¹ Zǔl-nə Bə-zhɔ-zhe, bə̀ ń càn, ń nɔ̀nɔ̀-dǔr mó ŋwɛ́nɛ́ twéé twéé ! ² Esərayɛl lyì : bwə̌l-nə á byili bə̀ ń nɔ̀nɔ̀-dǔr mó ŋwɛ́nɛ́ twéé twéé ! ³ Arɔ̃ kɛ̀lɛ́ y lyì : bwə̌l-nə á byili bə̀ ń nɔ̀nɔ̀-dǔr mó ŋwɛ́nɛ́ twéé twéé ! ⁴ Lyì bí byɛ̀bɛ́ bə̀ n’ê nyàm mɔ mɔ́ : bwə̌l-na á byili bə̀ ń nɔ̀nɔ̀ dǔr mó ŋwɛ́nɛ́ twéé twéé ! ⁵ À zhì à zúzúnú w wẽ́ a byẽ̀ Bə-zhɔ-zhe a wɔ̀ : Bə̀-zhɔ-zhe zwẽ à lwə̌l mó, n zhẽ̌ à yó dɛ̃̌ a nə cìn-cìnú. ⁶ Bə-zhɔ-zhe ŋwɛ́nɛ́ ǹdə́ nɛ, ce kaka ywẽ bə nɛ zhe yé : e zɛ̃̀ wɔ́ bə̀kɔ́n numbyínsi wɔ̌ nɛ sə̀ la wɔ̀rhɔ́ ? ⁷ Wɔ́ Bə-zhɔ-zhe ń wɔ́ à kúrhí sanna mɔ́, ce à gə nɔ à zwə̀ bé à yé né à n’â fùù ǹdə́ wu-nyɔ̃̀. ⁸ Lò gə pyà ń shòò jàà Bə-zhɔ-zhe sono mó, cɔ̃̀ ǹ zhí numbyíní ni ; ⁹ lò gə pyà ń shòò jàà Bə-zhɔ-zhe sono mó, cɔ̃̀ ń zhí lyì-fwààlɛ nɛ. ¹⁰ Tənèsé gakó tú sə kə́kɛ́lɛ́ nɛ sə ce cəcəl wə, sə Bə-zhɔ-zhe yil ré yilə, à nɔ̀m sɛ tɛ̃́ sə bɔbɔlɛ. ¹¹ Sə̀ y’à pú ni tɛ̃́, sə kə́kɛ́lɛ́ nɛ, sə Bə-zhɔ-zhe yil ré yilə, à nɔ̀m sɛ tɛ̃́ sə bɔbɔlɛ. ¹² Sə̀ y’à pú ni ǹdə tùrh ta ; sə sə̀ cù ǹdə wɔ́ sɔr rə̀ y’à kwɛ̃́ myǐn ta ; sə Bə-zhɔ-zhe yil ré yilə, à nɔ̀m sɛ tɛ̃́ sə bɔbɔlɛ. ¹³ Ǹ yà ǹ cìrh ne ǹ la tɛ̃́ ju, sə Bə-zhɔ-zhe kwɛ̃́ ne. ¹⁴ Wɔ́ Bə-zhɔ-zhe ń wɔ́ à jàn rɛ́, wɔ́ ńmyɛ̌ à n’â zùlə́, bə̀ wɔ́ ńmyɛ̌ ń vwǎrh nɛ. ¹⁵ Bɛlɛ jú ǹdə́ vwǎrh mɔ́ bubwéése n’ê dwi wu-cángá cìnə́ bé kwə̀ə́rhé wə : Bə̀ wɔ́ Bə-zhɔ-zhe jə̀-jĩ̀ y è n’ê byili ń jàn rɛ́ ! ¹⁶ Bə-zhɔ-zhe jə̀-jĩ́ y zhẽ̌ dɛ̃̌ ! Bə-zhɔ-zhe jə̀-jĩ́ y n’ê byili ń jàn rɛ́ ! ¹⁷ À t’â la cú yé, à m’a yə̀ nɛ́, a m’a zɔ̀m Bə-zhɔ-zhe tũ̀-fwààlɛ́ yò a byili. ¹⁸ Bə-zhɔ-zhe pɔ nɛ còrhò-tum, sə ń yə̀ nɛ cu jɔ̃̀ w ce yé. ¹⁹ Pul-nə cángá tumə né jì y bwə̀ə̀lé á pɛ̃ : À la zù, mùnì ga a zǔl Bə-zhɔ-zhe. ²⁰ Nyǐ-nə Bə-zhɔ-zhe bwə̀rə̀ yə́ : Wɔ́ èmyɛ́ nɛ wu-cángá cìnə́ bé n’ê tó né bə̀ zwì. ²¹ À n’â zǔl mó, bə̀ wɔ́ ǹmyɛ́ ǹ zwẽ à lwə̌l mó, bə̀ wɔ́ ǹmyɛ́ ǹ vwǎrh nɛ. ²² Nə́kulu w kɔ̀bɔ́ jì-lùrnə bé vùr bə dwĩ̀ kwã nɛ́ mɔ́, wɔ́ òmyɛ́ o jǐrh jì y jàn rɛ́ nə̀kulu wə́. ²³ Wɔ́ Bə-zhɔ-zhe dɛnnɛ rə̀myɛ́ mɔ́ tó né rə bà : Rə̀myɛ́ wɔ́ wò-jɔ̀rɔ̀ nə́ yírhə́ wə. ²⁴ Wɔ́ rə̀myɛ́ è wɔ́ dɛ̃ rɛ́ tɛ̀bɛ́ Bə-zhɔ-zhe wɛ̀rhɛ́ mɔ́ nyɔ̀nɔ̀ ; Bə dɛ̃ rɛ́ rə̀myɛ́ mɔ́ yál kɔn dɛ̀bɛ́ rə̀ wɔ́ wu-nyɔ̃̀ ǹdə́ fùwə́ kɔn nə̀myɛ̌ yilə. ²⁵ Ǎ Bə-zhɔ-zhe, pə ǹ vwǎrh mɔ́ ! Ǎ Bə-zhɔ-zhe, ce kɔn zwẽ nyí ! ²⁶ Bwəl cṹ ŋwɛ́nɛ́ ǹdə́ mɔ̀bɔ́ ń bàn Bə-zhɔ-zhe yil ré yil mó ! Nə́ n’é cĩ́ bwəl ámyɛ̌ Bə-zhɔ-zhe jì y lyì bí gakó yó. ²⁷ Bə-zhɔ-zhe wɔ́ Yi, wɔ́ ńmyɛ̌ ń nə́ ń zə pwẽ̀ ń yə̌r nə́ba. Lyẽ-nə vwĩ̀ rí vwǎm mɔ́ ǹdə́ nyáná á m’a bə̀ vwĩ̀-jùlú w nyimi ní səta ! ²⁸ Ǹ wɔ́ à Yi, à n’â zǔl mó ; À Yi ! À m’a cèrhé ǹ yil ré. ²⁹ Zǔl-nə Bə-zhɔ-zhe, bə̀ ń càn, ń nɔ̀nɔ̀-dǔr mó ŋwɛ́nɛ́ twéé twéé !