3

¹ هَسَه کی مسیحْ مرَه دوباره زنده بوبُستید، اونچی کی بوجُر نَهه طالب بیبید، جایی کی مسیحْ خدا راستِ طرفِ جَه نیشته. ² دربارۀ اونچی کی عالمِ بوجُرِ جَه نَهَه فکر بوکونید، نه اونچی کی زمینِ رو نَهه. ³ چون شومَأن نسبتِ به اَ دونیا بمرده اید، و شیمی زندگیه واقعی هَسَه آسمانِ میَأن نَهَه، یعنی مسیحْ مرَه خدا حضورِ جَه. ⁴ وختی مسیحْ کی شیمی زندگیه واقعیه وَأگرده، اونموقع شومَأنم اونِ اَمرَه، شکوه و جلالِ دورون ظاهر بیهید. ⁵ پس هر چی کی شیمی وجودِ دورونْ، زمینی ایسه بوکوشید، یعنی بی عفتی، ناپاکی، هوی و هَوس، شهوَت و طمعَ، و اَ طمعْ خودش بُت پرستی به حساب اَیه. ⁶ هَجور کارانِ وَسیه کی خدا غَضب نازل بِه کسانی رو کی اَجور کارانَ کوند. ⁷ شومَأنم شیمی زندگی قبلی دورون هَ کارانَ کودید. ⁸ ولی هَسَه وَأستی همۀ اَشَأنَ خودتانِ جَه دورَه کونید، یعنی خشم و عصبانیت و بداخلاقیَ، و فُحش و حرفهایِ زشت به زبان نَأورید. ⁹ همدیگرَ دوروغ نوگوئید، چون دِ اون آدمِ سابق نیئید و اونْ اِنسانیتِ کهنه یَ اونِ همۀ عادتانِ اَمرَه شیمی تنِ جَه بیرون بأورده اید. ¹⁰ و هَسَه تازه یَ دوکوده اید، یعنی ایتَه تازه زندگی یَ شروع بوکوده اید کی اونِ میَأن راستی شناختِ دورون ترقی کونید، و هر روز ویشتر و ویشتر شیمی خالقِ شبیه بیهید. ¹¹ اَ تازه زندگی دورونْ، یونانی یا یهودی، ختنه بوبُسته یا ختنه نوبوسته، بَربَر یا وَحشی، غلام یا آزاد هیچ معنی ایی نَئره، بلکی مسیح همه چیزه و همه تَه زندگی دورون حضور دَأره. ¹² پس شومَأن کی خدا مَحبوبْ، و اونِ مُقدّسِ برگزیده یانید، نسبتِ به هم، رَحمت و مهربانی و فروتنی و مُلایمت و صَبر بدَأرید. ¹³ همدیگرَ تحمل بوکونید، اگر کسی نسبتِ به دیگری کینه کُدورتی دَأره، اونَ ببخشه. هوطویی کی خدا شمرَه ببخشه شومَأنم همدیگرَ ببخشید. ¹⁴ و از همه مُهمترْ، وَألید مُحبتْ شیمی زندگی راهنما بیبه، چون مُحبت همه چیَه به هم پیوند دِهه و شمرَه کاملَ کونه. ¹⁵ مسیحِ صلح شیمی دیلانِ دورون حکومت بوکونه، چون دخَأده بوبُسته اید کی ایتَه بدنِ اَعضا مَأنستَأن، هماهنگی، و صلح و صفا دورون زندگی بوکونید و شُکرگزار بیبید. ¹⁶ مسیحِ کلامْ خو همۀ پُری اَمرَه شیمی میَأن ساکن بیبه، و همدیگرَ تعلیم بدید و نصیحت بوکونید، و مزامیرْ، و تسبیحاتْ و سرودهای روحانی اَمرَه جی تَه دیل خدایَ ستایش بوکونید. ¹⁷ و هر کاری کونید، چی شیمی حَرفانْ، چی شیمی اَعمالْ، همه یَ به نامِ عیسایِ خداوند انجام بدید، و خدایِ پئرَ بواسطۀ اون شُکر بوکونید.

ایماندارانِ روابط

¹⁸ ای زنأکأن، شیمی مردَأکأنِ جَه اِطاعت بوکونید، چون اَن خداوندِ خواسته یه. ¹⁹ ای مردَأکأن، شیمی زنأکأنَ مُحبت بوکونید و اوشَأنِ اَمرَه توندی نوکونید. ²⁰ ای زأکأن، خودتانِ پئر و مارِ جَه اِطاعت بوکونید، چون اَ کار خداوندَ خوشحالَ کونه. ²¹ ای پئرانْ، شیمی زأکأنَ اوقدر سرزنش نوکونید کی دیلسرد بوبود. ²² ای غلامان، در هر اَمری شیمی اَربابایِ زمینی جَه اِطاعت بوکونید، نه فقط اون زمانی کی شمرَه فأندرستَأن درد، یا اَنکی خودشیرنی وَسی، بلکی جی تَه دیلْ و خداوندِ اِحترامِ وَسی خدمت بوکونید. ²³ هر کاری یَ با جان و دیل اَنجام بدید، جوری کی اِنگار مسیحَ خدمت کونید نه اِنسانَ. ²⁴ چون دَأنید کی شیمی پاداشَ مسیحِ خداوندِ جَه دریافت کونید، یعنی هون میراثی کی شمرِه کنار بنَه بوبُسته، چون در واقع شومَأن مسیحِ غلامید. ²⁵ چون هر کی ظلم بوکونه خو جزایَ دینه، و خدا تبعیضی قائل نیبه.