10
Apqueliequiescama Jesus 12 apqueltamesaicamoc
1
2
1–2 Apqueliequiesque lhta Jesus 12 apqueltamesaicamoc, mo'oc nema alleltema lhta apquelluesai'a apostoles
, ca apquellanco lhta njan apquenmopuanca'a m'a cacpota elentepcasancoc casecapoc au'alhoc ncollatsecama
, eltacmelquescamoc na lhamacjo actemacja anmasca apiempeioc cacpota njan alasquelha la'a. Ca apqueluesai'a lhta jenque'e: Simon, mo'oc apuesai'a Pedro, cacpota njan apialheng Andres, Santiago, cacpota njan Juan, Zebedeo apquetcac.
3
Felipe, Bartolome, Tomas, Mateo apto lhta apquenmama patacom impuesto ancoc, Santiago Alfeo apquetca, Tadeo,
4
Simon apto lhta mota apcammelhaicama apuesque co Roma, cacpota njan Judas
Iscariote, apto lhta njan apselhnanoncoma Jesus.
5
Ca apquellapaso lhta njan elpaiacsec ania'a actacmanma, ca apquellanco lhta njan apaioma apquellascama etnancoc, lhta aptac ma'a:
—Menmamo nquec aquieto apcacjanquelha metno judios, cacpota njan aquieto apcacjanquelha m'a co samaria.
6
Coca ntasec ma'a enmancoc aquieto apcacjanquelha israelitas, ncanec malha nepquesec apquetlheneiam ma'a.
7
Elleltennes jata nwa'ac colhua acnem aptaiecja apuesque Engiapom Neten,
8
eleltacmelquescam jata njan anmasca apiempeioc, cacpota njan etnescasocjac mocjom apjalhnanco'oc apquenmasquenwaiacmo, cacpota njan eltacmelquescamoc
nemmasquema nentepelcammalhca (leprosos), cacpota njan eliengiescasecjac queliacjameio enenlhet anmaicama la'a. Metengiamo nquec patacom aquianmoma apquellanei'o apqueltacmelquescaiam anmasca apiempeioc la'a, ncanec metca apquianmoma lhta apquetlhewai'a quetlhencap apquenmopuanca'a.
9
Melletsomanquec patacom
necsa apquenmajai'a la etlhong,
10
cacpota njan aptecamoc la amai. Melletsomanquec na po'oc apquellentalhnema la'a, mo'oc apnacteto apmanco'oc, melletsoma njan apquellennaicamoc apmaniaie ncanec quetlhencap apquenma'ac enmacmamaja, ntasec ncolhec actauquesocjo apqueluanlha la'a cacpota njan etlhewancoc caselha alaimommalhquelha la'a.
11
Jata apqueluacmo ta apiau'acja la temma nlho ca la njan temma apquetcoc la'a, elquetam jata m'a enenlhet aquiamo la lhma apualhoc, eniacjamoc jata apnemacja m'a acuacmo apquellentepo na temma nac ma'a.
12
Jata apquelentalhnenwacmo ta lhema pa'at, elpaiwes jata, etnancoc jenque'e:
"Quetlhencap anac, ncowac jata metca altaicama apualhoc jenque'e" jata etnancoc quetlhencap.
13
Ca apqueliojo la lhma enenlhet'awoc anac ma'a, netamen ncowac jata metca altaicama apualho'oc ma'a, coca enenlhet meliamolhma la'a, mancoitec jata m'a caselha altacmanma.
14
Coca menmacpo la tacja m'a, nlhoca la mellailhec najan, ellelpalhnelhcama ta lhepop apmanco'oc
.
15
Jawe ngiapac anquec acuo'o ta acnem nema alpeiwesecja apquellanecamoc altacmelo caselha, nlhoca la njan ncolatsecama la'a, tep anquec jata ncotnec apquellengaianco m'a nema aquiaqmoncasecja m'a enenlhet'awoc anac aniem'o meliamolhma, mancolhno m'a co Sodoma lhnac nanec cacpota njan co Gomorra.
16
¡Ellajo ta, amosec ma'a apquenmacmecama nac quetlhencap! Asquellapasquec quetlhencap ma'a malha nepquesec la'a aisecsec meiwa
. ¡Collapuanco ta quetlhencap, ca actemo nac menasma!
¡Eltamoc jata malha conemmactec anac, apiamolhma m'a!
17
¡Ellajo ta quetlhencap! Ncolhec jata aclaclacjo napaqtawec apquelemjama apmania ie, ncolhec jata njan altecponca apcacnecjelha judios,
18
cacpota njan ncolhec aliantemacjo napaqtawec apqueluesca ie' gobernadores cacpota njan apqueliau'acja apqueluescaie
aniem'o co'o asqueltamesaicamoc quetlhencap. Jata jetlhenec asuesai'a napaqtawec ma'a cacpota njan napaqtawec enenlhet meliamolhma.
19
Coca moltama nquec apualho'oc ma'a apquenmac'acja la etnancoc apquellatemmoicama napaqtawec ma'a, Engiapom Neten jata ellancoc apquelliamo apqueltacja apquellatemmoicama.
20
Engiapom Neten Apualhoc jatoca ellapuanesquesec apquellatemmoicama m'a.
