¹ Rə̀myɛ́ kwã nɛ́, Farɛzhɛ̃ɛ̃bá ǹdə́ Muyiisi nyə́ né byilnə bé jàlà shí Zhərəzalɛm bə bə̀ Yezu sono bə bwə̀rh mò bə wɔ̀: ² “Byè yil ǹ kwã-lyì bí tʼâ zwẽ nə́ nàmbala bɛ́ lùl-e-pwírí y nyə́ né? Bə̀ tʼâ sàm bə̀ jɛ̀sɛ́ ǹdə lùl-e-pwírí y gə́ nʼê byili ní bə̀ mʼê jí kùjú.” ³ Yezu wɔ̀ bɛ: “Sə ámyɛ̌, byè yil á tə̀ á nàmbala bɛ́ lùl-e-pwírí y yil á tʼá zwẽ Yi nyə́ né? ⁴ Yi wòwə̀: ‘Nyám ǹ da ǹdə́ ǹ ná. Rə súlí rə wɔ̀: Lò mɔ̀bɔ́ ǹ bwəl lwɛlɛ ń pə ǹ da ráá ǹ ná nɛ, bə̀ mǝ̌ sə bə gu mú.’ ⁵ Sə ámyɛ̌ nʼá wə̀l lyì bí ni bə̀ lò wɔ̌ ń wə̀l ń da ráá ń ná nɛ: ‘À zhe kɔn à yʼà nʼâ yǎl a pɔ̃́, sə wɔ́ Yi ni à mǝ̌ sʼa pə rɛ.’ ⁶ Á nʼá wə̀l bə̀ lò gə wò èta, kɔn kʼê də̀ nyɔ́ɔ́ bə̀ ń sɛ̃ bɛ yé. Á tə̀ á lùl-e-pwírí y èta mɔ́ yil á ce Yi zɔ̀mɛ̀ rɛ́ jǐrh kɔn nánfò. ⁷ Á wɔ́ myìnù cìnə́. Kɔn dɛ̀bɛ́ Yi nyì-zwennə Ezəyi byili á shò-kwã nɛ́ mɔ́ wɔ́ zhə̀nà. Ń byili bə̀ Yi wòwə̀: ⁸ ‘Lyì bí byɛ̀bɛ́ wɔ́ bə̀ nyú w dúdú bə̀ nʼê cèrhé ne né, sə bə̀ wun ní nyɛ ǹdə́ nɛ. ⁹ Bə̀ nʼê cèrhé ne, sə bə̀ còrhó w bə kùr zhe yé, bə̀ kɔn dɛ̀bɛ́ bə̀ nʼê cèrhè lyì bí ni mú wɔ́ numbyínsi nyə́.’ ” ¹⁰ Yezu zɛ̃̀ n byẽ̀ lyì-zhǎ bɛ́ bə bə̀ ń nyí ni, n wɔ̀ bɛ: “Cili-nə kɔn dɛ̀bɛ́ à la ába byilu mú. ¹¹ Lwar-na bʼè də̀ kɔn dɛ̀bɛ́ rə̀ nʼê shí pwẽ̀ nè rə̀ zwì numbyíní wẽ́ mó rə̀ nʼê pɛ y jìmdì yé. Wɔ́ tɛ̀bɛ́ rə̀ nʼê shí numbyíní wẽ́ mó rə̀ nʼê pɛ y jìmdì.” ¹² Rə̀myɛ́ yó, ń kwã-lyì bí zɛ̃̀ bə yí ń nyí ni, bə wɔ̀ mɔ̀: “Ǹ yě? Ǹ zɔ̀mà nɛ́ èta mɔ́ nʼê nwɛ̀nɛ̀ Farɛzhɛ̃ɛ̃bá dɛ̃́dɛ̃́.” ¹³ N wɔ̀ bɛ: “Cǒ kɔ̀bɔ́ gakó ò də̀ à Da mɔ́ ń ŋwɛ́nɛ́ Arəzana w mɔ́ ń zhele wə, bə̀ mʼa mǔr wə. ¹⁴ Yẽ̌-nə be, bə̀ bə̀ wɔ́ lyìlyə̂r rə̀ nʼê vwɛ̃ dwã. E jà lyìlyǒ gə nʼô vwɛ̃ ò dõ lyìlyǒ rǝ̀myɛ́ rǝ̀lyè y ga m'a tu gɔ́rɔ́ wa.” ¹⁵ Pyɛɛrɛ zɛ̃̀ n wɔ̀ mɔ̀: “Byili nə́ba səswalá y ǹ ju ń pə lyì-zhǎ bɛ́ nɛ mɔ́ kùr ré.” ¹⁶ Yezu wɔ̀: “Ámyɛ surhə né gwẽ̌ yə̀ pul nà? ¹⁷ Á yə̀l bə̀ kɔn dɛ̀bɛ́ numbyíní nʼê ce è nyú w mú nʼê zhə̀l è sùlú w wẽ́, rə̀myɛ́ kwã nɛ́, e zɛ̃̀ e to re tɛ̃́ nà? ¹⁸ Sə kɔn dɛ̀bɛ́ rə̀ nʼê dwi numbyíní nyú wə, wɔ́ è wu w wẽ́ rə̀ nʼê shí ní. Wɔ́ rə̀myɛ́ rə̀ nʼê pɛ jìmdì numbyíní ni. ¹⁹ Lwar-na bə̀ wɔ́ wu w wẽ́ bùlə̀ námməlwǎlsɛ́ nʼê shí ní: lyì-guuri, ǹdə́ fwǝ̌l tumə, ǹdə́ ŋwɔ̀lɛ̀, ǹdə́ kɔma góm e ce dõ nyí ni bùrsì jàà wà, ǹdə́ dõ yil zhìlù. ²⁰ Wɔ́ rə̀myɛ́ gakó rə̀ nʼê pɛ jìmdì numbyíní ni, sə e jí ǹdə́ è yə̀ jɛ̀rh sàm tʼâ pɛ jìmdì numbyíní ni yé.” ²¹ Yezu zɛ̃̀ n zhǐr gàà n vò Tiiri ǹdə́ Sədɔ̃ tənà y wa. ²² Kanãã lyì kɛ̃ mə̀dù yà ń ŋwɛ́nɛ́ gàà. N zɛ̃̀ n bə̀ Yezu sõ, ń nə́ ń bya ń zhe: “Yó-cə́bal, Dəvyidi Byǐ, dǔr à nɔ̀nɔ̀. Nyǐ nə̀cílí námməlwɛ̀lɛ́ nʼê nwɛ̀nɛ̀ à bə̀kɔ́ dɛ̃́dɛ̃́” ²³ Sə Yezu yə̀ mɔ lyár bə̀ kaka yé. Ń kwã-lyì bí zɛ̃̀ bə yí ń nyí ni bə lwə̀l mò bə wɔ̀: “Ce n ká n vò jè. Ń nə́ ń ce sɔ̀ nə́ yó wə.” ²⁴ 24 N wɔ̀ bɛ: “Bə̀ yə̀ nɛ̀ twĩ̀ lyì dwã yil yé. Wɔ́ Esərayɛl lyì bí bə̀ nyɛ̌ ǹdə pyììsì shɛ̀bɛ́ sə̀ jé ta mɔ́ yil bə̀ twĩ̀ nì.” ²⁵ Kɛ̃ mɔ́ zɛ̃̀ n bwəlse, n jòm ń nə̀dwə́nə́ yó, n wùlì Yezu yé né n wɔ̀ mɔ̀: “Yó-cə́bal, sɛ̃ nɛ.” ²⁶ Yezu wɔ̀ mɔ̀: “Kɔn bə mǝ̌ bə̀ bə̀ kwě bə̀sɔ́ná kùjú bə pə kùl-bwálsɛ nɛ yé.” ²⁷ Kɛ̃ mɔ́ zɛ̃̀ n wɔ̀ mɔ̀: “Rə̀myɛ́ wɔ́ zhə̀n yó-cə́bal, sə kùl-bwálsɛ́ myɛ yʼa jí kùjú w yəywaalɛ́ tɛ̀bɛ́ rə̀ nʼê lwé tɛ̃́ sə̀ cìnə́ bé kùr w mó.” ²⁸ Rə̀myɛ́ yó, Yezu zɛ̃̀ n wɔ̀ mɔ̀: “Kɛ̃, ǹ zhí ni ǹdə́ ǹ wu gakó