¹ Wu-nyɔ̃̀ cìnə́ wɔ́ lyì byɛ̀bɛ́ bə̀ n’ê zhə̀l bə̀ sɔ́má y yó ǹdə́ wu-põ̀ mó, bə̀ n’ê zhə̀l ǹdə Bə-zhɔ-zhe nyə́ né gə́ n’ê byili ní ! ² Wu-nyɔ̃̀ cìnə́ bé wɔ́ lyì bí byɛ̀bɛ́ bə̀ zhe ń nyə́ né bə̀ wẽ́ mó, bə̀ n’ê wɛ̀rhɛ́ ǹdə́ nə̀ gə́ n’ê byili ní ǹdə́ bə̀ wun gakó mó. ³ Bə̀ t’â wɛ̀rhɛ́ lwɛlɛ yé, bə̀ n’ê zhə̀l ǹdə ń sɔ́msɛ́ gə́ n’ê byili ní ! ⁴ Ǹ kɛ̃ ǹ nyə̀ né ń pa, mùnì ga bə̀ tó ne cɛ̀nɛ̀. ⁵ Sə a ŋwɛ̀nɛ́ a zə à tumə né nə tó sɔ́má kɛ̀bɛ́ è mǎ, mùnì ga a zə ǹ nyə́ né à wẽ́ ! ⁶ Èta cìzhìl t’â la nɛ zal ǹ nyə́ né rə̀dù ga yil à yé né yé. ⁷ À m’a zǔl mó ǹdə́ à wu cángá, ǹdə́ à gə tú à cèrhè ǹ nyə́ né cángá mɔ́ yi ní. ⁸ À n’â yǎl a zə ǹ nyə́ à wẽ́ : Ǹ bə̀ká ń yẽ̌ ne lyɛ́lyɛ́ yé ! ⁹ Wɔ́ etər èbɔ́-dǎl mà n tó n zə ń nyǔ mú mə yə̀ pwɛ̃́pwɛ̃́ ? ǹdə́ ń gə tá ń zhə̀l ǹdə ǹ zɔ̀mɛ̀ rɛ́ gə́ n’ê byili ní ? ¹⁰ À n’â pyà mɔ́ ǹdə́ à wu gakó : Ǹ bə̀ká yẽ̌ ne a jé a vò yé né gaga a yẽ̌ ǹ nyə́ né ne yé ! ¹¹ À zhe ǹ zɔ̀mɛ̀ rɛ́ wẽ́, mùnì ga à bə̀k’a dó mó yé. ¹² Ǎ Bə-zhɔ-zhe, ǹ yil ré nə còrhó ! Cèrhè ne ǹ nyə́ né ! ¹³ Nyǐ à n’â zə à nyí à gàl ǹ nyə́ né ǹ púr ǹ nyú w ń byili mú gakó. ¹⁴ À n’â fùù ǹdə́ wu-nyɔ̃̀ à gə́ n’â tó ǹ nyə́ né ne mó yilə, ǹdə wɔ́ nə̀cɛ̀ndɛ à zhe ta. ¹⁵ À n’â tɛ́rɛ́ ǹ nyə́ né à wẽ́, à n’â nyǐ ǹ tumə né ǹ tɛnɛ ǹ la tũ̌ mú à yé né mó. ¹⁶ À zɔ ǹ nyə́ né nə̀ wɔ́ à kɔn dɛ̀bɛ́ rə̀ nyɛ̀ ǹdə́ nɛ, à t’â swě ǹ zɔ̀mɛ̀ rɛ́ yò gaga yé. ¹⁷ Wɛ̀rhɛ́ cɛ̀nɛ̀ ń pə ǹ tùntùnnə mó ne, mùnì ga à zə myə̌l, s’a wɛ̀rhɛ́ ǹdə ǹ zɔ̀mɛ̀ rɛ́ gə́ n’ê byili ní ! ¹⁸ Púr à yírhə́ né, mùnì ga a nə ǹ nyə́ né tũ̀-fwààlɛ́ ! ¹⁹ À wɔ́ zhəl-bal cɛ yó : Ǹ bə̀ká shèè ne ǹ nyə́ né yé ! ²⁰ Ǹ nyə́ né kùr pyǎ e lwar mɔ́ shil ré n’ê gwi ni à wẽ́ twéé gakó. ²¹ Ǹ nə́ ǹ bwí cìn-byilu cìnə́ bé byɛ̀bɛ́ bwəl námməlwɛ̀lɛ́ ŋwɛ́nɛ́ bə̀ yó mó, bə̀myɛ́ byɛ̀bɛ́ bə̀ n’ê jé bə̀ yẽ̌ ǹ nyə́ né ne, bə̀ zhə̀l kwã nɛ́ gaga mɔ́. ²² Vǔr ne cìzhìl ré ǹdə́ à yààlɛ mɔ́ lyì bí n’ê yààlɛ nɛ mɔ́ wẽ́, bə̀ àmyɛ́ n’â zwẽ ǹ nyə́ né. ²³ Bá pyǎ gə n’ê jòm tɛ̃́ bə̀ zɔ̀m à sõ mámá myɛ, ǹ tùntùnnə mó