21
Ncowac jata acnem aquientalhnema, apquelialheng'a apanque' etselhnanacpoc jata apancawe, cacpota ennapecja apquelpetma' apanque', netamen ncana'ac ncotselhnanecjac jata atcac, ncoltoc jata ncolhec annapo, netamen atcac etselhnanecjac jata ncana'ac, ellaqjecjac jata.
22
Eltacnewacpoc jata quetlhencap aniem'o asqueltamesaicamoc, coca apquelliennacteso la apualho'oc apqueluascapma acuacmo actacja nnelha, ncolhec jata alluoncaso tep ma'a.
23
Apmenlhenacpec jata nquec quetlhencap apquellawacja la'a, engiengiamoc jata enmancoc mo'oc apquellawacja, jawe ngiapac anquec ewatac jata apto Enenlhet Apquetca amanie apquelletsaujecjo apqueletcaicama lhamacjo temma apcacjaiancolha Israel.
24
25
Lhema apqueltamescama la'a jawe apto neten apanquec apquetlhemoscama apancoc, ntasec etnec etjaniacjac ma'a aptemacja apquetlhecmoscama apancoc. Lhema nema annencasecama la njan jawe apto neten apanquec apuesque apancoc la'a, ntasec etnec etjaniacjac ma'a aptemacja apuesque apancoc.
Co'o asto malha asquemjama emanie asnemacja la'a, ncacjoc coca jelleltancoc Beelzebu, quetlhencap coca malha asquennemolhema neten anquec jata ncotnec apqueltacnoncoma m'a.
26
Mellaga nquec quetlhencap enenlhet. Lhamacjo caselha alposemmalhca nac ncoliepjonwetac jata, aquielhammalhca nac, ncolhec jata aquiecpelcanwacmo.
27
Lhamacjo actemacja asquetlhecmosecamoc anac quetlhencap moc apancawe, etlhecmosamo ta njan quetlhencap napaqtawec aplhamacjo enenlhet'awoc
28
Mellaga nquec nema acmajai'a nconnapoc apqueliocjojo, coca mancolhec awanco ncotequio'oc apqueljangoc anac. Ellajo toca apto nac apmopuana enaqtewacsec apqueliocjojo cacpota njan apqueljangoc aquieto m'a mancospanei'acja talha.
29
30
31
Mellaga nquec quetlhencap, Engiapom Neten jata eltacmelquesec ma'a. Ellanjono actemacja anatatco'oc, janet anatatco'oc la'a lhema pataccom aquiaquiema alianmoma, mancomennawe ancoie', apqueltacmelcasque coca mota Engiapom Neten ma'a. Quetlhencap coca apquellelto neten apancawe apqueliaspommap, mancolhnoc ma'a anatatco'oc anac, Engiapom Neten apiawec aplhamacjo quetlhencap
, apqueltacmelcasquec na apqueliocja nac quetlhencap.
32
Apqueleltennasquec jata nquec quetlhencap napaqtawec enenlhet'awoc apquellelto jelieplecama co'o, co'o ta njan altennacsec tata apno m'a neten quetlhencap apquelelto jelieplecama,
33
coca apqueleltennasquec jata nquec quetlhencap metnanco jelieplecama napaqtawec enenlhet'awoc, co'o ta njan altennacsec tata apno m'a neten jawe jelieplecama quetlhencap .
34
Motlheng anquec apualho'oc quetlhencap asuai'ac co'o jenque'e asoiam metca altaicama apualho'oc, coca malha la asoiam aquientalhnema apcacjaicamoc.
35
Apquetcoc eniammelhecjac jata apiapom, atcoc ncammelhecjac jata njan nquen, atawen anquen ncammelhecjac jata niepiamong,
36
tep jata ncotnec apquellammelhecja apnemolhema apanque.
37
Apquellelto nlho etnancoc asqueltamesaicamoc quetlhencap, etnamoc jata tep anquec jellamelaiam, mancolhno apquellamelaiam anac ncana'ac, cacpota njan apquetcac.
38
Man jata nquec ncollecoc apualho'oc elpatmoc aquiawai'a aquientalhnema malha la iamet actennescama aniem'o jelieplecama co'o, mancollapuanquec na etnancoc asqueltamesaicamoc ma'a.
39
Enenlhet apquellelto la eluoncasacpo apancawec tep, enactewasacpoc jata m'a, coca enenlhet acuacmo apquemasquenwacmo la aniem'o jelieplecama co'o, eluoncasacpoc jata tep enenlhet anac ma'a.
40
Nnec jata nquec anmo tacja quetlhencap apqueluanlha la'a, coca malha njan jenmama la tacja co'o m'a, apmec na tacja m'a apto lhta jeiapascama co'o.
41
Enenlhet apto la apmama tacja secama ania'a aniem'o aptema secama ania'a, ncolhec jata njan anco aquianmoma acnemo m'a aplhewai'a secama ania'a. Enenlhet apto la apmama tacja enenlhet apeiwomo aniem'o njan aptema apeiwomo, ncolhec jata njan anco aquianmoma acnemo m'a aplhewai'a enenlhet apeiwomo.
42
Enenlhet apuet'o la lhema jeieplecama apmaselhtec apiaspommap, apcanco la quetsec iemmen acmalhco, ncolhec jata njan anco aquianmoma m'a —lhta aptac Jesus ma'a.