zhə̀n zhə̀nà. Rə̀myɛ́ ce, kɔn mʼa yə̀ ǹdə ǹ gə́ nə́ ǹ yǎl nɛ́.” Ń bə̀kɔ́ mɔ́ já n wárh rə̀myɛ́ yi ní cìcì. ²⁹ Rə̀myɛ́ kwã nɛ́, Yezu zhǐr gàà, n vò Gəlile mwə̃́ y yó. N zhì gàà n jì pyɔ̀ òdù yó, n jòm tɛ̃́. ³⁰ Lyì nánzhəzhɔ̌ zɛ̃̀ bə zə nə̀bwànà bə bə̀ ń sono: è yʼà wɔ́ lyìlyə̂r, ǹdə́ gwànsɛ̀ dwí gakó, ǹdə́ sə̀bwààrhɛ̀, ǹdə́ nə̀bwànà dwã nánzhəzhɔ̌; bə cĩ́ bi ń yé né, n wárh bɛ. ³¹ Lyì-zhâ bɛ́ gə́ nɔ sə̀bwààrhɛ́ rə̀ nʼê zɔ̀mà, gwànsɛ́ zɛ̃̀ sə̀ nʼê zhə̀lə̀, byɛ̀bɛ́ bə̀ yʼà nʼê twi cə́ né mó nʼê zhə̀l náàcɛ̀nɛ́, lyìlyə̀ə́ré yírhə́ púr, kɔn jàr bɛ̀ dɛ̃́dɛ̃́. Bə zɛ̃̀ bə̀ zhe: “Esərayɛl Yi rí nə còrhó!” ³² Yezu byẽ̀ ń kwã-lyì bí n wɔ̀ bɛ: “Lyì-zhǎ bɛ́ byɛ̀bɛ́ gə́ ŋwɛ́nɛ́ ǹdə́ nɛ mɔ́ zhe dwã nə̀tɔ̀ zà, bə jʼà bə kaka zhe bə̀ la jú yé. Rə̀myɛ́ ce, bə̀ nɔ̀nɔ̀ zhe ne. À tʼâ yǎl a ce bə kʼa kwɛ̃̀ ǹdə́ bə̀ nɔrh mɔ́ yé. Dɛ̀ga bə̀ tʼâ la ŋwɔ̀nɔ́ bə yí jè yé.” ³³ Ń kwã-lyì bí wɔ̀ mɔ̀: “Yẽ̀ nə́ nə mʼâ nə kùjú ní gɔ-elũ èpòlò w kɔ̀bɔ́ wẽ́ nə́ pə lyì-zhǎ bɛ́ byɛ̀bɛ́ nɛ bə jí bə sú?” ³⁴ N zɛ̃̀ n bwə̀rh bè n wɔ̀: “Búúri màngal rə̀ ŋwɛ́nɛ́ á byẽ́?” Bə wɔ̀ mɔ̀: “Búúri tàlpyɛ̀ ǹdə́ émɔ̌rh màngɛlɛ́ rə̀ ŋwɛ́nɛ́ nə́ sõ.” ³⁵ N pə nyí lyì-zhǎ bɛ́ nɛ bə̀ bə̀ jǒm tɛ̃́, ³⁶ n zɛ̃̀ n zwẽ búúrí tàlpyɛ̀ y ǹdə́ émɔ̌sɛ́, n ce Yi nə̀báná, n kə́ kə́ rɛ dwã wa, n pə ń kwã-lyì bí ni bə bʼe tə̀ lyì-zhǎ bɛ́. ³⁷ Bə̀ gakó dɔ̃̀ bə sú. Ń kwã-lyì bí pwà yəywaalɛ́ rə̀ dàl mɔ́ rə sú cǐrhni nyàlpyɛ̀. ³⁸ Kana bɛ́ ǹdə́ bə̀sɔ́ná bɛ́ byɛ̀bɛ́ bə̀ tó bə jí kùjú mú twə́r gə yə̀ nɛ́ ce, bala bɛ́ dúdú yʼà wɔ́ mɔ̀ɔ̀rhɛ̀ rə̀na. ³⁹ Rə̀myɛ́ kwã nɛ́, n ce lyì-zhǎ bɛ́ kʼa kwɛ̃̀, n zɛ̃̀ n zù bǔ-bwəl wə, n byɛrhɛ n vò Magadã tənà y wa.