¹ Cèrhé-nə Bə-zhɔ-zhe ! Cèrhé-nə Bə-zhɔ-zhe yil ré, Bə-zhɔ-zhe tùntùnnə, cèrhé-nə mo, ² ámyɛ̌ byɛ̀bɛ́ á ŋwɛ́nɛ́ Bə-zhɔ-zhe jì y mú, Yi jì y kɔ̀nɔ́ w mɔ́ ! ³ Cèrhé-nə mo, bə̀ nyǐ ń wɔ́ wu-bɔ̀nɔ̀ cə́bal. Nún-nə ń yil ré ! bə̀ nyǐ ń càn. ⁴ Bə̀ wɔ́ Zhakɔɔbɛ Bə-zhɔ-zhe cír n pə ǹ cìn ni, n cír Esərayɛl ń la cìnú. ⁵ À yě bə̀ Bə-zhɔ-zhe wɔ́ nánfɔ̀lɔ̀, bə̀ nə́ Cǐnnə mó wɔ dɛ̃̌ du yə né gakó. ⁶ Kɔn tɛ̀bɛ́ gakó Bə-zhɔ-zhe nə́ ń yǎl mɔ́, ń nə́ ń wɛ̀rhɛ́ rɛ, dɛ̃̌ ǹdə́ cɛ yó, nə̀-fɔ̀lɔ̀ w ǹdə́ gwáárɛ́ nã́lyilyǔmrí gakó wẽ́. ⁷ Ń nə́ ń ce bə́ban rɛ́ shí cə-yala gakó w rə du, n ce dwà y lyə́lyɔ̌ e nyɔ̀, n ce zho w shí jààsɛ́ w o du o ce. ⁸ N mà Ezhibti byì-yə́ə́sé n gu, kɔn zhì bala ǹdə́ bə̀ vwàmá nɛ́. ⁹ Ǹmyɛ́ Ezhibti, Bə-zhɔ-zhe twĩ̀ màmyaarhɛ ǹdə́ tũ̀-fwààlɛ rə bə̀ rə wɛ̀rhɛ́ ǹ sono ! rə bú ǹdə́ Faraɔ̃ ǹdə́ ń kwã-lyì bí gakó. ¹⁰ N mà tənèrh nánzhəzhɔ̌, n gu pyǎ bə̀ y’à zhe jàn nánfɔ̀lɔ̀, ¹¹ è yàl Amɔrətəbá pyɔ̌ Səwɔ̃, ǹdə́ Bashã pyɔ̌ Oge, ǹdə́ Kanaã pyǎ bɛ́ gakó. ¹² N pə bə̀ tənèsé Esərayɛl, ń dwí rí ni rə̀ cəl kɔna. ¹³ Bə-zhɔ-zhe ! ǹ yil ré ŋwɛ́nɛ́ twéé twéé gaga, Bə-zhɔ-zhe ! bə̀ m’a j’a n’ê lyǐrh ǹ yil ré yò byinə byinə gakó. ¹⁴ Bə-zhɔ-zhe mà n byili ń dwí rí rə̀ yé, sə ń mà n dùr ń tùntùnnə bé nɔ̀nɔ̀. ¹⁵ Tənèsé yə né wɔ́ sə̀byì-kùlì ǹdə́ sánə́má, nə̀ wɔ́ numbyínsi jɛ̀rh sə̀ wɛ̀rhɛ́ nɛ. ¹⁶ Nə̀ zhe nyí sə nə̀ t’â zɔ̀m gaga yé, nə̀ zhe yírhə́, sə̀ nə̀ bə nɛ́ nɛ gaga yé, ¹⁷ nə̀ zhe zhã̌, sə nə̀ bə nyɛ̌ gaga yé, nə̀ bə shíshə̀rhə́ zhe nə̀ nyú w gaga yé. ¹⁸ Nə̀ tó dwã ǹdə byɛ̀bɛ́ bə̀ wɛ̀rhɛ́ nɛ mɔ́ ta, lyì bí byɛ̀bɛ́ gakó bə̀ zhe nə̀ zhə̀n mɔ́. ¹⁹ Esərayɛl kɛ̀lɛ́ y lyì, ce-nə Bə-zhɔ-zhe nə̀báná ! Aarɔ̃ kɛ̀lɛ́ y lyì, ce-nə Bə-zhɔ-zhe nə́báná ! ²⁰ Ləvyi kɛ̀lɛ́ y lyì, ce-nə Bə-zhɔ-zhe nə̀báná ! ²¹ Ámyɛ̌ byɛ̀bɛ́ á ŋwɛ́nɛ́ Zhərəzalɛm nɛ́ mɔ́, zhǐ-nə Səyɔ̃ nɛ́ á ce Bə-zhɔ-zhe nə̀báná ! Cèrhé-nə Bə-zhɔ-zhe !