26 ¹ Ca apeneso lhta Jesus apquetlhecmoscama apqueltamesaicamoc ma'a, lhta ptac apquellano: ² —Apquelliawec quetlhencap janet acnem ncaimelhcac altammalhquelha nac actacmelaicama lhma Pascua, ncolhec jata anconwacmo Enenlhet Apquetca cacpota ncolhec aliaqlho apmeioc apmancoc neten iamet actennescama— lhta ptac Jesus. ³ Ca apcaqnecjo lhnac ma'a apquelemjama apmaniaie sacerdotes, cacpota njan apquellelto apquelemjama apmaniaie apquellawacja, conne aquiawai'a pa'at apnemacja Caifas sacerdote apuesque, ⁴ apquelleltemawec nac etselhnanac Jesus ma'a, lhnac ania'a m'a apquelleltemo eltejec apquenmopuanca ania'a cacpota elpatjetec, ellaqjec na Jesus ma'a. ⁵ Coca lhna aptaiancoc napocja enenlhet'awoc: —Ma, jawe ta antancoc necsa actacmelaicama lhma' nac, angeliasancoc quelha lhma enenlhet'awoc— lhna aptaiancoc ma'a.

Nqueluana atsesquescama aimes apqatec Jesus

⁶ Apnacje lhta Jesus ma'a na temma Betania, Simon apnemacja, mo'oc nema altema leproso. ⁷ Necsa aptaweicocja lhta m'a, acuo'o lhta lhema nqueluana acsoiam najaicoc alabastro acmases aimes acmennawe ncoie'. Actetesco'o lhta apnacja Jesus ma'a, aquianquenuo'o lhta apietsecsec ma'a. ⁸ Nquennatjesque lhta apqueltamesaicamoc apqueluet'o m'a, lhta ptancoc: —Ntewasque nac acmases aimes acmennawe nque nac, ⁹ ntasec lhec niecje ncotengiac aquianmoma nquescama patacom cacpota ncollanconwomoc metca apquelletsecama nac—lhta aptancoc ma'a. ¹⁰ Apleng'a lhtoca Jesus ma'a, lhta aptac apquellano apqueltamesaicamoc ma'a: —Metlhenama nqueluana nac, ntasec anque actacja jelanei'o. ¹¹ Njeclhec jatoca ncotnec apcacjaicamoc metca nac apquelletsecama jenque'e, molhec jatoca co'o jenque'e apiesecsec quetlhencap. ¹² Coca nqueluana nac aquianquenuo'o nac asiocja acmases aimes , mpenesawec alanei'o asiocja amanie ta nema jepeccanwecja ejapac ma'a conne metaimong alhua. ¹³ Jawe ngiapac anque acmac'acja ta ncolhenalhcac ania'a actacmanma, ncotlheianwacjo ta mota apualho'oc enenlhet'awoc nqueluana nac aniem'o actacja nac jelanei'o—lhta aptac apquellano Jesus apqueltamesaicamoc ma'a.

Judas apselhnanoncoma Jesus

¹⁴ Lhema apjapac alhta apiesecsec anac ma'a 12 apqueltamesaicamoc, Judas Iscariote lhta apuesai'a, apmeiacjo lhta apcacjanquelha apquelemjama apmaniaie sacerdotes, lhna aptemac apquellanemo m'a: ¹⁵ —¿Se lha patacom jellancoc aquianmoma aspasmoma apatjetec Jesus, je?—lhna aptemac Ca apquellaianco lhnac ma'a 30 aliaquiema alienmoma plata. ¹⁶ Ca apquempai'o lhnac Judas apqueliaicama actacmelacja la ncolhec acpatjeto Jesus ma'a.

Apquetsewascamo lhemec Jesus apqueltamesaicamoc actacmelaicama lhma pascua.

¹⁷ Ampacjasecja lhta aclhengama acnem actacmelaicama lhma Pascua m'a, aptommacpelha lhta mota alena apquelquenammap ¹ ma'a, lhta aptancoc apqueltamesaicamoc apquellano Jesus ma'a: —¿Co la apqueltacja angellanenwacja angelpeneso nentoma actacmelaicama lhma pascua, je?—lhta aptancoc ¹⁸ Ca apquellatemmonca lhta Jesus, lhta aptac: —Enmeiacja na temma nac ja'e, eleliama ta njan nentema emmo'oc anac, jata etnancoc ellanac ma'a: " Ncanquetquec nac lhec acnem apancoc jengetlhecmoscama, apqueltawec lhec jentawocjac lhemec apnemacja lheiap nentoma pascua ancoc" jata etnancoc ellanac ma'a. ¹⁹ Ca apquenmeiacjo lhta m'a, apquelieplaucasque lhta aptacja apaioma Jesus apquelleltennascama, apquelpeneso lhta m'a nentoma pascua ancoc. ^{20 21} Pelhasep alhta ptac ma'a, aptawocjo lhta lhemec 12 apqueltamesaicamoc Jesus ma'a, lhta aptac apquellano: —Jawe ngiapac anquec, lhema pjapac jata apiesecsec anac quetlhencap jeianconwomoc jata apquellelto nac jellammelhmacja — lhta aptac ²² Aiosac'ac anque lhta ntancoc apualho'oc ma'a, ca apquelelmalhnenca lhta Jesus: — Apuesque ¿Jawe nlho co'o m'a, je?— ²³ Ca apcatemmonca lhta Jesus ma'a, lhta aptac: —Lhema pjapac ascancaianco nac lhemec pan apjac au'alhoc anac, jata etnec jellanconwaiam jellammelhmacja. ²⁴ Ca ntemac ma'a actalhesammalhca nac ania'a lhennenga aclheianma acmac'acja ta ncotnec apcaniemjaicama Enenlhet Apquetca nac. Jai', enenlhet laie' apto apselhnanoncoma m'a, ntase lhta niecje metiemec ma'a au'alhoc anquen enenlhet anac—lhta aptac ma'a. ²⁵ Coca Judas apto lhta apmajai'a eselhnanac Jesus, lhta aptac apquenmalhnenca: —Jengetlhecmoscama ¿Jawe nlho co'o m'a, je?— —Jai, lheiap ma'a— lhta aptac apcatemmonca Jesus. ²⁶ Necsa aptaweicocja lhta m'a, apmo lhta pan Jesus ma'a, apto lhta njan gracias Engiapom Neten, ca apqueliapto lhta, apquellanco apqueltamesaicamoc, lhta aptac: —Enma, etawamoc pan anac acto ejepetec jam— lhta aptac ²⁷ Netamen ma'a apmo lhta njan lhema najaicoc vino, apto lhta njan gracias Engiapom Neten, apquellanco lhta njan apqueltamesaicamoc ma'a, lhta aptac apquellano: —Einamoc na jenque'e vino nac, ²⁸ coca acto ema ejencoc jam, Engiapom Neten apqueltawec ncoitec lhema apaioma alhnancoc ² , ca jeng ema nac aquianquenammalhca ta cacpota nconmasquesquesec apqueltemacja ncollatsecama enenlhet'awoc lhmanquec jam. ²⁹ Actacja nnelha njan asiamo lhemec vino quetlhencap, jatoca ainecjoc mocjom lhemec vino alhnancoc ma'a acuo'o ta acnem aptaiecja apuesque Tata, jawe ngiapac anquec actacja nac aspaioma —lhta ptac Jesus. ³⁰ Ca apquennecmasenco lhta salmos ma'a, netamen apquenmeiacjo lhta lhienep acjaiam Olivos, ³¹ lhta ptac Jesus apquellano apqueltamesaicamoc: —Nietnec actalhesammalhca ania'a lhennenga aclheianma: «Anwaqjec jata apto apquellanecama nepquesec, elhpaqnec jata apnaqtoscama» ³ Jai', jawe ngiapac ma'a, engielhpaqnec jata, eliengiecjac jata quetlhencap pelhasep anac. ³² Coca jetnescasacjo ta mocjom Engiapom Neten ejalhnancoc apiesecsec apquenmasquenwaiacmo, jata angaqnecjoc mocjom ma'a aquieto Galilea—lhta aptac Jesus apquellano apqueltamesaicamoc ³³ Coca lhta aptac Pedro: —Ca apqueliengiacjo la aplhamacjo nac, co'o coca moiengiecjec lheiap—lhta aptac ³⁴ Coca lhta aptac Jesus apcatemmonca Pedro: — Ca pelhasep anac, amanie acpaiwoma tape'e, janetolhem'a ta ncotnec aplheianma manjeiecpelquema lheiap, jawe ngiapac anquec ma'a—lhta aptac. ³⁵ Coca lhta aptac Pedro apcatemmonca mocjom: —Monwapuanquec jata co'o alhenec moiecpelquema lheiap, ngcaqjoc jellaqjo la lhemec lheiap— lhta ptac Pedro m'a. Lhta njan aptancoc aplhamacja apqueltamesaicamoc apquelpaqmeiasma aptacja Pedro m'a.

