9
1
Netamen apaiwaso mocjom trompeta quinto enenlhet neten, apteiacme lhta lhema iau'a nalhepop, aplhoc alhta lhema actec
malhec anmaiancolha enjangoc.
2
Apmaiesacje lha malhec ma'a, ntepque lhta eten malha lhta ntac malhec allanemmalhquelha la iamamelhma, ca apuacje lhta acnem cacpota njan neten.
3
Apquelentepque lhta aisecsec eten sewa' apaijacje lhta tacjalhet lhepop lhmangquec jam, nnangque lhta apquenmopuanca'a malha lhta ctonac iettaja apietto'oc alhta nnac ma'a.
4
Nne lhta la allapaso menactewacsec panactema alielsellemo cacpota njan iamet. Wanlha lhta apquelleltacpo enaqtewacsec metco la alpaijacja napaqta'a alqasemmalhca apuesai'a Engiapom Neten.
5
Nne lhta njan allelto mennapec enenlhet, wanlha lhta apquelleltacpo elasquecsec apiempeioc enenlhet'awoc acuacmo 5 pelten, apquelasquesque lhta apiempeioc aniem'o apquenmoctai'a malha acto nac iettaja' la jenmoctai'a.
6
Etengiancoc jata niecje apqueletsepma enenlhet'awoc aniem'o aquientalhnema nac, coca meluetecjec jata acuo'o ta acnem anac ma'a.
7
Malha etanlheng alhta sewa' apquelpenesammap la ennapacpoc, nnangque lhta apnactetema apqatco'oc alienmomo oro, malha lhta njan enenlhet la apqatco'oc.
8
Malha lhta njan nqueluana awa' apua', malha lhta njan meiwa la am'oc apmo'oc.
9
Apqueliocja lhtoca malha apquelapquescama la tawa apac, aplhempancoc alhtoca apquellempanco la aliepioma malha ctonac etanlheng apqueliengioscama la coleto annapommalhca ancoc.
10
Apietto'oc alhto ca malha iettaja jenmoctai'acja nac, nietne lhta anmowanca'a cacpota ngconnactewacsec enenlhet'awoc acuacmo 5 pelten.
11
Apne lhta njan apuesque apancoc sewa' lhema enenlhet neten, aplomacja lhtoca mota aquieto malhec anmaiancolha enjangoc, nema altema coca Hebreo apaioma Abadon, cacpota njan Griego apaioma Apolion
12
Coca aquiawai'a aquientalhnema nac apqueluetai'a enenlhet'awoc, ngcaimelhquec coca 2 apquelpaiwascama mocjom trompeta enenlhet neten.
13
Netamen apaiwaso mocjom trompeta sexto enenlhet neten, mpelapcasque lhta asleng'o actepo nema aliatecama aisecsec aluanlhenmalhquelha caselha alienmomo oro aquiet'o m'a apcammelhacja Engiapom Neten, nau'ac alhtoca ngquelanmac ma'a malha 4 nentoscama ngcapet'oc.
14
Lhta ntac nema aliatecama ano enenlhet neten lhec apto apmaicama trompeta:
—Eljatsosques apnactetemmap 4 enenlhet neten apcacjanco jam aquieto aluata aquiawai'a Eufrates— lhta ntac nema aliatecama.
15
Ca apqueljatsoscasenco lhta apnactetemmap 4 enenlhet neten lhec cacpota ennapoc enenlhet'awoc lhema necja
lhepop, nietawec anque lhta acnem aclhenammalhquelha ngcotnejec.
16
Asleng'o lhta njan ania'a 200.000.000 soldados cacpota ennapacpoc ma'a,
17
asuet'a lhta njan ma'a etanlheng apquelcanantema, apquelapquescama lhtoca apnengio'oc soldados aquielhuasema, malha ctonac melhma, acjanactema njan malha acto nac zafiro, cacpota njan alietectema malha ctonac talha aimenec azufre. Apqatco'oc alhtoca etanlheng malha meiwa', apuajeioc alhta alenteiapma talha, eten, cacpota njan talha aimenec azufre, nquennapque lhta enenlhet'awoc lhema necja
lhepop lhmanquec jam aniem'o m'a tres caselha nengai'o.
18
19
Nnangque lhta etanlheng apquenmopuanca'a aniem'o apuajeioc cacpota njan apiepaquio'oc, malha lhta menasma nac aipaquiec apiepaquio'oc ma'a, anmoctai'a alhta mota enenlhet'awoc ma'a.
20
Coca apquellelto lhta meletsepma aniem'o aquientalhnema nac, malhtoca ellanocjac apualho'oc ma'a, ngjeclhe lhta apqueltacnescasecamoc queliacjamei'oc cacpota njan caselha aquiocja la alanemmalhca alienmoma oro plata, bronce, metaimong cacpota njan iamet necja'a, mangcomowana nac ngcota lhma, ngconnac najan, mangcomowana ngcolhong najan caselha aquiocja nac ma'a.
21
Coca ngcacjoc meluatesaiangcoc meliamolhma enenlhet'awoc anac ma'a, ngjeclhe lhtoca apquennapecamoc po'oc, ngjeclhe lhta njan aptaicamoc apqueliolhma meliamolhma, cacpota njan apquenmensanweiam alhma, apquenmenielhma njan ma'a.