2
Apuaiwentanlha Espiritu Santo
1
Nwaiacmec nac acnem actacmelaiancolha lhma' acuesai'a Pentecostes ma'a, apcaqnecjec nac aplhamacjo apquelieplecama Jesus ma'a.
2
Mpelapquescanquec nac apquellengai'a aquiennactema nquec amnoma aniemai'o neten, malha alhcaiam aquiennactema lhna ntemac ma'a, nlanenwai'ac nac ma'a aquieto apcaqnacjelha' conne m'a.
3
Ca alpelapquescamo lhnac alenteiapuei'o aleiwoma malha talha apietsecso'oc lhamacjo enenlhet'awoc ma'a apquelanemmacpo.
4
Nquellaneiancawec nac apualho'oc Espiritu Santo enenlhet'awoc ma'a, ca ampaiacja lhnac apquelpaqmetecama mo'oc
apquelpaqmeiasma aniem'o m'a Espiritu Santo.
5
Apquellomaca lhnac na m'a aquieto Jerusalen enenlhet judios apquellamelai'am Engiapom Neten, apquelpaqmetecama mo'oc apquelpaqmeiasma ncanec apquelleniem'o lhamacjo apquellawacja m'a.
6
7
Apqueletquecjec nac ma'a aquieto apcaqnecjelha apquelieplecama Jesus aniem'o apquellengai'a aquiennactema annoma malha alhcaiam, awanjec anquec nac alpelapquescama apquellengai'o apquelpacmeiasma apqueluaianlha lhta secjec ma'a apquelpaqmeiasma, lhna aptaiancoc:
—Co Galilea enenlhet anac ja'e apquelpaqmetenca nac,
8
¿se lha ntac apquellapuanco nac apquelleliatecama nenpaioma engancawec ennenco'o nenpalleianlha lhta nellengiectanlha nac, je?
9
Ennenco'o nelpalhcammalhca jenque'e nelleniem'o mo'oc apquellawacja, co Partia, Media, Elam, Mesopotamia, Judea, Capadocia, Ponto, Asia,
10
Frigia, Panfilia, Egipto, cacpota njan iocjalhma' aquieto Libia, nengaqtec iocjalhma Cirene. Apcaqjanquec na enenlhet jenque'e apquelleniem'o co Roma,
11
moclhem'a apquellelto judios apancawec, cacpota njan po'oc aptaicamoc colhua judios. Apcacjanquec na jenque'e enenlhet apquelleniem'o Creta cacpota njan co Arabia. Nenlhamacjo nenleng'ac Jesus apquelieplecama anac apquelpaqmetenca nempaioma ennenco'o actacja nac caselha monwetai'o aniem'o m'a Engiapom Neten —lhnac aptaiancoc enenlhet ma'a.
12
Nqueliemascanquec nac apualho'oc enenlhet'awoc ma'a aniem'o apquelpaqmeteianca moc apquelpaqmeiasma apquelieplecama lhta Jesus ma'a, lhna aptaiancoc apquelpacmetquesammacpo moc apancawec ma'a:
—Sec la acuesai'a jengca ie, je? —lhna aptaiancoc.
13
Coca napocja enenlhet nac ma'a apqueliematquesaicama lhnac apquelieplecama lhta Jesus ma'a, lhna ptaiancoc:
—Nquellieija lhma jam, anmen na nquennapac— lhna aptaiancoc
14
Coca apquenmecjo lhnac neten Pedro m'a cacpota njan 11 apostoles, lhna ptemac Pedro apiennactescamo apaioma:
— Quetlhencap judios cacpota njan quetlhencap apquellawacja nac jenque'e Jerusalen, eltaqmelcaso no apquellailhemo asmac'acja nac atnejec alheianma.
15
Ca enenlhet apquelpaqmetenca nac mo'oc actema apquelpaqmeiasma mancolieija lhma' ncanec la 9 sosecje ntajac, mancoietoc aptancolha nac apquetlheianma quetlhencap.
