11 1 Ca apeneso lhta apqueleltennasecamoc Jesus 12 apqueltamesaicamoc ma'a, aplhengo lhta apquelpaieso njan ania'a actacmanma lhamacjo apquellawacja nac ma'a.
Juan apquelapascama apquelieplecama elpacmetquescamo Jesus
2 Apnenquec nac Juan apquellauquescama iemmen na ngiapom nengaclhencasemmalhquelha, aplengai'ac na sonquec ania'a lhamacjo aptemacja caselha apquelanai'a Cristo, apquellapascamo lhnac apquelieplecama apnacja m'a, 3 lhna aptaiancoc apquelelmalhneianca: —¿Lheiap anlho enenlhet aplheianmo lhnac nanec engiapacsec Engiapom Neten, nlho ca la angellailhec po'oc, je? —lhta aptancoc ma'a 4 Ca apquellatemmonca lhta Jesus ma'a: —Eltaqjo ta apnacja Juan, eleltennasama ta ania'a actemacja mota acuetammalhca, 5 apqueluetecje lhma metca apaqto'oc, nqueltacmelacjec na apquetlhengama apqueliaqteicamaja, apqueltacmelacjec na actepelcammalhca apiempeioc (LEPROSOS), apquellengacje lhma metca apaico'oc, nnec altemesquesacjoc apjalhnancoc apquenmasquenwaiacmo, mpaiesalhquec na ania'a actacmanma apiesecsec enenlhet metca nac apquelletsecama m'a. 6 Acpaijacjo nac apualhoc enenlhet metacnoncoma la njan asuesai'a apuetai'a lhamacjo caselha asquellanai'a—lhta aptac Jesus apquellano m'a. 7 8 Ca apqueltaqjo lhta apnacja Juan apquelieplecama m'a. Netamen ma'a apquelelmalhnenca lhta Jesus enenlhet'awoc ma'a actemacja aplhenammap Juan, lhta aptac apquellano m'a: —¿Co la lhta actemacja apualho'oc quetlhencap apquellanemacja elhoc Juan necsa apquenmajai'a eluetac ma'a metquelha temma, je? ¿Apquelieujecama panque nlho lhta m'a malha acto nac ocja la'a aquieujesaicama la alhcaiam? ¿Nlho ca la enenlhet apmennawe nac apquelentalhnema i'e? ¡Mma! Enenlhet apto la apquelentalhnema apmennawe panque nac aploca mota m'a conne apnemacja nac apuesque. 9 ¿Co la lhta actemacja apualho'oc apquellanemacja elhoc quetlhencap Juan? ¿Engiapom Neten secama ania'a apanco i'e, je? Jai', jawe ngiapac ma'a, Juan apto neten anquec apiaspommap apiesecsec apquetsecama ania'a. 10 Juan nan ma'a aclheianmo lhnac nanec Engiapom Neten apaioma, lhnac nanec ntemac: «Anwapacsec jata secama ania'a ejencoc apmanie lheiap cacpota epenescasoc amai apancoc» 1 lhnac nane ntemac ma'a. 11 Jawe ngiapac anquec, Juan apto neten apanquec apiaspommap apiesecsec enenlhet'awoc jenque'e, coca m'a apiesecsec anac Engiapom Neten apquellasennaicama apnec meiennactema njan ma'a, coca neten apanquec mocjom ma'a, meieca'ac Juan ma'a. 12 Ampo'o apuai'a Juan acuacmo nenwanlha nac enenlhet'awoc apquenmaicama nac apqueliennactema apquenmajai'a ennactewacsec apmajai'a etnecjac apuesque Engiapom Neten jenque'e. 13 Apquetlheianmec nac nanec apquetsecama ania'a nnenga cacpota njan jenganemacja Moises ncowac jata acnem aptema apuesque Engiapom Neten lhma nquec jam acuacmo apuo'o Juan colhuawe nac. 14 15 Eltacmelcaso no apquellailhemo cacpota elliojo quetlhencap, Juan apto Elias annenga actemacja lhnac nanec aplhenammap ewac ma'a 2 , meliasquem anquec astacja nac alheianma. 16 ¿Sec la alietquesec enenlhet nenwanlha nac que? Malha niecje nematcac apquennaiwoma nac naiwommalhquelha la'a, apqueluenema mota apqueluannama po'oc: 17 "Coca ennenco'o nelpaiwascasquec niecje iompa'at acpaiwoma, mang coca eleltama quetlhencap ma'a, nennecmasenque niecje njan nennecmascama acmaiose enwalhoc, mang coca eliepcalhac quetlhencap" ca aptaiancolha nematcac ma'a. 18 Ca aptaiancoc na quetlhencap ma'a, apqueluetai'ac Juan meujanenwaiam aquietnacja actacmelaicama lhma, metomac pan, meiamac na vino, apquetlheno njan quetlhencap queliacjameio' acmaicama m'a. 19 Netamen apuai'o njan Enenlhet Apquetca nac, apasenwacme mota actacmelaicama lhma, aptauquec na aptoma, apienquec najan, coca apquetlhenquec na meiapcanueiam etawecja, mancastengama einec, apquetlhenque mota apquelpalhacuaiam enenlhet meliamolhma cacpota njan apquenmaicamoc patacom impuesto ancoc. Niecje menmaicamoc tacja quetlhencap ma'a, alhaiec jatoca eluetac actemacja apquelianweiacmo m'a aniem'o Engiapom Neten 3 . 