25
Jesus apietquescama diez nqueluana' atco'oc
1
—Jata ncotnec apuactamo ta Engiapom Neten aptaiecja apiau'acja apuesque malha asietquescama asmac'o nac alleltennacsec quetlhencap.
Diez nqueluana' atco'oc anac anmaicocjo lhnac talha alhanco'oc, ca allanielhaianco lhnac ma'a apoquenammap aliemjapma.
2
3
4
Cinco lhnac na nema alliamo alpenescamo botella aimenec talha alhanco'oc anco'oc, cacpota njan 5 lhnac na mancolliamo m'a, mancolpenescamo botella aimenec talha alhanco'oc.
5
Ajolhec na ntemac alleljalhanma apoquenammap aliemjapma m'a, ten nac nquennapmac ma'a, ca acnaqteianwecjo lhnac ma'a.
6
Ca acnemo lhnac acueneianca neplhet pelhasep ma'a, lhna nnema actemo m'a: "¡Apquelhiacmec apoquenammap aliemjapma ja'e, colentep collanielhamoc jata!" lhna nnema actemo m'a.
7
Colhuawec anquec nac naclhatecjaiancoc ma'a, anmajai'o lhnac ncollanocjac talha alhanco'oc anco'oc ma'a.
8
Coca cinco nqueluana'ac lhec mancoliamo alpenescamo aimenec talha alhanco'oc lhna antaiancoc:
"Mmac'a ncotsepanac talha alhanco'oc enganco'oc, jengellamoc no quetsec aimenec" lhna ntaiancoc ma'a.
9
"Ma', mancoluacjec quelha quetlhenca cacpota njan ennenco'o, ntase nconmeiacja coltengianwacja ncoie" lhna ntaiancoc allatemmoianca 5 nema alliamo alpenescamo lhquec.
10
Ca anmeiecjo lhnac ma'a, mpelapquescanquec nac apuai'o apoquenammap aliemjapma m'a, ca cinco nqueluana'ac lhec nema alliamo alpenescamo alentalhnemo lhnac lhemec apoquenammap aliemjapma actacmelanquelha lhma' m'a, ca acnemo lhnac na apecjo atong ma'a.
11
Netamen aluacjo lhnac na mancolpenescamo lhquec ma'a, aluetanwecjo nema apecja atong, ca alueneianca lhnac ma'a, lhna antaiancoc:
"¡Apuesque, apuesque, jengenmaiesques no atong!" lhna ntaiancoc ma'a
12
"Ma', moliecpelcac co'o quetlhengca, jawe ngiapac anquec astacja nac" lhna aptemac apcatemmoianca m'a
13
Ca apeneso lhta apietquescama Jesus ma'a, lhta aptac apquellano apqueltamesaicamoc:
—Ca acto nac quetlhencap ncaimelhquec elpenesoc na eleljalhnamaja, ncanec mamma aquiojo acnem apuectanlha ta—
Apietquescama Jesus nema acmacmesaicama apjalhemmap
14
— Jata ncotnec apuactamo ta Engiapom Neten aptaiecja apiau'acja apuesque malha asietquescama asmac'o nac alleltennacsec quetlhencap.
Ca apmajai'o lhnac elhong enenlhet ma'a, apquellaweianca lhnac apquenmacmesaicama cacpota eltacmelquesquesec pataccom apancoc.
15
Lhema apjapac nac apcaiancoc 5 mil patacom aliaquiema, po'oc nac na 2 mil patacom aliaquiema, cacpota njan po'oc mil patacom aliaquiema. Apiamawec nac apuesque nnawec apiempeioc apquenmacmesaicama, lhna ncanec apquellaianco patacom apancoc, ca aplhengamo lhnac ma'a.
16
Apmacmesaicama aplhewai'a lhquec 5 mil patacom aliaquiema, ca apmacmesaianca lhnac patacom ma'a, apnacsepmec nac mocjom mo'oc 5 mil.
17
Nnawec nac na po'oc, apmacmesaianca lhnac 2 mil patacom aliaquiema, apnacsepmo njan mocjom mo'oc 2 mil patacom aliaquiema.
18
Coca apto lhnac aplhewai'a mil patacom aliaquiema, apquelposcamo lhnac apmetenquescamo malhec apquelcatonnema njan ma'a.
