¹ Farɛzhɛ̃ɛ̃bá ǹdǝ́ Sadǝsǝnyɛbá y'à n'ê yǎl bǝ zhẽ̀ Yezu. Bǝ zɛ̃̀ bǝ yí ń nyí ni, bǝ lwǝ̀l mò bǝ̀ ń wɛ̀rhɛ́ màmyɔ ò n'ô byili bǝ̀ wɔ́ Yi rǝ̀ twĩ̀ mù. ² Yezu wɔ̀ bɛ: «[Dǝ̀dɛ̀nɛ́ yi gǝ yúwǝ́, á gǝ pwírí cɛ y nyɛ̌ nánshɔ̃̀ dɛ̃̌, á y'ǎ wɔ̀ bǝ̀ dwà t'â la nyɔ́ yé. ³ Á gǝ nɔ bǝ́ban rǝ̀ ŋwɛ́nɛ́ yi-pwírhí sǝta nǝkɔkɔ́lɛ́ nɛ, á y'ǎ wɔ̀ bǝ̀ dwà y m'a bǝ̀ zà. Byè yil á yě wẽ̀ tɛ̀bɛ́ rǝ̀ n'ê wɛ̀rhɛ́ dɛ̃̌ yi w mú kùrǝ̀, á j'ǎ yǝ̀l tɛ̀bɛ́ rǝ̀ n'ê wɛ̀rhɛ́ cɛ yó èlǎsɛ̃́ mɔ́ kùrǝ̀?] ⁴ Lũ w kɔ̀bɔ́ lyì bí wɔ́ lwɛlɛ cìnǝ́, bǝ̀ dùr bǝ yẽ̌ Yi ni. Bǝ̀ n'ê yǎl bǝ̀ bǝ̀ wɛ̀rhɛ́ màmyɔ bǝ̀ yírhǝ́ na, sǝ bǝ̀ t'â la màmyɔ òdù ga nɔ kǝ́dò yé, è gǝ dǝ̀ kɔn dɛ̀bɛ́ rǝ̀ wɛ̀rhɛ́ Zhɔnaasɛ nɛ mɔ́ dúdú.» Rǝ̀myɛ́ kwã nɛ́, Yezu zɛ̃̀ n zhǐr n yẽ̌ be. ⁵ Yezu kwã-lyì bí byɛrhɛ bə vò mwə̃́ y èpákɛ̀, sə bə̀ yʼà swě bə̀ yə̀ búrú zal yé. ⁶ N zɛ̃̀ n wɔ̀ bɛ: “Dɛ̃̌-na á cìn ǹdə́ Farɛzhɛ̃ɛ̃bá ǹdə́ Sadəsənyɛbá sã̀-nə̀byẽ̌ ré.” ⁷ Ń kwã-lyì bí zɛ̃̀ bə̀ nʼê zɔ̀m ǹdə́ dwã bə̀ zhe: “E zɛ̃̀ wɔ́ nə́myɛ̌ gə́ yə̀ búrú zal mɔ́ yil ń nə́ ń zɔ̀m èta?” ⁸ Yezu lwar bə̀ gə́ nʼê zɔ̀m nɛ́, n zɛ̃̀ n wɔ̀: “Á yə̀ nɛ zhí ǹdʼá wun gakó yé. Byè yil á nʼá zɔ̀m ǹdə́ dwã bə̀ wɔ́ á gə́ yə̀ búrú zal mɔ́ yil à nʼâ zɔ̀m èta? ⁹ Á gwẽ̌ bə nə̀ kùrə̀ nyɛ̌? Á tʼá lyǐrh búúrí rə̀nu y à yʼà pɔ bala bɛ́ mɔ̀ɔ̀rhɛ́ rə̀nu y ni bə dɔ̃̀ mɔ́? Á yʼǎ pwà yəywaalɛ́ rə sú cǐrhni màngala? ¹⁰ Á kʼá tʼá lyǐrh búúrí tàlpyɛ̀ y à yʼà pɔ bala bɛ́ mɔ̀ɔ̀rhɛ́ rə̀na y nɛ bə dɔ̃̀ mɔ́ myɛ? Á yʼǎ pwà yəywaalɛ́ á sú cǐrhni màngala? ¹¹ À gə́ wò bə̀ dɛ̃̌-na á cìn ǹdə́ Farɛzhɛ̃ɛ̃bá ǹdə́ Sadəsənyɛbá sã̀-nə̀byẽ̌ ré mó, byè yil á yə̀l bʼè də̀ búrú yò à nʼâ zɔ̀mà?” ¹² Rə̀myɛ́ yó, ń kwã-lyì bí lwar bʼè də̀ sã̀-nə̀byẽ̌ ré tɛ̀bɛ́ bə̀ nʼê ce búrú w wẽ́ mó yò ń nə́ ń zɔ̀m yé. Wɔ́ Farɛzhɛ̃ɛ̃bá ǹdə́ Sadəsənyɛbá kàrmɔ́ yò ń nə́ ń zɔ̀mà. ¹³ Yezu gə́ tú n yí Shilipu Səzarɛ cɔ w wa, n zɛ̃̀ n bwə̀rh ń kwã-lyì bí n wɔ̀: “Lyì bí nʼê wə̀l bə̀ Numbyíní Byǐ wɔ́ mɔ̌?” ¹⁴ Bə wɔ̀ mɔ̀: “Lyì bí jàlà nʼê wə̀l bə̀ ǹmyɛ́ wɔ́ Zhã-Bətiisi; jàlà zhe bə̀ wɔ́ Elyi; jàlà myɛ zhe bə̀ wɔ́ Zheremyi, ráá Yi nyì-zwennə dõ.” ¹⁵ N zɛ̃̀ n bwə̀rh bè n wɔ̀: “Sə ámyɛ̌, á nʼá wə̀l bʼàmyɛ́ wɔ́ mɔ̌?” ¹⁶ Shəmɔ Pyɛɛrɛ wɔ̀ mɔ̀: “Wɔ́ ǹmyɛ́ ǹ wɔ́ Kristə mó, Yi nã́nyì Byǐ mú.” ¹⁷ Yezu zɛ̃̀ n wɔ̀ mɔ̀: “Zhɔnaasɛ byǐ Shəmɔ, ǹ wɔ́ wu-nyɔ̃̀ cə́bal, bʼè də̀ ǹ sə̀pwà surhə ǹ bə́ lwar rə̀myɛ́ yé. Wɔ́ à Da mɔ́ ń ŋwɛ́nɛ́ Arəzana w mɔ́ ń byili mú. ¹⁸ Sə àmyɛ́ nʼâ wə̀l mó: ǹ yíl ‘Nə́kulu’,* sə wɔ́ nə́kulu w òmyɛ́ yó à mʼa lù à gùlú w ní ǹdə jì ta, sə cu myɛ cìcì tʼâ la ò yàlà zal yé. ¹⁹ À mʼa pɔ̃́ Arəzana tənà y bwə̀l-byǎ bɛ́. Kɔn dɛ̀bɛ́ ǹ gə lyẽ cɛ yó, bə̀ mʼa lyẽ re Arəzana w myɛ. Kɔn dɛ̀bɛ́ ǹ gə bwèlé cɛ yó, bə̀ mʼa bwèlé re Arəzana w myɛ.” ²⁰ Rə̀myɛ́ yó, n zɛ̃̀ n pə nyí ń kwã-lyì bí ni n wɔ̀: “Á bə̀kʼá shɛ̀nɛ́ á byili lò lò nè bə̀ wɔ́ àmyɛ́ à wɔ́ Kristə mó yé.” ²¹ Kɔn zhí rə̀myɛ́ yi ní, Yezu ji kùr ń nə́ ń byili ń kwã-lyì bí ni pamparɛ̃ɛ̃ bə̀ kɔn wɔ́ nyɔ́ɔ́ bə̀ ń zhəl Zhərəzalɛm, cɔ w náncɛsɛ́ ǹdə́ Yi jì y vwĩ̀-zwə́lnə bé yé né cìnə́ bé ǹdə́ Muyiisi nyə́ né byilnə bé zə mɔ, bə nwɛ̀nɛ̀ mɔ̀ dɛ̃́dɛ̃́, bə gu mu, sə ń mà n ká n bwìrhì ń dwã nə̀tɔ̀ yùwə̀. ²² Pyɛɛrɛ zɛ̃̀ n byẽ̀ mò n mə n vò kwã nɛ́, ń nə́ ń ji mu búlə́ ń zhe: “Cinnǝ, Yi tʼâ la rə̀myɛ́ shɔ̀nɔ́ yé. Rə̀ bʼa yìlì mú.” ²³ Yezu pyìrhí n wɔ̀ mɔ̀: “Zhəl kwã nɛ́ à nyí ni Shətana. Ǹ nə́ ǹ cə̀r à sɔ́má nɛ, bə̀ ǹ tá ǹ bùl Yi nyə̀ná nɛ́ yé. Wɔ́ numbyínsí nyə̀ná ǹ nə́ ǹ bùlə̀.” ²⁴ N zɛ̃̀ n wɔ̀ ń kwã-lyì bí ni: “Lò mɔ̀bɔ́ ǹ nə́ ǹ yâl ń tó àmyɛ́ nɛ, sə́ zhɛ̃̀ ǹ cìnə̀, ń kwè ǹ də̀-jɔrhɔ́ w ń zhĩ ń mə́ tó ne.* ²⁵ Lwar-na bə̀ lò mɔ̀bɔ́ ǹ nə́ ǹ shili ǹ myə̂l ré, rə̀ mʼa sá, sə lò mɔ̀bɔ́ ǹ shɛ̀nɛ́ ǹ myə̂l ré sɔ́ àmyɛ́ yilə, ǹ mʼâ kʼá nə rɛ. ²⁶ Lò gə nɔ lũ w kɔn gakó, n jà n dwĩ̀ ń cìnə̀, ń nɛrɛ́ y zhe kùrə̀? Kɔn ŋwɛ́nɛ́ lò wɔ̌ ń pɛ n mə lyə́r ń myə̂l ré? ²⁷ “Zhə̀nà, Numbyíní Byǐ mà n zə ń màlɛ́kabá n bə̀ ǹdə́ ń Da zùwə́ yə́. Sə rə̀myɛ́ yó, ń mà n kwɛ̃̌ lò gakó kɔn myɛrhɛ dwã ǹdə́ ǹ tùntwə̃̀ə̃̀ né. ²⁸ Zhə̀nà, à nʼâ wə̀l ába: lyì bí byɛ̀bɛ́ bə̀ zhǐ nyɔ̀nɔ̀ mɔ́ jàlà tʼâ la cú ǹdə́ bə̀ yírhə́ yə̀ Numbyíní Byǐ nɛ ń bàn ǹdə́ ń pyɛ̀lɛ̀ rɛ́ yé.”