Apacmetquescama Jesus Engiapom Neten

³⁶ Ca apmeiacjo lhta Jesus cacpota njan apqueltamesaicamoc iocjalhma acuesai'a Getsemani, lhta aptac Jesus apquellano apqueltamesaicamoc: —Engiacjamoc secjec jenque'e, asmac'ac aniacjac co'o ja'e, Engiapom Neten asmac'ac apacmetquesec ma'a—lhta aptac ³⁷ Ca apqueliantemacjo lhta Pedro cacpota njan apqanet apquetcac Zebedeo ⁴ , aiosec na ntemac apualhoc Jesus ma'a, awanjec anquec na aquiaqjapma apualhoc, ³⁸ lhna aptemac: —Aiosec co'o ewalhoc, malha atsepma ntac ewalhoc. Engiacjamoc jenque'e, menacten anque' —lhna aptemac. ³⁹ Ca aplhengamo lhnac tep atquetsec ma'a, apqueltanentamo lhnac aptapno'oc nalhepop acuacjo napa'at nac aptemac apteclheclhema nalhepop, lhna aptemac: —Tata, asqueltawe niecje jetepcacsec aquientalhnema aslengaianco acmac'o na ncowac, coca ntasec apqueltacja la ncotnec lheiap—lhna aptemac. ⁴⁰ Ca aptaqjemo lhnac mocjom neptamen ma'a apcacjanquelha apqueltamesaicamoc lhec, apqueluetanwecjo lhnac apnacteianmo m'a, lhna aptemac Jesus apcanemo Pedro: —¿Mai'e ncollapuanac menactenec iacuatacjo la'a, je? ⁴¹ Menacten, elelmalhnama Engiapom Neten cacpota ellapuanac eliecac aquientalhnema nac ncanquetua'a ie. Apquenmac'awe niecje eliennac quetlhencap, mancollapuanquec coca eltejec apiempeioc apancawe nac —lhna aptemac Jesus. ⁴² Ca apmeiecjo lhnac mocjom Jesus cacpota epacmetquesec Engiapom Neten, lhna aptemac: —Tata, aimelhco la aquientalhnema ncowac tecjelhet co'o, aliejecjoc jata apmac'acja la etnec lheiap— lhna aptemac Jesus ⁴³ Ca aptaqjemo lhnac mocjom Jesus apcacjanquelha apqueltamesaicamoc ma'a, apqueluetanwecjo lhnac mocjom apnacteianma aniem'o apqueliampai'a. ⁴⁴ Ca aptaqjemo lhnac mocjom ma'a, janetolhem'a lhna nwaiacmoc apqueltaqjenwecja Jesus ma'a apacmetquescama Engiapom Neten, njeclhec nac aptemac apaioma Jesus. ⁴⁵ Ca aptaqjemo lhnac mocjom apcacjanquelha apqueltamesaicamoc, lhna ptemac apquellanemo: —¡Njeclhe na apnacteno! Nwacmec hora ncolhec jata anconwacmo Enenlhet Apquetca enenlhet'awoc anac meliamolhma. ⁴⁶ ¡Enaclhatacja', noc! Aplhecmec ja'e apto apmajai'a jeselhnana'—lhna aptemac. ⁴⁷ Njeclhec nac apqueltennaicama Jesus, ca apuecjo lhnac Judas ma'a apto lhema apqueltamescama Jesus apiesecsec 12, apentelhe lhta apquetlhelhma'ac ma'a, iamet cacpota njan pelletaw apmeio'oc, apquelanma apmania ie sacerdote lhta cacpota nja apquelanma apmania ie apcacjaianquelha apquellapascama m'a. ⁴⁸ Aplheianmec nac secjec Judas apto apselhnanoncoma epetsesec apmalhempenec Jesus, cacpota eliecpelcoc apquetlhelhma'ac ma'a, cacpota elpatjetec najan. ⁴⁹ Ca aptetesco'o lhta Judas Jesus ma'a, lhta aptac: —Lheiap anac jengetlhecmoscama— Ca apetseso lhta apmalhempenec ma'a. ⁵⁰ Coca lhta ptac Jesus apcano: —Etnec lhe' apmac'acja la elana' lheiap —lhta aptac. Ca apquelpatjeto lhta Jesus ma'a. ⁵¹ Aplecuacjo lhta njan pelletau apuenactema apancoc lhema aplhelhma Jesus ma'a, apcanco lhta apaicoc lhema apquennencasecama apquemjama apmanie sacerdote m'a. ⁵² Coca Jesus lhta ptac apcano: —Engiatquesecja alhancoc pelletau apancoc anac, enenlhet apquennapommap aquieplomo pelletau, ematong jata njan pelletau ma'a. ⁵³ Ewanque niecjec co'o atengia' jepasmoma Tata, colhuawe niecje ellapacsec apentalhnema ⁵ quempocjacme Enenlhet Neten cacpota jenmeiwoc. ⁵⁴ Coca asto la jeng, mancotnec jata actacja actalhesammalhca ania'a lhennenga, actemacja alhenammalhca co'o—lhna aptemac Jesus apcanemo enenlhet anac. ⁵⁵ Ca apquellan'o lhta Jesus aplhamacjo enenlhet'awoc ma'a, lhta aptac: —Jawe co'o enenlhet meijamolhma ¿Selha ntac apquetlhecmo nac jelquetansema aquielpomo pelletau, cacpota njan iamet apmeio'oc, je? Lhamacjo acnem aniecje asnema apiesecsec quetlhencap asquetlhecmoscama aquieto Engiapom Neten apnemacja, coca manjelpatjetmac ma'a. ⁵⁶ Ntec colhuawe nac lhamacjo apquetlheianmo lhnac nanec secama ania'a jetlheianma aquietnemo nac waccajac ania'a lhennenga—lhta aptac Jesus ma'a. Colhuawec anquec lhta apquengiancoc apqueltamesaicamoc ma'a, lhepquennenga lhta apcaimecpoc Jesus ma'a apiesecsec enenlhet apquelelto lhta apquelpatjetma.