20 Apqueliamenama lhta Jesus aplhamacjo apquellawacja nac apquelanei'acja lhta mota caselha jempelapquescama, ncanec ma lhta nconmajai'ac ellanocjac apualho'oc ma'a, lhta aptac apquellano m'a: 21 — ¡Enenlhet'awoc co Corazin cacpota njan Betsaida, quetlhencap la ie'! Nlhanie caselha jempelapquescama asquelanai'a apiesecsec quetlhencap jenque'e, coca manconmajai'ac na ellanocjac apualho'oc. Lhta cno la alanenwacmo caselha jempelapquescama apiesecsec anac ma'a co Tiro cacpota njan Sidon, colhuawec anque nlho lhta ellanocja apualho'oc ma'a, ellentalhnecja lhta apquellentalhnema malha iama alhengajac apqueltaclhema engiempec, cacpota njan elelhpacjacpoc tacjaplhet'oc tajap aniem'o apquellanecja apualho'oc. 22 Jata acuacmo ta acnem nema alpeiwesecja apquellanecamoc altacmelo caselha, nlhoca la njan ncolatsecama la'a, tep anquec jata ncotnec apquellengaianco nema aquiacmoncasecja aniem'o meliamolhma quetlhencap co Corazin cacpota njan co Betsaida, aselhtec jata m'a enenlhet'awoc co Tiro cacpota njan Sidon, jawe niapac anquec ma'a. 23 Quetlhencap laie' co Cafarnaum, apquetlheianme panque' ncolhec anmo' tacja m'a neten, coca mancotnec jata, jatoca ncolhec alliengiewo' m'a aquieto malhec nema alletsepmacja. Lhta cno la njan alanenwacmo caselha jempelapquescama apiesecsec anac ma'a co Sodoma, ca acto nac jenque'e apiesecsec anac quetlhencap, mancolhec nac nanec actewasacjo m'a. 24 Jawe ngiapac anquec ma'a, jata acuacmo ta acnem nema alpeiwesecja apquellanecamoc altacmelo caselha, nlhoca la njan ncolatsecama la'a, tep anquec jata ncotnec apquellengaianco nema aquiacmoncasecja aniem'o meliamolhma quetlhencap co Cafernaum, aselhtec jata m'a enenlhet'awoc anac co Sodoma— lhta aptac Jesus apquellano m'a. 25 26 Netamen Jesus apacmetqueso lhta Engiapom Neten, lhta aptac: —Tata, lheiap aptac apuesque neten cacpota njan nalhepop, astacnescasenquec na apuesai'a lheiap ncanec apqueluetascasquec enenlhet'awoc apquellomacja apancawe nac lheiap jengetlhecmoscama apancoc, mang coca eluetascasac ma'a enenlhet nema apquelianweiacmo nac, ca apqueltema ncotnec lheiap ma'a — lhta aptac Jesus apacmetqueso Engiapom Neten. 27 Netamen lhta aptac apquellano Jesus enenlhet'awoc ma'a: —Co'o Tata jellaianquec lhamacjo caselha, mamma enenlhet eiecpelcoc Apquetca nac ma'a wanlha coca apto Apiapom apiecpelquemo. Mamma njan enenlhet apto la apiecpelquemo Apiapom, wanlha coca apiecpelquemo Apquetca apanque', cacpota njan enenlhet apqueliequiescama Apquetca nac ma'a. 28 Jeliota no quetlhencap co'o apqueliampai'a nac aniem'o apquenmacmecama cacpota njan aquientalhnema apquelpatama, allauquesquese ta apquelliampai'a. 29 Ennatnecja apiaspo'oc ejencoc anac nejecja, co'o ta atnancoc asquetlhelhma'ac, jelluanamoc astemacja momapiementa cacpota njan metca ammalhco ewalhoc, ncolelhiewecjac jata apualho'oc. 30 Alhiewai'a nquec na apiaspo'oc ejencoc anac cacpota njan nellienioscama nac—lhta aptac Jesus apquetlhecmoso m'a.
1Malaquias 3:1; Exodo 23:20
2Malaquias 4:5
3La gente no acepto a Juan el Bautista ni al Hijo del Hombre