nə́ ń tɛ́rɛ́ ǹ nyə́ né yò ń wẽ́. ²⁴ Ǹ nyə́ né wɔ̀ kɔn dɛ̀bɛ́ à só rə̀ nyɛ̀ ǹdə́ nɛ, nə̀ wɔ́ à cícírnə. ²⁵ À lyẽ shó w ne : rə̀myɛ́ ce pɛ̃ nyǔ ǹdə ǹ zɔ̀mɛ̀ rɛ́ gə́ byili ní ! ²⁶ À n’â byili mú à sɔ́msɛ́ à n’â zhə̀l sə̀ yó mó, sə ǹ nə́ ǹ zwẽ à lwə̌l mó : Rə̀myɛ́ ce, cèrhè ne ǹ nyə́ né ! ²⁷ Ce a lwar ǹ nyə́ né sɔ́msɛ́ párá, sə a zɛ̃̀ a tɛ́rɛ́ ǹ tũ̀-fwààlɛ́ yò wə́ ! ²⁸ À wu zhìlì à n’â kúrhə́ : Sə zɛ̃̀ ń zhẽ̌ à yó dɛ̃̌ ǹdə ǹ zɔ̀mɛ̀ rɛ́ gə́ byili ní ! ²⁹ Ce kɔma sɔ́má y vò kwã à nyí ni, Sə pə nɛ sónó a m’a tó ǹ nyə́ né ne ! ³⁰ À cír zhə̀n rɛ́ sɔ́má yá, à cĩ́ ǹ nyə́ né à yé né à n’â nyǐ. ³¹ À zə à cìn a zhí ǹ nyə́ né ne : Bə-zhɔ-zhe ! Ǹ bəká pɛ̃ cìzhìl yé ! ³² À n’â yǎl a yə̀ ń nyə́ né sɔ́má y yó à n’â dùrə̀. ³³ Bə-zhɔ-zhe, cèrhè ne ǹ nyə́ sɔ́má yá, mùnì ga a zə nɛ kɔn m’e yí yó gúrə́ ! ³⁴ Pɛ̃ surhə mùnì ga a zə ǹ nyə́ né à wẽ́, s’a wɛ̀rhɛ́ ǹdə nə̀ gə́ n’ê byili ní ! ³⁵ Zə nɛ a vò ǹ nyə́ né sɔ́má y yó, bə̀ à só ne. ³⁶ Zə à wu w o zǎ ǹ nyə́ né, sə ǹ bə̀ká yẽ̌ o zǎ lũ wẽ̀ ré ne yé ! ³⁷ Pyìrhí à yírhə́ né wẽ̀ ré tɛ̀bɛ́ rə̀ bə kùr zhe mó yó, sə́ ce a zə nyǔ a vò ǹ sɔ́má y yó ! ³⁸ Pyǐrh ǹ nyí rí ǹ bwəl mó, ǹ tùntùnnə mó yilə, nyí rí rə̀myɛ́ mɔ́ wɔ́ lyì bí byɛ̀bɛ́ bə̀ n’ê nyàm mɔ́ mɔ́ yil ǹ bwəl ré ! ³⁹ Ce cìzhìl ré à wu w n’ô zɛ̃̀ rə̀ yil mó vò kwã nɛ́ à nyí ni ! Bə̀ ǹ zɔ̀mà nɛ́ ǹ zɔ̀m mɔ́ sú ǹdə́ wu-bɔ̀nɔ̀ zɔ̀mà dúdú. ⁴⁰ Nyǐ à n’â yǎl a wɛ̀rhɛ́ ǹdə ǹ nyə́ né gə́ byili ní : Ce a zə nyǔ ǹ cángá tumə né wẽ́ ! ⁴¹ Bə-zhɔ-zhe, ǹ nɔ̀nɔ̀-dǔr mɔ́ yál nɛ ǹdə́ nɛ, sə ǹ vwǎrh mɔ́ yə̀ ǹdə ǹ gə́ bwəl nyí ní ta ! ⁴² Èta, à m’a zɛ̃̀ a ŋwɛ̀nɛ́ a lyár lò mó mɔ̀bɔ́ ń nə́ ń tùrh ne mó, Bə̀ wɔ́ ǹmyɛ́ zɔ̀mɛ̀ rɛ́ nɛ à zhí. ⁴³ Ǹ bə̀ká vùr ǹ zhə̀n rɛ́ zɔ̀mɛ̀ rɛ́ gakó lyɛ́lyɛ́ à nyú w yé ! bə̀ à n’â dɛ̃̀ kɔn ǹ zɔ̀mà nɛ́ ǹ byili mú yilə. ⁴⁴ À m’a j’â n’â wɛ̀rhɛ́ ǹdə ǹ nyə́ né gə́ n’ê byili ní twéé twéé, byinə nə̀ bə zhɔ̌ zhe yilə. ⁴⁵ À m’a zɛ̃̀ a vò cìn-cìnú zhə̀n zhə̀n wẽ́, bə̀ wɔ́ ǹmyɛ́ nyə́ né gə́ n’ê yǎl nɛ́ mɔ́ à n’â pyà wɔ̀rhɔ́. ⁴⁶ À m’a bwə̀l