¹ Na tɛrɛziineee Klaa jo na pere tolɛyee tooyo woɲɛhiyɛ na seganniŋaa woɲɛhiŋɛɛ la wu kayodorogoli cege la. ² Na ga jii tɛrɛgi sanŋgii, wa jo na woo wu Jaŋe cege la. Wuri wa teeŋe na se yɛriye pone fooŋe, liri na wuri wo cege la wa yɛriye pone tirige. ³ Wuri wu wa Klɛ wo saambe, wu ɲɛɲaane na Klɛ wone di ɲɛ nigin. Na wu ɲojuune fanhaɲɛhiŋge cege la koŋge pone wa tɔrɔ la. Ba wa wu yɛ saraga na kɔ tisili wo kapegi ɲuŋu tanŋ wɛ, a wu lugi na sa diin Kerigi muu Jaavooŋe Klɛ sulicege la arijinnaŋee. ⁴ Klɛ Jaŋe tayeregaa pɛlɛ mɛlɛkɛli woge la, fɔn Klaa mage kan wuun ge mu ke fanha tɔ mɛlɛkɛli woge la ge. ⁵ Na mɛlɛkɛ wu siin Klaa tye li jo ɲa na wuri Klɛ Jaŋe wu wa, na wuri wa wu se niɲaa yɛ? Klɛ sunŋaa sanhi dye li jo mɛlɛkɛŋe waa na wuri Klaa si ze wu Toŋe, wuri di ze wuri Klɛ wo Jaŋe yi. ⁶ Na ga, wu Jaŋe wu ze wa yɛriye pone ɲahaa ge, tɛnee wuraa ba ze koŋge la ge, a wu jo na mɛlɛkɛli muu paa ɲigure sinni wu fɛrɛɛ. ⁷ Na le jo mɛlɛkɛli kaa la na wa ba wu mɛlɛkɛli se kafyɛgɛ, na wu baasiibi se naga. ⁸ Na ga wa li jo wu Jaŋe wo kaane la na Klɛ wu wa, na wu fanhafɛɛraa si diin tɔrɔ fɔn tuka. Na fanhafɛɛre tibiine di ɲɛ deleŋe wo tibiine. ⁹ Na deleŋe wa taan wuun, kapegi kaa da pɛn daan wuun. Na liri la, Klɛ wu wa wu Klɛŋe ge, wa wu sɔɔnraa wuu na fundange kan wuun na toro wu kaafyebi muu tanŋ. ¹⁰ Na a wu nuŋaa jo na nusange la Kaafooŋee wa ɲiŋge tirige, na klaŋe di ɲɛ wu ceeye wo yayaaŋa. ¹¹ Na yiri ponaa si ba gɔ, ga wuri di ze wa tuka. ¹² Na wa si ba yi kuri ba tisaa ba vanŋa kuri wɛ, wu di ba yi faa ba tisaa ba vanŋa faa wɛ. Na ga wuri di ze wa wu leembee, tagiri wa wuri wo yeegi la yi. ¹³ Na mɛlɛkɛŋe wu siin Klaa tye li jo na wu tiin wuri silucege la fɔn ba wurahaa ba wu piinli muu se wu tooye tatahaŋa yi? ¹⁴ Na mɛlɛkɛli di ɲɛ ɲahiŋa yi? Na munahaa ce wa ce muu baare si Klɛɛ, liri na tisili pe si ba bohi ge, na pe tari.