Nema aquiantemecja Jesus napaqtawec apqueluescai'e apquelientalhnemo

⁵⁷ Nnenquec nac aquiantemecjo Jesus acuacjo aujac pa'at apquemjama apmanie sacerdote apnemacja Caifas. Apcacnecjec nac ma'a jengetlhecmoscama jenganemacja Moises, cacpota njan apquelemjama apmania ie apquellawacja. ⁵⁸ Apquelielhanmeiacmec noca Pedro m'a apquemjaianca Jesus, ca apquemjaseianca lhnac na apaqtec apmaianquelha m'a, ca aptalhnenwaiacmo njan ma'a, apnaiacmo lhnac lhemec apiesecsec soldados cacpota elanama acmac'acja ncotnec ma'a. ⁵⁹ Sacerdotes apquelemjama apmania ie cacpota njan lhamacjo apquelemjama apmania ie apquelientalhnacja, apqueleliaianca lhnac enenlhet aptaicamoc la apquenmopuanca'a ania'a cacpota etselhnanac Jesus cacpota ematong ma'a. ⁶⁰ Aplhameianquec nac enenlhet apqueluaiam aquieplomo apquenmopuana ania'a, mang noca nconmopuanca'ac etselhnanac ma'a. Ca apqueluecjo lhnac na apcanet enenlhet mocjom ma'a, ⁶¹ lhna aptaiancoc: —Ca enenlhet anac jam aplhenque lhta etuacsec Engiapom Neten apnemacja, cacpota elanecjac mocjom alhnancoc acuacmo janetolhem'a acnem—lhna aptaiancoc ma'a. ⁶² Ca apquenmecjo lhnac neten apquemjama apmanie sacerdote m'a, lhna aptemac apcanemo Jesus: —¿Aplengai'a i'e aplhenammap? Eniatemmomanojo—lhna aptemac ⁶³ Man noca engiatemmoicama Jesus ma'a, lhna aptemac mocjom apquemjama apmanie sacerdote: —¿Lheiap ai'e Cristo, je? Elhenno jawe ngiapac napaqtec Engiapom Neten apto menietsepma—lhna aptemac. ⁶⁴ Ca apcatemmoianca lhnac Jesus ma'a, lhna aptemac: —Jai co'o, aplheno nac lheiap, quetsec ncaimelhcac acnem eluetac jata quetlhencap Enenlhet Apquetca apnema napocja aquiennacja Engiapom Neten apto acnema apmopuana, netamen elhiemoc jata m'a aquieplomo iepjopai'a neten anac—lhna aptemac apcatemmoianca Jesus. ⁶⁵ Apqueliaptemo lhnac aptalhnema apuenactema apanque apquemjama apmanie sacerdotes aplengai'o apaioma Jesus, nnatjescamawec nac na m'a, lhna aptemac: —Aptewasque nac apuesai'a Engiapom Neten enenlhet anac, mengiaimecpoc angelliama enenlhet cacpota elhenec jenque'e enenlhet anac. ⁶⁶ ¿Co la aptancolha apualho'oc atlheianma quetlhencap enenlhet anac, je?—lhna aptemac ma'a. —¡Apselhnanemmap jam, ntasec ennapoc!— lhna aptaiancoc enenlhet'awoc ma'a. ⁶⁷ Ca apquellelhpacjai'o lhnac apiemmanong napa'at Jesus ma'a, apqueltecpoianca lhnac na napa'at ma'a, ⁶⁸ lhna aptaiancoc: —Jei Cristo, eijono selha actecpongo nac que—lhna aptaiancoc apqueluannaianca m'a ⁶⁹ Apnenquec nac na Pedro m'a aujac pa'at aquiawai'a, ca actetescai'o lhnac lhema nqueluana apquennencasecama apuesque sacerdote, lhna ntemac napaqtawec enenlhet'awoc ma'a: —Lheiap alhta njan apieplecama mota Jesus co Galilea— lhna ntemac ⁷⁰ —Ma', jawe iocjalhmec actacja nac aclheianma lheia'— lhna ptemac apcatemmoianca Pedro m'a. ⁷¹ Ca apmeiecjo apquenenwecjo nengaqtec atong nentalhnosecja Pedro m'a, acuetai'o lhnac mocjom mo'oc nqueluana apquennencasecama apuesque sacerdote, lhna ntemac allanemo enenlhet'awoc: —Lhta njan aplhelhma Jesus co Nazaret ja'e, enenlhet anac—lhna ntemac. ⁷² —¡Ma', moiecpelcac co'o m'a enenlhet anac ja'e!—lhna ptemac mocjom Pedro. ⁷³ Tep atquetsec nac mocjom ma'a, moclhem'a enenlhet nac apqueltetescai'ac na mocjom Pedro m'a, lhna aptaiancoc apquellanemo: —Jawe quelha ngiapac lheiap na aplhelhma Jesus, nnawec na apquelpaqmeiasma apaioma nac lheiap apquetlhelhma'ac anac Jesus—lhna aptaiancoc ⁷⁴ Coca Pedro apqueliennaiancawec nac apquellatemmoianca m'a, lhna ptemac: —¡Alhenocja la moiecpelquema enenlhet anac! ¡ Engiapom Neten jata eiaqmoncasecja' astemacja asto la asmopuana ania'a!—lhna aptemac Pedro Colhuawec anquec nac mpaiwomac tape'e m'a, ⁷⁵ ca aclheianwecjo lhnac apualhoc Pedro actacja lhta apaioma Jesus: —Janet'olhema ta ncotnec melheianma manjeiecpelquema co'o amanie acpaiwoma tape'e—lhna ntemac aclheianwecjo apualhoc Pedro apaioma lhta Jesus. Ca apteiapmo Pedro m'a, man na nquescamac apuenemo m'a.