4

¹ ای اَربابان، شیمی غلامانِ مرَه عادلانه و مُنصفانه رفتار بوکونید، چون دَأنید کی شومَأنَم آسمانِ میَأن ایته اَرباب دَأرید. ² همیشه شیمی حواس جمع بیبه، و دوعا و شکرگزاری بوکونید، ³ اَمرِم دوعا بوکونید تا خدا اَمرِه دَری وَأکونه کی بتَأنیم مسیحِ انجیلِ پیغامَ همه تَه نَ اِعلام بوکونیم. اِنجیلی کی اونِ وَسی هَسَه زندانِ دورون ایسَأم. ⁴ دوعا بوکونید تا بتَأنم اونَ تمام و کمال اِعلام بوکونم، هوطویی کی اونِ شایسته یه. ⁵ هر فرصتِ جَه ویشترین اِستفاده یَ بوکونید و غیرِ مسیحیانِ مرَه عاقلانه رفتار بوکونید. ⁶ شیمی گبان همیشه فیضِ مرَه بیبه و حساب شده گب بزنید، تا بدَأنید هر کسَ چوطو وَأستی جواب دَئَن.

⁷ تیخیکوس شمرَه می حال و اَحوالِ جَه باخبر کونه، اون ایتَه خادمِ اَمین و می عزیزِ برأره، و خداوندِ کارِ دورون می هَمخدمته. ⁸ اونَ اوسه کونم شیمی ورجَه تا اَمی اَحوالِ جَه باخبر بیبید و شیمی خیال راحت بیبه. ⁹ اونْ، اونِسیموسِ اَمرَه کی اَمی برأرِ عزیز و وفاداره و خودتانِ هَمشَهریه شیمی ورجَه اَیه. اَ دو نفر هر چی جَه کی اَیَ در جریانه شمرَه خبر دهد. ¹⁰ آریستارخوس کی می اَمرَه زندانِ دورون ایسَه شمرَه سلام رسَأنه. و هَطو مَرقُس، برنابا عَمو پسرم شمرَه سلام رسَأنه. قبلاً دربارۀ اون شمرَه سفارش بوکوده بؤم کی هر وخت بأمو شیمی ورجَه اونَ تحویل بیگیرید. ¹¹ عیسی هم، کی اونَ یوستوس دخَأند شمرَه سلام رسَأنه. می همکارانِ میَأن کی همگی خدا مَلکوتَ خدمت کونیم، فقط اَ چند نفر یهودی نژادد، و اَشَأن چقدر می دلگرمی و آرامشَ باعث بوبُستد. ¹² اِپافْراسْ کی شیمی همشهری و مسیحِ عیسی خادمه شمرَه سلام رسَأنه، اون همیشه شمرِه دعا کونه تا بلوغِ کاملِ روحانی یَ فأرسید و اُستوار بِئسید، و همیشه خدا خواستَ درک بوکونید و مُطابقِ اونِ اِراده عمل بوکونید. ¹³ من شاهدم کی اون شیمی وَسی، و لائودیکیه و هیراپولیسِ ایماندارانِ وَسی چقدر زحمت بکشه دَأره. ¹⁴ لوقا، اون طبیبِ محبوبْ، و دیماس شمرِه سلام رسَأند ¹⁵ لائودیکیه ایماندارانَ سلام برسَأنید، اَمی خأخور نیمفاسَ، و کلیسایی کی اونِ خانه دورون تشکیل بِه یَ سلام برسَأنید. ¹⁶ بعدِ اَنکی اَ نامه شمرِه بخوانده بوبُست، اونَ اوسه کونید لائودیکیه کلیسا، تا اوشَأنِ رِه هم بخَأند، و اون نامه ایی کی اوشَأنِ رِه بینیویشته دَأرمَ بیگیرید و بخَأنید. ¹⁷ آرخیپوسَ بوگوئید:«مراقب بوبون تا اون خدمتی کی خداوند ترَه بیسپُرده دَأره یَ به بهترین وجه انجام بدی» ¹⁸ من، پولس، می خودمِ دستخطِ اَمرَه اَ دورودَ شمرِه نیویسم، «مرَه اَ زندانِ دورون جی خاطر نوبورید، خدا فیض شیمی اَمرَه بیبه، آمین»