16
Ca actacja nac apqueluetai'a quetlhencap nwa'ac cnem aplheianmo lhnac nanec secama ania'a nnenga Joel, lhnac na nec aptemac:
17
«Lhque aptac Engiapom Neten, jata acuacmo ta actacja nnelha acnem, allancoc jata Espiritu ejencoc aplhamacjo enenlhet'awoc lhmanquec jam, apquetcac apquellennawa'ac cacpota njan nqueluana'ac, ncotlhenec jata Asuesai'a, apquetco'oc ncoitec jata alietnaicama apaqto'oc apmaniaie', cacpota njan apqueluaneiam apqueluanmoncoma ta alpacmetquesec necsa apnacteianma la'a.
18
Allancoc jata njan Espiritu ejencoc asquellasennaicama apquellennawa'ac cacpota njan nqueluana'ac, ncotlhenec jata Asuesai'a co'o.
19
Aluetasquesec jata njan caselha monwetai'o neten, cacpota njan nalhepop ncoitec jata ema, talha cacpota njan acpanma eten aquiawai'a.
20
Ncomascoc jata aponmato acnem, cacpota njan pelten eielhuacsec jata, malha ema ta etnejec ma'a, netamen ncowac jata acnem monwetai'o, aluetasquesec jata njan acnem asmopuana, asquelpeiwesecja njan aptaiancolha apqueliamolhma, meliamolhma enenlhet'awoc lhmanquec jam.
21
Aluonquesec jata tep co'o apquellelto la jeltemesquescama apuesque apancoc» lhnac aptemac apcanemo Engiapom Neten secama ania'a Joel.
22
Quetlhencap israelitas, eltacmelcaso no mocjom apquellailhemo asmac'ac altennasancoc, apquelliawec quetlhencap Engiapom Neten nquengiem'ac ma'a apqueluetasquescamo nac quetlhencap apmopuana Jesus con Nazaret, aquiawai'a njan apquelanai'a caselha jempelapquescama, caselha monwetai'o aniem'o neten ma'a.
23
Coca apquelemjama apmaniaie nac judios apquellanconwaiacme lhta Jesus enenlhet'awoc meliamolhma co Roma cacpota ennapoc neten iamet actennescama m'a, apiamawec coca Engiapom Neten apmanie panque' acmac'acja ncotnec ma'a.
24
Coca netamen ma'a aptemescasacje lhta apjalhnancoc mocjom Jesus ma'a, apuoncasque lhta njan tep necsa apquetsepma m'a, mamma lhta njan acmowana nengetsepma cacpota ncomancoc mocjom Jesus ma'a.
25
Lhennenga tep nac nanec aplheianmo lhnac apuesque David aptemacja acmac'acja ta ncotnec apcaniemjaicama Jesus, lhna aptemac:
«Asuet'a co mota apuesque ejencoc astaicama alhelhma, aquieto aquiennacja ejectong ca ncanec mamma enenlhet jetenquesec co'o.
26
Mpaijacjec co ewalhoc, asquennecmasquec na nennecmascama aquieplomo acpaijecja ewalhoc, aloca ta mota metca actaicama ewalhoc aniem'o m'a»
27
«Lheiap manjeiamasanwomec jata asquetsepo ta aquieto m'a apquenmaiancolha apqueletsepma, mengianquec jata njan ma'a ncocpelcalhcac apiempec apcasennaicama apancoc apcasecjai'o.
28
Jetescasquec amai acmaicamoc ma'a metca actemonwaianlha nnelha nenganiemjaicama, awanjec jata njan ncotnec acpaijecja ewalhoc ncanec apne mota nejecja lheiap» lhnac ptemac ma'a.
29
Elialheng'a, apquelliawec quetlhencap David apquetsepme lhta m'a, nelliawec ennenco'o nemacja aclhenquescaiacmo apjapac metaimong alhua jenque'e.
30
Secama ania'a lhnac na nec David ma'a, Engiapom Neten apqueltennascanquec nac na nec lhema apaioma etnecjac jata apiau'acja apuesque aptawen neptamen.
31
Apiamawec noca David ma'a aplheianmo Mesias, ca ncanec aplheianmo meietnemjec jata Mesias apiesecsec apquenmasquenwaiacmo, mancocpelcalhquec jata njan apiempec ma'a.