ǹ nyə́ yò a byili pyǎ bé yé né, à t’â la ywẽ dǔr gaga yé. ⁴⁷ À zɔ ǹ nyə́ né nə̀ wɔ́ à kɔn dɛ̀bɛ́ rə̀ nyɛ̀ ǹdə́ nɛ, à só ne. ⁴⁸ À zhẽ̌ à jɛ̀rh a ce ǹ nyə́ né à só mó ne, à n’â yǎl a tɛ́rɛ́ nɛ à wẽ́. ⁴⁹ Lyǐrh nyí rɩ́ ǹ bwəl ǹ tùntùnnə mó ne mó yò, ǹ gə́ ce à n’â dɛ̃̀ kɔn mɔ́ yilə ! ⁵⁰ Wɔ́ rə̀myɛ́ rə̀ n’ê zal à wu ni, à zúzúnú wẽ́, bə̀ ǹ nyí rí ǹ bwəl mó n’ê pɛ nɛ nyǔ. ⁵¹ Cìn-byilu cìnə́ n’ê mɔ̀n nɛ, sə à t’â yẽ̌ ǹ nyə́ né ne gaga yé. ⁵² Ǎ Bə-zhɔ-zhe ! à n’â bùl ǹ zɔ̀mà nɛ́ ǹ yà ǹ zɔ̀m shãã ga mɔ́ yò, sə nə̀ n’ê zal à wu ni. ⁵³ À gə nɔ lyì-bəlwǎlsɛ́ shɛ̀bɛ́ sə̀ n’ê yẽ̌ ǹ nyə́ né ne mó, à lyim n’ê zɛ̃̀ dɛ̃́dɛ̃́. ⁵⁴ Wɔ́ ǹ nyə́ né yil à n’â nún kɛ̀lɛ́ y kɛ̀bɛ́ à wɔ́ zhəl-bal è wẽ́ mó wə. ⁵⁵ Ǎ Bə-zhɔ-zhe ! è gə wɔ́ cəcɛ̃ nɛ, à n’â lyǐrh ǹ yil ré yò ! a zɛ̃̀ à n’â cĩ́ ǹ nyə́ né à wẽ́. ⁵⁶ Wɔ́ rə̀myɛ́ rə̀ wɔ́ à cəl kɔn ré, bə̀ à n’â wɛ̀rhɛ́ ǹdə ǹ nyə́ né gə́ n’ê byili ní. ⁵⁷ Ǎ Bə-zhɔ-zhe ! àmyɛ́ cəl kɔn rɛ́, wɔ́ sə a cĩ́ ǹ zɔ̀mà nɛ́ à wẽ́. ⁵⁸ À n’â byẽ̀ mó ǹdə́ à wu gakó : Dǔr à nɔ̀nɔ̀ ǹdə ǹ nyí-bɛlɛ́ y gə́ byili ní ta ! ⁵⁹ À n’â tɛ́rɛ́ ǹ sɔ́msɛ́ yò, a tɛ́rɛ́ à zhə̀zhèè ré yò, a zɛ̃̀ à n’â zhə̀l ǹdə ǹ nyə́ né gə́ byili ní. ⁶⁰ À n’â wɛ̀rhɛ́ làlà, à yə̀ wə̀l bə̀ wɔ́ dɛ̃ dõ à m’a wɛ̀rhɛ́ ǹdə ǹ nyə́ né gə́ n’ê byili ní yé. ⁶¹ Lyi-bəlwǎlsɛ́ pàm pǎm rɛ sə kɛ̀lɛ̀ nɛ ; sə à t’â swě ǹ nyə́ né yò gaga yé. ⁶² Cəcɛ̃ swélé bɔ̀l w à n’â zɛ̃̀ à zǔl mó, ǹ cángá zɔ̀mà nɛ́ yil yilə. ⁶³ Àmyɛ́ wɔ́ lyì bí byɛ̀bɛ́ gakó bə̀ n’ê nyàm mɔ́ mɔ́, ǹdə́ byɛ̀bɛ́ bə̀ n’ê cĩ́ ǹ nyə́ né bə̀ wẽ́ mó dɔwa. ⁶⁴ Ǎ Bə-zhɔ-zhe ! cɛ y gakó sú ǹdə́ ǹ wu-bɔ̀nɔ̀ wá ; Cèrhè ne ǹ nyə́ né ! ⁶⁵ Ǎ Bə-zhɔ-zhe ! ǹ nə́ ǹ wɛ̀rhɛ́ cɛ̀nɛ̀ ǹ tùntùnnə mó ne ǹdə ǹ nyì-bwelé y gə́ byili ní ta. ⁶⁶ Cèrhè ne lwar ǹdə́ cɛ̀nɛ̀ tũ̌, bə̀ à n’â zwẽ ǹ nyə́ né nyí. ⁶⁷ À yó la m’ê b’o lwəl tɛ̃́ mɔ́, ǹdə́ à y’à jé ; Sə èlǎsɛ̃́ à n’â wɛ̀rhɛ́ ǹdə ǹ zɔ̀mɛ̀ rɛ́ gə́ n’ê byili ní. ⁶⁸ Ǹ càn, ń jà ǹ nə́ ǹ wɛ̀rhɛ́ cɛ̀nɛ̀ ; Cèrhè ne ǹ nyə́ né ! ⁶⁹ Cìn-byilu cìnə́ n’ê tɛ́rɛ́ kɔma bə̀ góm bə̀ m’ê bwí ǹdə́ nɛ ; Sə è gə wɔ́ àmyɛ́ yilə, à n’â cĩ́ ǹ nyə́ né à wẽ́ ǹdə́ à wu gakó. ⁷⁰ Sə bə̀myɛ́ wun ní wɔ́ wun nə̀ kùl nə zə dwã nɛ ǹdə kɔn yala nwə̃̌ ta ; Sə è gə wɔ́ àmyɛ́ yilə, ǹ nyə́ né wɔ́ à kɔn rə̀ nyɛ̀ ǹdə́ nɛ. ⁷¹ Kɔn y’à càn ǹdə́ àmyɛ́ sə à yó lwəl tɛ̃́, mùnì a cèrhè ǹ nyə́ né lwar. ⁷² Ǹmyɛ́ nyə́ né ǹ púr ǹ nyí ń zɔ̀m àmyɛ́ yil mó, cɔ̃̀ sánnə́má ǹdə́ sə̀byì-kùlì wẽ̀ mɔ̀rhɔ̀. ⁷³ Wɔ́ ǹmyɛ́ jɛ̃̀sɛ́ sə̀ wɛ̀rhɛ́ nɛ, sə̀myɛ́ sə̀ mɔ nɛ ; Ce, pə nɛ surhə a m’a cèrhè ǹ nyə́ né a lwar ! ⁷⁴ Lyì bí byɛ̀bɛ́ bə̀ n’ê nyàm mɔ́ mɔ́ gə nɔ nɛ, bə zɛ̃̀ bə̀ n’ê fùù ǹdə́ wu-nyɔ̃̀, bə̀ à n’â dɛ̃̀ kɔn ǹ nyə́ né ǹ bwəl nə̀ nyí mú wẽ́. ⁷⁵ Ǎ Bə-zhɔ-zhe ! à yě bə̀ ǹ zɔ̀mà nɛ́ ǹ byili mú wɔ́ cángá ; wɔ́ ǹ zhə̀n rɛ́ yil ǹ ce à yó lwəl tɛ̃́. ⁷⁶ Bə̀ ǹ wu-bɔ̀nɔ̀ w zə à wu ni, ǹdə ǹ gə́ bwəl nyí ǹ tùntùnnə mó ne né ta ! ⁷⁷ Ce ǹ nɔ̀nɔ̀ dǔr mó yə̀ nɛ́ ǹdə́ nɛ, mùnì a zə myə̌l ! ǹ nyə́ né wɔ́ à kɔn rə̀ nyɛ̀ ǹdə́ nɛ. ⁷⁸ Bə̀ cìzhìl zə lyì bí byɛ̀bɛ́ bə̀ n’ê nwɛ̀nɛ̀ nɛ nánfò rə bə kùr zhe mó ! Sə àmyɛ́ wɔ́ ǹ nyə́ né à n’â tɛ́rɛ́ à wẽ́. ⁷⁹ Ce lyì bí byɛ̀bɛ́ bə̀ n’ê nyàm mɔ́ mɔ́, ǹdə́ byɛ̀bɛ́ bə̀ yě ń nyə́ né mó, k’a kwẽ̀ bə bə̀ à sono ! ⁸⁰ Bə̀ à zhe ǹ nyə́ né zhə̀n rɛ́, à wu w wẽ́, mùnì ga cìzhìl bə̀k’a pú ni yé ! ⁸¹ À dùr ń vwǎrh mɔ́ kwã nɛ́ a lyɛ̀ɛ̀ ; à n’â dɛ̃̀ kɔn ǹ nyə́ né ǹ bwəl mó wẽ́. ⁸² À yírhə́ né nyǐ nə lyɛ̀ɛ̀ ǹ nyí rí ǹ bwəl mó kwã nɛ́ : A zɛ̃̀ a wɔ̀ : Wɔ́ dǒ dɛ̃ ǹ la à wu ni zal ? ⁸³ Bə̀ à nyɛ̌ ǹdə wɔ́ kwə̀lə̀ è ŋwɛ́nɛ́ nyɛ̀rh wẽ́ ta, à t’â swě ǹ nyə́ né yò gaga yé. ⁸⁴ Ǹ tùntùnnə mó mà n wɛ̀rhɛ́ dwã màngal cɛ yó ? Wɔ́ dǒ dɛ̃ ǹ bàn lyì bí byɛ̀bɛ́ n’ê nwɛ̀nɛ̀ nɛ mɔ́ còrhò-tum pɔ mɔ́ ? ⁸⁵ Cin-byilu cìnə́ bé n’ê kwì gɔ́rɔ́ à yé né ; bə̀ t’â wɛ̀rhɛ́ ǹdə ǹ nyə́ né gə́ n’ê byili ni gaga yé. ⁸⁶ Ǹ nyə́ né gakó wɔ́ zhə̀n dúdú ; À zwə̀ bé n’ê nwɛ̀nɛ̀ nɛ nánfò rə bə kùr zhe yé : Bə̀ ń zwẽ ne ! ⁸⁷ Kɔn y’à dǎl námpɔ́lɛ́ sə bə ji ni tɛ̃́, bə ce a jé tɛ̃́ ; Sə è gə wɔ́ àmyɛ́ yilə, à t’â la ǹ nyə́ né ne yõ̌ gaga yé. ⁸⁸ Ce a zə myə̌l ǹdə ǹ wu-nɔ̀nɔ̀ w gə́ n’ê yǎl