3
Pedro aptacmelcasecja metca aptapno'oc
1
La 3 ienacteso lhna ntemac, apquenmeiacjo Pedro cacpota njan Juan Engiapom Neten apnemacja cacpota elpaqmetquescacja Engiapom Neten ma'a, lhna ntemac apqueltemacja apancawec ma'a.
2
Apnenquec nac na lhema enenlhet metca aptapno'oc apteianlhasecja m'a, lhamacjo acnem nac nema aquiantemecja necja atong acuesai'a Actacmelo, cacpota elelmalhnama caselha apquellelto apquellentalhnenwecja m'a.
3
Apuetai'o lhnac metca aptapno'oc aplheiacmo Pedro cacpota njan Juan, secja lhnac apquenmajai'a elentelhec Engiapom Neten apnemacja m'a, apquelelmalhneianca lhnac pataccom ma'a.
4
Apquellanei'awec nac secjec Pedro cacpota njan Juan enenlhet anac, lhna ptemac apcanemo Pedro:
—Jengellaialhono secjec ennenco'o lheiap— lhna ptemac ma'a.
5
Apquelanecjec nac aptacja enenlhet anac, aclheianmo lhnac apualhoc apquenmajai'a ellancoc caselhaja,
6
coca lhna aptemac Pedro apcanemo:
—Mamma co'o pataccom
, coca nietnac apmopuana m'a, Jesucristo jeiaicamoc alhta m'a cacpota atacmelcasecja lheiap. ¡Etnemecja neten, elheng ma'a!—lhna aptemac Pedro
7
Ca apmamo lhnac apmec aquiennacja Pedro m'a, apquenencasecjo njan neten, ca aliennaiecjo lhnac colhuawec anquec apmanco'oc cacpota njan jaimatcoc apancoc,
8
9
10
8–10 ca apnelhteianca lhnac na neten, aplhengamo njan ma'a, apquelentalhenmo lhnac na lhemec Engiapom Neten apnemacja, apnelhteianca lhnac neten necsa apquetlhengama m'a, aptacnescaseianco lhnac na Engiapom Neten apuesai'a m'a. Nqueliemascanquec nac apualho'oc lhamacjo apquellelto apqueluetai'a aptacmelecjo m'a, apquellai'o njan ma'a ncanec apqueliecpelquemawec nac apto lhnac apquellanjecama mota caselha m'a aquieto atong acuesai'a Actacmelo, aquieto Engiapom Neten apnemacja.
11
Mang nac elpacnemecjac aptacmalueiam ma'a Pedro cacpota njan Juan aquieto m'a malamong pa'at portico acuesai'a Salomon. Apqueletcaicocjec nac enenlhet'awoc apcacjancolha m'a aniem'o alpelapquescama apqueluetai'a aptacmalueiam enenlhet ma'a.
12
15
16
12–16 Netamen lhna ptemac Pedro apquellanemo m'a:
— Quetlhencap enenlhet co Israel, nqueliemasquec lhec apualho'oc apquellan'o aptacmalueiam enenlhet anac, apquellanec na quetlhencap aniem'o nenmopuanca'a engancawe ennenco'o, aniem'o njan neltacmelcasemmalhco, coca jawe niecje m'a. Ca aptacmaluacmo nac enenlhet anac jenque'e aniem'o m'a mongeliaqueiam Jesus.
Engiapom Neten apuesque apanco'oc nelieijenca nnenga Abraham, Isaac cacpota njan Jacob apcaicamoc apmopuana m'a Jesus cacpota njan aptemesquescamo neten apanquec ma'a. Apqueltacnonconque lhtoca quetlhencap ma'a, apquellanconwaiacmo njan apquelanma apmaniaie romano, apmajai'ac na niecje njan epatnemecja Pilato Jesus ma'a, coca man nac elleltemo quetlhencap. Wanlha coca apquelleltemo ncolhec acpacnemacjo enenlhet meijamolhma apiaqmoiecja Jesus apto niecje apiamolhma, apeiwomo njan ma'a. Quetlhencap nquelleniemai'ac ma'a apmatnamo nac Jesus, apto niecje jengaicamoc nengiennactema, Engiapom Neten coca njan aptemescasecjac apjalhnancoc mocjom ma'a, ennenco'o njan ma'a nengellelto neluetaianco m'a.
17
Asiawec co'o necsa melliamo quetlhencap cacpota njan apquelemjama apmaniaie apanco'oc anac apquellaqjemo Jesus ma'a.
18
Coca apquelientemonquescamawec lhnac nanec aplheianma Engiapom Neten ematong jata apto apcapascama Mesias aniem'o apquetlhenecjo njan ma'a apquelletsecama ania'a nnenga.
19
Ntase colhua ellanecjac apualho'oc quetlhencap napaqtec Engiapom Neten, eluatesamoc apquellanecamoc ncolatsecama, netamen Engiapom Neten jata enmasquesquesec apqueltemacja ncolatsecama,
20
cacpota njan elpaiesquescamoc jata apualho'oc, apcapaso ta mocjom apto apqueliequiescama tep nac nanec, apto Mesias, Jesus apuesai'a m'a.
21
Coca Jesus elhec jata mocjom ma'a neten acuacmo apeneso lhamacjo caselha alhnanco'oc Engiapom Neten, aptemo lhnac nanec aplheianma aniem'o apquetlhenecjo apquetsecama ania'a nnenga apanco'oc apquellelto apqueliequiescama.
22
Apquelleltennascanquec nac na nec Moises nengellieijenca, lhnac nanec aptemac:
"Quetlhencap apuesque apanco'oc Engiapom Neten, eliequiaqsec jata lhema apjapac apiesecsec ma'a cacpota etnec secama ania'a ca stonac co'o. ¡Elleliejecjo ta m'a enenlhet anac ma'a!
23
Coca apquellelto la melleliejecjo m'a, ncomascoc jata nentemo lhemec ma'a" lhnac nanec aptemac Moises annenga.
24
Ampai'acja secjec anque lhta secama ania'a nnenga Samuel cacpota njan po'oc apquetsecama ania'a apquetlheiam neptamen ma'a apquetlheianmo m'a actemacja nac nelluetai'a ennenco'o colhuawe nac.
25
Quetlhencap apquellelto aptawana'ac neptamen apquetsecama ania'a nnenga, etlhewancoc jata njan caselha apnescamo apaioma aplheianma Engiapom Neten ellancoc jata m'a apquelieijenca. Lhnac nanec aptemac Engiapom Neten apcanemo Abraham:
«Ncoltacmelec jata apquellaniemjaicama aplhamacjo enenlhet'awoc lhma nquec jam aniem'o aptawana'ac neptamen lheiap» lhnac na nec aptemac Engiapom Neten.
26
Jai, Engiapom Neten alhta aptemescasacja apjalhnancoc apiesecsec apquenmasquenwaiacmo Apquetca, apcapasquec na apmaniaie cacpota eltacmelquesquesec apquellaniemjaicama quetlhencap ma'a, cacpota eluatesancoc na aptaicamoc meliamolhma— lhna aptemac Pedro apquellanemo enenlhet'awoc ma'a.