکون مصر، و هویَ بِئس تا ترَه خبر بدم، چون هیرودیس گرده تا زَأیَ پیدا کونه و اونَ بوکوشه.»
14
یوسف هو شب زَأی و اونِ مارَ اوسَأد و حرکت بوکودد مصرِ طرف.
15
و تا وختی کی هیرودیس زنده بو هویَ بِئسَه. و اَطو کلامی کی خداوند خو نبی زبانِ جَه بوگوفته بو انجام بیگیفت کی گوفته:«مصرِ جَه خودمِ پسرَ دخَأدم.»
16
وختی هیرودیس بیده کی مُغان اونَ کلک بزَه دَأرد خیلی عصبانی بوبُست، اون فرمان بدَه کی همۀ پسر زَأکأنی کی بِیت لحمِ میَأن و اون مناطقِ اَطراف ایسَدْ و دو سالْ و یا کمتر دَأردَ بوکوشد، چون مُطابقِ اون زمانی کی مُغانِ جَه بفهمسته بو ستارهْ از دو سال پیش ظهور بوکوده بو.
17
و اَطو اونچی کی اِرمیایِ نبی بوگوفته بو انجام بوبُست:
18
«صدایی رامه میَأن به گوش فأرسه، گریه زاری و ماتم عظیمی کی راحیلْ خو زأکأنِ رِه کونه و آرامَ نیبه، چون دِ نِئسَأد.»
وَأگردستَأن به ناصره
19
ولی وختی هیرودیس بمرد، خداوندِ فرشته مصرِ میَأن خوابِ جَه یوسفَ ظاهرَ بوست و بوگوفت:
20
«ویریز و زَأیْ و اونِ مارَ اوسَأن و وَأگرد اسرائیل، چون کسانی کی خَأستد زَأیَ بوکوشد بمرده دَأرد.»
21
پس یوسف هم ویریشت و زَأی و اونَ مارَ اوسَأد و وَأگردست اسرائیل.
22
ولی وختی بیشتَأوست کی آرکلائوس خو پئرِ جا یهودیه میَأن فرمانروا بوبُسته، بترسه کی بیشه اویَ، و خوابِ میَأن اونَ وَحی بوبُست و اونم بوشو سرزمینِ جلیلِ طرف.
23
و شهری به نامِ ناصره میَأن ساکن بوبُست، و اَطو اونچی کی اَنبیاء پیشگویی بوکوده بود انجام بیگیفت کی:«اونْ ناصری دخَأه بِه.»