nɛ́ ta, mùnì ga a wɛ̀rhɛ́ ǹdə ǹ nyə́ né ǹ púr ǹ nyí ń zɔ̀m ń byili mú ta ! ⁸⁹ Ǎ Bə-zhɔ-zhe ! Ǹ zɔ̀mɛ̀ rɛ́ j’â ŋwɛ́nɛ́ dɛ̃̌ yə né wẽ́ byinə nə̀ bə zhɔ̌ zhe yilə. ⁹⁰ Byinə, byinə gakó ǹ zhə̀n rɛ́ j’â ŋwɛ́nɛ́ ; ǹ wɛ̀rhɛ́ cɛ yá, è j’â zhǐ kəkə. ⁹¹ Wɔ́ ǹmyɛ́ zɔ̀mɛ̀ rɛ́ dɛnnɛ kɔn gakó j’a tó né rə̀ ŋwɛ́nɛ́ zàzà, kɔn gakó wɔ́ ǹmyɛ́ ǹ cǐ ri. ⁹² Ǹ nyə́ né gə y’à də̀ kɔn dɛ̀bɛ́ rə̀ nyɛ̀ à yilə, à gə y’à jé tɛ̃́ à zúzúnú w wẽ́. ⁹³ À t’â la ǹ nyə́ né yò sǒ gaga, bə̀ wɔ́ nə̀myɛ́ dɛnnɛ ǹ nə́ ǹ tó ǹ pɛ nɛ myə̌l. ⁹⁴ Àmyɛ́ wɔ́ ǹmyɛ́ lò : zwẽ ne ! bə̀ wɔ́ ǹmyɛ́ nyə́ né à n’â pyà. ⁹⁵ Lyì-bəlwǎlsɛ́ n’ê dɛ̃̀ nɛ sə̀ la gu ; rə̀myɛ́ ce à n’â pyèrhè à zhɛ̃̌ à cili ń nyə́ né cɛ̀nɛ̀. ⁹⁶ À nə bə̀ kɔn dɛ̀bɛ́ gakó rə̀ wɔ́ wárhgáá mɔ́ zhe swɛ̃́ ; sə ǹ nyə́ né bə swɛ̃́ zhe gaga yé. ⁹⁷ Wɔ́ twər màngal à só ǹ nyə́ né ? Wɔ́ nə̀myɛ́ nə́ wɔ́ kɔn à n’â tɛ́rɛ́ à wẽ́ dɛ̃ gakó. ⁹⁸ Ǹ nyə́ né n’ê pɛ nɛ surhə du à zwə̀ bé, bə̀ wɔ́ nə̀myɛ́ nə̀ n’ê zal nɛ nə̀ m’ê zhə̀l dɛ̃ gakó. ⁹⁹ À nɔ còrhò du à yó-cìnə́ bé gakó, bə̀ wɔ́ ǹ nyə́ né nə̀ wɔ́ à kɔn à n’â tɛ́rɛ́ à wẽ́. ¹⁰⁰ À zhe larma du náncɛrh-ezhɛ̌nsɛ́, bə̀ àmyɛ́ n’â wɛ̀rhɛ́ ǹdə ǹ nyə́ né gə́ n’ê byili ní. ¹⁰¹ À n’â dɛ̃̀ à cìn ni ǹdə́ sɔ́má kɛ̀bɛ́ e bə càn yó zhəl, mùnì ga a zə ǹ zɔ̀mɛ̀ rɛ à wẽ́. ¹⁰² À t’â yẽ̌ ǹ nyə́ né ne yé, bə̀ wɔ́ ǹmyɛ́ ǹ nə́ ǹ cèrhè ne. ¹⁰³ Ǹ zɔ̀mà nɛ́ nyɛ̀ à nyú w du tùr à nyú wə ! ¹⁰⁴ Ǹ nyə́ né dɛnnɛ à n’â tó né à lwar zhə̀n párá, a zɛ̃̀ à n’â cẽ kɔn dɛ̀bɛ́ gakó rə̀ m’a ce a gõ̀ kɔma mɔ́ yò. ¹⁰⁵ Ǹ zɔ̀mɛ̀ rɛ́ wɔ́ pàntɛ́mɛ́ à nèrh kùr wə, ǹdə́ pwèn à sɔ́má y yó. ¹⁰⁶ À n’â bwəl nyí, bə̀ nyǐ à m’a wɛ̀rhɛ́ ǹdə́ ǹ nyə́ né nə̀ wɔ́ cángá mɔ́ gə́ n’ê byili ní, à t’â la nɛ yõ̌ yé. ¹⁰⁷ À yó lwəl tɛ̃́ zhə̀nà : Sə Bə-zhɔ-zhe ! ce a zhə myə̌l ǹ zɔ̀mɛ̀ rɛ́ jàn yilə ! ¹⁰⁸ Ǎ Bə-zhɔ-zhe ! shɛ̀nɛ́ ń zwẽ à lwə̌l mó à n’â lwə̀l mó mó, sə́ cèrhè ne ǹ nyə́ né ! ¹⁰⁹ Zwini j’a zhe ne twéé twéé, bə̀ n’ê pyà à myə̌l ré vǔr. ¹¹⁰ Lyì-bəlwǎlsɛ́ pàm pǎm rɛ à yilə, sə ǹdə́ rə̀myɛ́ ga, à t’â la ǹ nyə́ né ne yõ̌ yé. ¹¹¹ Ǹ nyə́ wɔ́ à cəl kɔn twéé twéé gakó, bə̀ nə̀ wɔ́ wu-nyɔ̃̀ kɔn à wu w wẽ́. ¹¹² À n’â byili à wu w wẽ́, bə̀ nyǐ à m’a wɛ̀rhɛ́ ǹdə ǹ nyə́ né gə́ n’ê byili ní twéé twéé gakó, kɔn m’e yí yó gurə́. ¹¹³ À n’â súl lyì bí byɛ̀bɛ́ bə̀ bə nà èdù yó zhǐ mú, sə àmyɛ́ wɔ́ ǹmyɛ́ à só. ¹¹⁴ Ǹ wɔ́ à shòò jàà ǹdə́ ku kɔ̀bɔ́ ò n’ô cə̀r à yé ne búlə́ jàà wa ; à n’â dɛ̃̀ kɔn ǹ nyì-bwelé y wẽ́. ¹¹⁵ Ámyɛ̌ lyì-bəlwǎlsɛ́, zhəl-na kwã nɛ́ gaga à nyí ni, mùnì ga a wɛ̀rhɛ́ ǹdə à Yi rí nyə́ né gə́ n’ê byili ní ! ¹¹⁶ Ce nyí à kwã nɛ́, mùnì ga zə myə̌l, ǹ bə̀ká yẽ̌ à bùlə̀ né gúgùlí dwã kɔn rɛ́ dɛ̀bɛ́ à n’â dɛ̃̀ ǹ sono mó shò kwã nɛ́ mɔ́ yil yé ! ¹¹⁷ Yẽ̌ a zhí ǹmyɛ́ nɛ, mùnì a nə vwǎrh, mùnì a zɛ̃̀ à n’â cili ǹ nyə́ né sono twéé twéé ! ¹¹⁸ Ǹ nə́ ǹ ce lyì bí byɛ̀bɛ́ bə̀ n’ê yẽ̌ ǹ nyə́ né ne mó gakó vò kwã nɛ́, bə̀ bə̀ bùlə̀ né bə kùr zhe yé, nə wɔ́ myìnù bùlə̀. ¹¹⁹ Ǹ nə́ ǹ vùr lyì-bəlwǎlsɛ́ gakó cɛ yó ǹdə sə̀ zhe jìmdi ta ; wɔ́ rə̀myɛ́ è ce à só ǹ nyə́ né. ¹²⁰ À yala nɛ́ n’ê vɔ́vwǎ, ywẽ né ǹ nə́ ǹ ce mó yilə, bə̀ ǹ bùrsí ywẽ zhe ne. ¹²¹ À n’â wɛ̀rhɛ́ ǹdə ǹ nyə́ né ǹdə́ cángá tumə né gə́ n’ê byili ní : Ce ǹ bə̀ká yẽ̌ ne ń ce à zwə̀ bé jɔ̃̀ w yé ! ¹²² Zwẽ ǹ tùntùnnə mó cɛ̀nɛ̀ rɛ́ rə yə̀ ǹ sono, ǹ bə̀ká yẽ̌ ne cìn-byilu cìnə́ jɔ̃̀ w bə nwɛ̀nɛ̀ yé ! ¹²³ À yírhə́ né nyǐ ǹ vwǎrh mɔ́ jàà nə lyɛ̀ɛ̀, ǹdə́ cángá tumə né ǹ bwəl nə̀ nyí mú jàà w a lyɛ̀ɛ̀. ¹²⁴ Wɛ̀rhɛ́ ǹ tùntùnnə mó ne kɔn tó ǹdə ǹ wu-bɔ̀nɔ̀ w ta, sə́ cèrhè ne ǹ nyə́ né ! ¹²⁵ À wɔ́ ǹ tùntùnnə, cèrhè ne ǹ nyə́ né mùnì ga a zə surhə, a lwar ǹ nyə́ né párá ! ¹²⁶ Yi rí yùwə́, Bə-zhɔ-zhe zɛ̃̀ n twĩ̀ : Bə̀ lyì bí dó ǹ nyə́ né ne. ¹²⁷ Wɔ́ rə̀myɛ́ è ce, àmyɛ́ só ǹ nyə́ né, du sánnə́má, sánnə́má mɔ́ mɔ̀bɔ́ bə̀ shɛ̃̀ bə vùr wárhgáá y mɔ́ : ¹²⁸ Wɔ́ rə̀myɛ́ è ce à pwírí ǹ nyə́ né gakó wɔ́ cángá, à zɛ̃̀ a zhɛ̃̀ kɔma sɔ́msɛ́ dwí gakó. ¹²⁹ Ǹ nyə́ né càn dɛ̃́dɛ̃́ du : ce à zhe ne à wu w wẽ́. ¹³⁰ Ǹ zɔ̀mɛ̀ rɛ́ lwar mɔ́ n’ê pɛ pwẽ̀, rə̀ n’ê pɛ lárma lyì byɛ̀bɛ́ bə̀ bə zwini zhe mó ne. ¹³¹ À n’â púr à nyí, à