¹ Pyɔ̀ w jíl nwə̃́ə̃́. Bə-zhɔ-zhe, lyǐrh Dəvyidi yò, lyǐrh ń lyààrɛ́ ń lyɛ̀ɛ̀ mɔ́ gakó yò ! ² Ń bwəl nyí Bə-zhɔ-zhe yé né, ń dwĩ̀ nyí mɔ̀bɔ́ ń wɔ́ Zhakɔbɛ jàn rɛ́ nɛ n wɔ̀ : ³ À t’â la kòrhó w à ŋwɛ́nɛ́ ò wẽ́ mó wẽ́ zú, à t’â la à kò-pyònò wẽ́ pyõ̌ à shǐrh, ⁴ à t’â la à yírhə́ pú jan jí ni, ⁵ ǹdə́ à yə̀ jàà nɛ a pə Bə-zhɔ-zhe ne, a pə mɔ̀bɔ́ ń wɔ́ Zhakɔbɛ jàn rɛ́ mɔ́ nɛ pɛ yé. ⁶ Nyǐ nə́ nyɛ̀ɛ̀ bə̀ zɔ̀m ò yò Efəratɛ nɛ́, nə́ m’ǎ nə w Jaarɛ gɛmɛ nɛ́ wa. ⁷ Zhəl-nə nə́ vò jàà y wa, nə́ wùlì ò yé né ò nèsé gə́ cĩ́ mə̀gã̌ mɔ́ !... ⁸ Bə-zhɔ-zhe, zɛ̃̀ tɛ̃́, bə̀ ǹ shìrhə́ jàà y wa, ǹmyɛ́ ǹdə́ ǹ kùlkṍ w ǹ ŋwɔ̀nɔ́ w ŋwɛ́nɛ́ ò wẽ́ mó ga ! ⁹ Bə̀ ǹ vwĩ̀-zwə́lnə bé zù cángá gàmə̀-zwǐsi, sə ǹ lyì bí mà wu-nyɔ̀ búbwéése ! ¹⁰ Tə̀ ǹ tùntùnnə Dəvyidi yilə, ǹ bə̀ká cìrh mɔ̀bɔ́ ǹ cír mó ń ce kwã nɛ́ yé ! ¹¹ Bə-zhɔ-zhe bwəl nyí Dəvyidi ni, sə ń tá ń la nyí rí rə̀myɛ́ mɔ́ kwǎrh yé ; bə̀ nyǐ à m’a cĩ́ ń shĩ rí byǐ ǹ pyɛ̀lɛ̀ rɛ́ də̀gwã́ y yó. ¹² Ǹdə́ ǹ byǎ bɛ́ gə wɛ̀rhɛ́ ǹdə à gə́ cèrhè be à dɔbrɛ́ ǹdə́ sɔ́msɛ́ gə́ n’ê byili ń mú ta, ǹ nɛ̀mɛ́ myɛ m’a jòm ǹ pyɛ̀lɛ̀ rɛ́ də̀gwã́ y yó twéé twéé byinə nə̀ bə zhɔ̌ zhe. ¹³ Zhə̀nà, wɔ́ Bə-zhɔ-zhe ń cír Səyɔ̃, ń yǎl ń la jòm gàà mɔ́ e yə̀ ń jòmə̀ jàà : ¹⁴ Wɔ́ à shìrhə́ jàà twéé twéé gakó ; à m’a jòm gàà mɔ́, bə̀ wɔ́ àmyɛ́ à yǎl wa. ¹⁵ À m’a cĩ́ bwəl ò kùjú w yó, a pə kùjú ò nə̀mwà bɛ́ nɛ́ bə jí bə sú ; ¹⁶ a zù vwǎrh kàmə̀-zhǔrh ò vwĩ̀-zwə́lnə bé ne, sə ò lyì bí m’a mà wu-nyɔ̀ búbwéése. ¹⁷ À m’a zhẽ̌ Dəvyiddi jàn rɛ́ dɛ̃̌, a tɛnɛ pàntɛ́mɛ́ à lò mó à cir mó yilə, ¹⁸ à m’a ce cìzhìl pú ń zwə̀ bé, sə ń pyɛ̀lɛ̀ yə́-pú w m’a zhì ń yó w o jə́jɛ̀mɛ́.