32
Jesus alhta m'a, nelluet'a lhta ennenco'o Engiapom Neten aptemesquesecja apjalhnancoc mocjom apiesecsec apquenmasquenwaiacmo,
33
ca apiantemacjo lhta njan neten apneso napocja aquieto aquiennacja apoctong, apcaianquec na Espiritu Santo, colhua coca Jesus jengellancocjec na ennenco'o m'a aptemacja lhta njan apaioma apenescamo jengelleltennascama. Ca nqueniem'ac ma'a apqueluet'o lhquec quetlhencap, apquelleng'o lhquec na alpalhcammalhca nelpaqmeiasma ennenco'o.
34
Ma lhta engiecjac neten David, coca lhna na nec aptemac:
«Lhta aptac Engiapom Neten aplheno apuesque ejencoc ma'a: "elhnata nejecja aquiennacja,
35
acuacmo asaujo asnaqtewasecja apquellelto apquellammelhmacja lheiap"» lhnac na nec aptemac.
36
Ellailhono enenlhet co Israel, jawe ngiapac anque quetlhencap apqueliaqlhaianque lhta apmeioc apmancoc Jesus neten iamet actennescama, coca Engiapom Neten alhta aptemescasac apuesque cacpota njan Mesias—lhna aptemac Pedro apquellanemo enenlhet'awoc ma'a.
37
Awanjec anquec nac altaicama apualho'oc apquellengai'o m'a, ca apquelelmalhnenwecjo lhnac Pedro cacpota njan apquetlhelhma'ac apostoles, lhna aptaiancoc:
— ¿Co la antemesquesancoc ennenco'o m'a, je?—
38
Ca apcatemmoianca lhnac Pedro m'a, lhna aptemac:
—Ellanecja coca apualho'oc, eluatesamoc apqueltemacja ncolatsecama, eltengiamoc nema allauquescama conne iemmen aquieplomo apuesai'a Jesucristo, netamen Engiapom Neten enmasquesquesec jata apqueltemacja ncolatsecama, cacpota ellancoc Espiritu Santo.
39
Lhnac na nec aptemac Engiapom Neten apuesque engancoc aplheianmo ellancoc ma'a apquellelto apqueliequiescama, quetlhencap, apquetcac, cacpota njan lhamacjo enenlhet'awoc lhmanquec jam —
40
Aplhenquescanquec nac Pedro apquelleltennasecamoc ma'a apcanemacja eltejec, lhnac aptemac:
—¡Meliepetcanwoma nquec enenlhet anac ma'a meliamolhma!—lhna aptemac.
41
Nnenquec nac allauquescamo conne iemmen apquellelto meliasqueiam aptemacja apqueltennaicama Pedro m'a, aplhameianquec nac aptaicamoc meliasqueiam Jesus ma'a, malha lhnac 3000 enenlhet'awoc ma'a,
42
wanlha lhna mota apquellasecjai'o actemacja apquetlhecmoscamoc apostoles ma'a, apquelpasmecjec na mota caselha apanco'oc m'a acnaiancolha la'a, cacpota njan aptaweicocjo lhnac na lhemec ca njan apquelpacmetquescamo Engiapom Neten.
Ampaiacjasecja apmaniaie apancawe aptaicamoc meliasqueiam Jesus
43
Nqueliemascanquec nac apualho'oc enenlhet'awoc ma'a apqueluetai'o caselha jempelapquescama actacmanma, caselha monwetai'o aniem'o neten apquellanecamoc apostoles.
44
Apquennasquesammacpec nac na lhamacjo caselha apanco'oc apquellelto meliasqueiam Jesus ma'a aniem'o apqacnecjo mota.
45
Apqueliamasmec nac na lhepop apanco'oc cacpota njan lhamacjo caselha apancoc, apquennasquesammacpec nac pataccom alaimommalhquelha la m'a.
46
Lhamacjo cnem nac apcaqnecja mota aquieto Engiapom Neten apnemacja m'a, cacpota njan apquelpasmecjo m'a apcacjaianquelha nentoma actacmanma
, aptaweicocjo njan nentoma nquec aquieplomo alpaijecja apualho'oc ma'a cacpota njan allacjaicama apualho'oc.
47
Apqueltacnescaseianco lhnac na Engiapom Neten ma'a, apquetlhenammacpec nac na apquellelto apqueliamolhma. Lhamacjo cnem na ntemac aplhamecamoc enenlhet meliasqueiam ma'a Jesus aniem'o Engiapom Neten apquellawecama cacpota eluoncasacpoc tep.