kùrh à zúzúnú w cǐl, bə̀ ǹ nyə́ né shil zhe ne. ¹³² Pyìrhí ǹ yě ń nyǐ à sono, sə dùr à nɔ̀nɔ̀, ǹdə ń gə́ myɛ̀rhɛ̀ ǹ nə́ ǹ wɛ̀rhɛ́ nɛ́ ǹdə́ lyì bí byɛ̀bɛ́ bə̀ só ǹ yil ré mó ta nɛ́ ! ¹³³ Ce a zhì kẽkẽ ǹ zɔ̀mɛ̀ rɛ́ wẽ́, mùnì ga lwɛlɛ də́-byǐ rə̀dù ga bə̀k’a yə̀ nɛ́ ǹdə́ nɛ yé ! ¹³⁴ Vwǎrh nɛ numbyínsí sə̀ n’ê nwɛ̀nɛ̀ nɛ mɔ́ jɔ̃̀ wa, mùnì ga a zə ǹ nyə́ né à wẽ́ ! ¹³⁵ Ce ǹ pwẽ̀ ré yěr ǹ tùntùnnə mó, sə́ cèrhè ne ǹ nyə́ né ! ¹³⁶ À n’â kúrh à yə́-nàná n’ê dùr nə̀gɔ̀lɔ̀, bə̀ numbyínsí t’â zwẽ ǹ nyə́ né gaga yé. ¹³⁷ Ǎ Bə-zhɔ-zhe, ǹ wɔ́ cángá ! bə̀ ǹ bùrsí n’ê tó sə̀ yé ; ¹³⁸ Ǹ cĩ́ ǹ nyə́ né kùr rí tɛ̃́ càngá ǹdə́ zhə̀n yó. ¹³⁹ À yə̀wǎl rɛ́ n’ê kwɛ̃́ myǐn à wẽ́, bə̀ à zwə̀ bé n’ê swě ǹ zɔ̀mà nɛ́. ¹⁴⁰ Ǹ zɔ̀mɛ̀ gakó námpúm, byili bə̀ nə̀ wɔ́ zhə̀nà, wɔ́ rə̀myɛ́ è ce à só ne. ¹⁴¹ À nyɛ̌ námpɔ́lɛ́, à yə̀ yírh swí yé ; Sə à t’â swě ǹ nyə́ né gaga yé. ¹⁴² Ǹ cángá tumə né, wɔ́ cángá tumə byinə nə̀ bə zhɔ̌ zhe yilə, ǹ nyə́ né zɛ̃̀ nə̀ wɔ́ zhə̀nà. ¹⁴³ Wu-zhìlù ǹdə́ zúzúnú yú ni : Sə ǹ nyə́ wɔ́ à kɔ̀-ènyɛ̀lɛ́. ¹⁴⁴ Ǹ nyə́ né wɔ́ cángá : Pə nɛ surhə, mùnì ga a zə myə̌l ! ¹⁴⁵ Bə-zhɔ-zhe, à n’â byẽ̀ mó ǹdə́ à wu gakó : Zwẽ à yi-co wə, mùnì a zə ǹ nyə́ né à wẽ́ ! ¹⁴⁶ À n’â byẽ̀ mó, Bə-zhɔ-zhe : Vwǎrh nɛ ! mùnì ga a wɛ̀rhɛ́ ǹdə ǹ nyə́ né gə́ n’ê byili ní ! ¹⁴⁷ À n’â damǎ à dùlí à zɛ̃̀, a búbwéé à ce mó ǹdə́ yi gwẽ̌ yə̀ púrh yé, bə̀ à n’â dɛ̃̀ ǹ nyì-bwə̌lsé pyǐrh mó. ¹⁴⁸ Cɛ la b’e m’e yìì e zhɛ̀, ǹdə́ à zɔ à yírhə́ ne a tɛ́rɛ́ ǹ zɔ̀mɛ̀ rɛ́ à wẽ́. ¹⁴⁹ Tə̀ ǹ wu-bɔ̀nɔ̀ yilə, sə́ cili à cəl ré ! Ce a zə myə̌l ǹ zɔ̀mɛ̀ rɛ́ jàn yilə ! ¹⁵⁰ Lyì bí byɛ̀bɛ́ bə̀ n’ê wɛ̀rhɛ́ lwɛlɛ mɔ́, bwəlse à nyí ni, bə̀ bə̀ yẽ̌ ǹ nyə́ né ne, bə vò kwã nɛ́ gaga. ¹⁵¹ Ǎ Bə-zhɔ-zhe, ǹmyɛ́ bwə́l à nyí ni ! Ǹ nyə́ né gakó wɔ́ zhə̀nà. ¹⁵² È də̀ zà ga, à yě bə̀ ǹ cĩ́ ǹ nyə́ né tɛ̃́ byinə nə̀ bə zhɔ̌ zhe yil yé. ¹⁵³ Nyǐ à zúzúnú wə́, sə́ vwǎrh nɛ ! Bə̀ à t’â la ǹ nyə́ né yò sǒ yé. ¹⁵⁴ Zwẽ à nyí ni, sə́ vwǎrh nɛ ; Ce a zə myə̌l ǹdə ǹ gə́ bwəl nyí ní ta ! ¹⁵⁵ Ǹ vwǎrh mɔ́ nyɛ ǹdə́ lyì-bəlwǎlsɛ́, bə̀ sə̀ t’â pyà ǹ nyə́ né yé. ¹⁵⁶ Ǎ Bə-zhɔ-zhe, ǹ nɔ̀nɔ̀ dǔr mó já dɛ̃́dɛ̃́ ! rə̀myɛ́ yilə, ce a zə myə̌l ǹ zɔ̀mɛ̀ rɛ́ jàn yilə ! ¹⁵⁷ Nyǐ à zwə̀ bé ǹdə́ lyì bí byɛ̀bɛ́ bə̀ n’ê nwɛ̀nɛ̀ nɛ mɔ́ já dɛ̃́dɛ̃́ ; Sə à t’â la ǹ nyə́ né ne yõ̌ gaga a vò kwã nɛ́ yé. ¹⁵⁸ À nyɛ̌r myìnù cìnə́ bé, bə̀ t’â wɛ̀rhɛ́ ǹdə ǹ zɔ̀mɛ̀ rɛ́ gə́ n’ê byili ní ta yé. ¹⁵⁹ Nyǐ àmyɛ́ só ǹ nyə́ né : Rə̀myɛ́ ce, Bə-zhɔ-zhe, tə̀ ǹ wu-bɔ̀nɔ̀ w yilə, sə́ ce a zə myə̌l ! ¹⁶⁰ Ǹ zɔ̀mɛ̀ rɛ́ nə̀-kùr jì y cĩ́ zhə̀n rɛ́ yó, ǹ nyə́ né cángá mɔ́ tumə né gakó ŋwɛ́nɛ́ byinə nə̀ bə zhɔ̌ zhe yilə. ¹⁶¹ Pyǎ n’ê nwɛ̀nɛ̀ nɛ nánfò è bə kùr zhe yé, sə wɔ́ ǹmyɛ́ zɔ̀mɛ̀ rɛ́ yé né à wu w n’ô zhízhǐ ní. ¹⁶² À n’â fùù ǹdə́ wu-nyɔ̃̀ ǹ zɔ̀mɛ̀ rɛ́ yilə, ǹdə lò mɔ̀bɔ́ ń jì ń zwə̀ búlə́ jàà w n pwà bə̀ wẽ̀ mó ta. ¹⁶³ À n’â súl kɔma, à bə̀ kɔma só yé, wɔ́ ǹ nyə́ né à só. ¹⁶⁴ Dɛ̃ wẽ́, wɔ́ twər tàlpyɛ̀ à n’â zǔl mó, ǹ nyə́ né nə̀ wɔ́ cángá mɔ́ yilə. ¹⁶⁵ Yə̀-zùlə́ nánfɔ̀lɔ̀ ŋwɛ́nɛ́ ǹdə́ lyì bí byɛ̀bɛ́ bə̀ só ǹ nyə́ né mó, bə̀ zwini də́-byǐ t’â yí bí yé. ¹⁶⁶ Ǎ Bə-zhɔ-zhe, à n’â dɛ̃̀ kɔn ǹ vwǎrh mɔ́ wẽ́ ! a zɛ̃̀ à n’â wɛ̀rhɛ́ ǹdə ǹ nyə́ né gə́ n’ê byili ní. ¹⁶⁷ À n’a nyǐ ǹ nyə́ né, a zɛ̃̀ à só ne dɛ̃́dɛ̃́. ¹⁶⁸ À zhǐ ǹ nyə́ né ǹdə́ nə̀ sɔ́msɛ́ à wẽ́, Bə̀ àmyɛ sɔ́msɛ́ gakó zhǐ ǹ yé né. ¹⁶⁹ Ǎ Bə-zhɔ-zhe, yẽ̌ à búbwéé ne e yí ǹ sono ! Sə pə nɛ surhə ǹdə ǹ nyí rí ǹ bwəl mó gə́ n’ê byili ní ta ! ¹⁷⁰ Sə à lwə̌l mó yí ǹ sono, vwǎrh nɛ ǹdə ǹ nyí rí ǹ bwəl mó gə́ n’ê byili ní ta ! ¹⁷¹ Bə̀ à púr à nyí a m’a zǔl mó a byili, bə̀ ǹ nə́ ǹ cèrhè ne ǹ nyə́ né. ¹⁷² À zə à mə̀jòlò w à m’â nún ǹ zɔ̀mɛ̀ rɛ́ ! Bə̀ nyǐ ǹ nyə́ né wɔ́ cángá. ¹⁷³ Bə̀ ǹ jɛ̃̀ y bə̀ e sɛ̃ nɛ ! Bə̀ wɔ́ ǹ nyə́ né à cír. ¹⁷⁴ Ǎ Bə-zhɔ-zhe, à n’â kúrh ǹ vwǎrh mɔ́ kwã nɛ́, bə̀ ǹ nyə́ né wɔ́ kɔ̀-ènyɛ̀lɛ́ à yilə. ¹⁷⁵ Ce a zə myə̌l, sə a zǔl mó ! sə zɔ̀mà nɛ́ kwɛ̃́ nɛ ! ¹⁷⁶ À nyɛ̌ ǹdə wɔ́ pyìrhə̀ kɛ̀bɛ́ è jé è n’ê yiyiri è yə̀l è gá la má ta : rə̀myɛ́ yilə, zɛ̃̀ ń pyà ǹ tùntùnnə mó, bə̀ nyǐ à t’â swě ǹ nyə́ né yò gaga yé.