19
Lhennenga lhna ntemac apuecjo mocjom apuesque apanco'oc ma'a, apmajai'ac nac ellanescasecjac apquenmacmesaicama pataccom alhta apquellaicamoc ma'a.
20
Apmanie lhnac apuecjac aplhewai'a 5 mil patacom aliaquiema, lhnac aptemac: "Apuesque, ema 5 mil patacom aliaquiema nac jeiaicamoc alhta, ca mo'oc 5 mil jenque'e
asnacsepma lhta" lhna aptemac apcanemo.
21
"¡Jai', ntasec nac aptemacja lheiap! Aptase panque nac lheiap asmacmesaicama, apuanque nac lheiap etacmelquesec quetsec ascaicamo lhta, coca colhuawe nac atnesquesec jata apquemjama apmanie aclhamacjo caselha ejenco'oc, angeletsewasoc jata" lhnac aptemac apuesque apcanemo.
22
Ca apuecjo lhnac na po'oc apmacmesaicama, aplhewai'a lhta 2 mil patacom aliaquiema, lhna aptemac:
"Apuesque, ema 2 mil patacom aliaquiema nac jeiaicamo lhta, ca mo'oc 2 mil jenque'e asnacsepma lhta" lhna aptemac ma'a.
23
"¡Jai', ntase nac na aptemacja lheiap! Aptase nac na lheiap asmacmesaicama, apuanque nac na lheiap etacmelquesec quetsec ascaicamoc alhta, coca colhuawe nac atnesquesec jata apquemjama apmanie aclhamacjo caselha ejenco'oc, angeletsewasoc jata" lhna aptemac apuesque apcanemo.
24
Ca apuecjo lhnac po'oc apmacmesaicama aplhewai'a lhta mil patacom aliaquiema m'a, lhnac aptemac: "Apuesque, asiawec co'o lheiap apto jengiatecamo mota, apqueltawec angellanjoc nemacmecama aquientalhnema nquec la'a.
25
Ca ascai'o nac co'o m'a, asquelposcamo patacom apancoc conne malhec cacpota mancotlhenme' ¡Ema pataccom apancoc alhta jeiaicamoc!" lhna aptemac.
26
Ca apcatemmoianca lhnac apuesque, lhna aptemac:
"Lheiap apto asmacmesaicama meijamolhma, apjalhemmap. Apiawe lheiap astemacja asiatecamo mota emacmama, aquientalhnema njan.
27
Ntase lhta niecje etsacjac pataccom ejencoc banco cacpota ncoiawancoc ma'a" lhna aptemac apuesque.
28
Netamen apuesque m'a lhna aptemac apcanemo apmacmesaicama aptemo lhemec ma'a:
"Eleccasecja mil pataccom aliaquiema lhquec jenque'e, engiancoc jata ja'e 10 mil lhec apnaqsepuaiacmo.
29
Aquietno la actacmanma apmacmecama enenlhet, ncolhec jata anco aquiawai'a caselha actacmanma, ncoitec jata njan aquiecanweiacmo aimommalhca m'a. Coca aquietno la mancotacmanma apmacmecama enenlhet, ncolhec jata aljatsoscasacjo quetsec anquec la aquietnema caselhaja.
30
¡Eliengiecja iocjalhma asmacmesaicama nac memopuana lhquec emacmamaja! Jata ncopelhcama apiempec ma'a, ewenec jata njan aquienaqtesacja na lhma" lhna aptemac apuesque.
Nema aliequiesecja apqueliamolhma, meliamolhma
31
—Jata apuactamo ta Enenlhet Apquetca ncoiepleujoc jata apcaponmatema, cacpota njan apquetlhelhma'ac aplhamacjo Enenlhet Neten, elhec jata aptanema cacpota etnec apuesque apientalhnemo m'a.
32
Eluacjac jata enenlhet'awoc ma'a apquelleniem'o lhmanquec jam, engielhpanquesec jata m'a malha apquellanecama la nepquesec engielhpanquesec nepquesec cacpota njan ieta'ai.
33
Nepquesec eliacsec jata aquiennacja apoctong, coca ieta'ai eliacsec jata aquieto sancaluelha.
