8
1
Netamen asuet'o mocjom nepquesec apquetcoc apmaiesecja septimo nema aliepetquescama, mpelapcasque lhta metca aquiennoma lhma lhmangquec jam acuacmo treinta minutos.
2
Netamen asuet'o nema allaicamoc 7 trompetas 7 enenlhet neten alhta aquiet'o m'a napaqtec Engiapom Neten.
3
Apuo'o lhta mocjom lhema enenlhet neten apsoiam lhta netsoma atcoc alienmomo nquec, ancoc nema aluanlhema la panactema awa', apquenenwa'a alhta m'a aquieto anmelhacja aluanlhenmalhquelha caselha, alienmomo nque lhta m'a, aquieto naqtec Nema Actanema. Nne lhta allanconwacmo nquescama panactema awa' aluanlhenmalhca ancoc cacpota enquecsec Engiapom Neten, cacpota njan enquesec apquelelmalhnoncoma Engiapom Neten apquennemolhema.
4
Ngquenmacje lhta neten eten acpasmecja apquelelmalhnoncama Engiapom Neten apquennemolhema aquiet'o m'a napaqtec Engiapom Neten.
5
Netamen enenlhet neten apquenmo lhta melhma aquiet'o m'a aluanlhenmalhquelha caselha, apnactemo m'a netsoma atcoc lhec, aclanei'o nque lhta m'a. Netamen apalesanca lhta m'a tacjalhet lhepop lhmanquec jam, mpelapcasque lhta acuo'o apquelhtengioma aquiennactema ngquec, apquelienmoma njan cacpota njan lhepop aquieujecama aquiawai'a nquec.
6
Netamen 7 enenlhet neten alhta apquelpenesawec trompeta apancoc cacpota elpaiwacsec.
7
Netamen apaiwaso lhema m'a, mpelapcasque lhta acpallantamo ajecjo'oc cacpota njan talha, nema ancaiecja ema tacjalhet lhepop, mmetque lhta lhema necja m'a
, cacpota njan lhema necja iamet
, cacpota njan lhamacjo panactema allielsellemo.
8
Netamen apaiwaso mocjom trompeta segundo enenlhet neten, acpelapqueso nemo aquiengioiam malha lhienep acjaiam aquiawai'a aquieplomo talha aquiet'o m'a aluata', ntacje lhta lhema necja
iemmen ema.
9
Nqueletsepque lhta njan ma'a lhema necja
alloma la nemmen cacpota njan loma nemmen
.
10
Netamen apaiwaso mocjom trompeta tercer enenlhet neten, mpelapcasque lhta apteianmo lhema apiau'a apiawai'a aquieplomo talha, malha lhta nta ctonac iamenaicamoc aquiawai'a, nteiacme lhta tacjalhet lhema necja
aluata cacpota njan sanga.
11
Apuesai'a lhta m'a iau'a apmopasca, acmasca lhta ntac lhema necja
iemmen, aplhanie lhta apquelletsepma enenlhet'awoc aniem'o apiennaicamoc ma'a.
12
Netamen apaiwaso mocjom trompeta cuarto enenlhet neten, aptewasque lhta lhema necja
acnem, pelten cacpota njan iau'a, ca apienacteso lhma lhema
necja acnem anquec cacpota njan pelhasep.
13
Asuet'o njan lhema mama' aplau'a m'a netnec anque, lhta aptac apiennacteso apaioma:
—¡Jai, enenlhet'awoc la ie', ngcaimelhquec tres actaiecjo apquelpaiwascama trompeta enenlhet neten, netamen jata m'a ngcowac aquiawai'a ngquec aquientalhnema m'a!—lhta aptac mama' m'a.