34
Jata etnec ellanac apiau'acja apuesque apquellelto apcacjenweiam aquieto aquiennacja apoctong:
"Elelhiem quetlhencap jalep apquellelto nac altacmanma apquellaniemjaicama aniem'o Tata, etlhewancoc jata caselha alientalhnemo apquelpenesquescamo lhnac na nec, amanie apquelanai'a secjec anquec lhnac na nec alhma nquec jam.
35
Ncanec jeiaqja lhta mec, jellanque lhta astoma. Cnem alhta jeiaqjac, jellanque lhta njan asiama iemmen. Asmeiacje lhta njan mo'oc necja, jenmec alhta tacja quetlhencap apcacjaianquelha.
36
Mamma lhta asquelentalhnema, quetlhencap alhta jellancoc squelentalhnema. Nemmasquema lhta jeiaqjac, jeltacmelcasque lhta. Cacpota njan asne lhta nengaclhencasemmalhquelha, amaica'a lhta jetnancoc asnacja m'a" jata etnec ellanac Enenlhet Apquetca nac ma'a.
37
Coca jata etnancoc apquellelto apquelpeiwomo:
"Apuesque, mancotlheianwacjo enwalho'oc ennenco'o neluetai'o aqjema mec lheiap, cacpota jan acnem aqjema, nengellaianco lhta aptoma cacpota njan apiama lheiap.
38
Mancotlheianwacjoc na engellualhoc ennenco'o nelluetai'o jentaianco amaica'a, nenmamo njan tacja m'a. Mang na ncotlheianwacjoc engellualhoc nelluetai'o aptemo metca aptalhnema, nellaianco njan lheiap aptalhnema.
39
Mancotlheianwacjoc na engellualhoc nelluetai'o aqjema nemmasquema, nlhoca la njan apnemo nengaclhencasemmalhquelha, cacpota njan nentaianco amaica'a" jata etnancoc apquelpeiwomo m'a.
40
Coca jata etnec ellatemmoma apiau'acja apuesque:
"Jawe ngiapac anquec asmac'acja nac atnejec, apquelpasme lhta quetlhencap elialheng'a apquellelto apquellomacja apancawe', nnawec na malha jelpasmoma co'o m'a —jata etnec ellanac apiau'acja apuesque m'a.
41
Coca netamen apiau'acja apuesque jata etnec ellanac enenlhet'awoc apquellelto apcacjenweiam sancaluelha:
"¡Jeliengiecja! Nquelietawec quetlhencap etlhewancoc nema aquiacmoncasecja meliamolhma, enmamoc ja'e aquieto nac ncospaneiacja talha nema alpenesquescamo m'a cacpota njan ncoliengiolhcac queliacjameioc ma'a cacpota njan Enenlhet Neten anco'oc atlhelhma'ac.
42
Ncanec mec alhta jeiaqjac, ma lhta jellancoc astoma. Cnem alhta jeiaqjac, ma lhta jellancoc asiama iemmen.
43
Asmeiacje lhta mo'oc necja, ma lhta jenmac tacja quetlhencap apcacjaiancolha m'a. Mamma lhta asquelentalhnema, ma lhta jellancoc ma'a. Nemmasquema lhta jeiaqjac cacpota njan asne lhta engaclhencasemmalhquelha, ma lhta jetnancoc amaica'a" jata etnec ellanac ma'a.
44
Coca jata etnancoc na ellatemmoma apquellelto apcacjenweiam sancaluelha:
"Apuesque, mancotlheianwacjo enwalho'oc ennenco'o nelluetai'o aqjema mec lheiap, cacpota njan cnem aqjemac njan, metca apquelentalhnema, aqjema nemmasquema, apnema nengaclhencasemmalhquelha, ca mongelpasmomo nac lheiap ma'a" jata etnancoc ma'a.
45
Coca jata etnec ellatemmoma apiau'acja apuesque m'a:
"Malhta elpasmac quetlhencap apquellomacja apanque' nac enenlhet'awoc, nnawec na mangjelpasmomac co'o" jata etnec ellanac ma'a.
46
Netamen enenlhet'awoc anac ncolhec jata aliaqmoncasquesacjo apqueltemacja meliamolhma mancotnenwaianlha nnelha, coca apquellelto apquelpeiwomo etlhewancoc jata aliennactema apnengio'oc mancotnenwaianlha nnelha—