koussoube-marc-lee_lev_text

Kǝ̀kàl-fwɛ̀lɛ̀ 6

¹ Cinu zɔ̀m ǹdə́ Muyiisi n wɔ̀: ² «Pə nyə́ né nyɛ̀bɛ́ Aarɔ̃ ǹdə́ ń byǎ bɛ́ nɛ ń wɔ̀: Nyǐ vwĩ̀ námpúm cɛ̃́ɛ̃́ rɛ́ zwə́l mó nə̀-twéésé: vwĩ̀ námpúm cɛ̃́ɛ̃́ rɛ́ n'ê mɛ̃ vwĩ̀-jùlú w myǐn mú w cəcɛ̃ y námpúm kɔn m'e yí cɛ y lá ǹdə́ mə̀ j'â zhe. ³ Vwĩ̀-zwə́lnə mó mà n zù ń lɛ̃̌ kàmə̀zù-elyɛ̃nɛ́ yá, n súlí n ce lɛ̃̌ jar; ń mà n pwà vwĩ̀ námpúm cɛ̃́ɛ̃́ rɛ́ rə̀ jú myǐn mú nwǐsí tɔ̀mdɛ́, n cĩ́ vwĩ̀-jùlú w sarh nɛ. ⁴ Rə̀myɛ́ kwã, ń mà n vùr ń gàndɛ́ n zɛ̃̀ n zù rə̀ dwã; n kwè nàmá bɛ́ nwǐsí tɔ̀mdɛ́ n mə n du zulə́ jàà y wa, n vò jàà y kɛ̀bɛ́ bə̀ cír rə̀ yil mú wẽ́. ⁵ Sə è gə wɔ́ vwĩ̀-jùlú w myǐn mú, mə̀ m'à j'â zhe gaga, mə̀ t'â la cú yé; nəkɔkɔ́lɛ́ gakó, vwĩ̀-zwə́lnə mó mà n ce dǎr mə̀ wẽ́, n pyɛ̀lɛ́ vwĩ̀ námpúm cɛ̃́ɛ̃́ kɔn rɛ́ rə̀ yó, n súlí n ji yə̀-zùlə́ vwə̃̀ né nwǐsí myǐn. ⁶ Myǐn m'à j'â zhe vwĩ̀-jùlú w yó twéé twéé, sə mə̀ j'â t'â la cú yé. ⁷ Nyǐ vɔ̀lɔ́ kɔn rɛ́ pɔ mɔ́ nə̀-twéésé: Wɔ́ Aarɔ̃ byǎ bɛ́ bə̀ mə̌ sə bə zhì vwĩ̀-jùlú w yé y wə, bə pə rɛ Cinu ni. ⁸ Vwĩ̀-zwə́lnə mə̀dù nə́ ń tɛ̃́ mún mú mə̀ búl mə̀ càn nwə̃̌ y ló mə̀ yó mó jə̀-gúl yírh n súlí n kwè ãsã́ y bə̀ cĩ́ vɔ̀lɔ́ kɔn rɛ́ yó mó n ji myǐn vwĩ̀-jùlú w yó: rə̀ wɔ́ lwẽ́ nã́nyə̀nyɛ̀lɛ́, lyìrhə́ kɔn rɛ́ Cinu yilə. ⁹ Vɔ̀lɔ́ kɔn rɛ́ tɛ̀bɛ́ rə̀ dàl mɔ́, Aarɔ̃ ǹdə́ ń byǎ bɛ́ m'a jí ri; bə̀ t'â la sã̀-nə̀byẽ̌ rə̀ wẽ́ co bə m'e jí ri yé, sə bə̀ m'a jí ri jàà y kɛ̀bɛ́ bə̀ cír rə̀myɛ́ mɔ́ yil mú wẽ́; bə̀ m'a jí ri dwã-joló kòrhó w kɔ̀nɔ́ w wu w wə; ¹⁰ bə̀ t'â la sã̀-nə̀byẽ̌ rə̀ wẽ́ co bə m'e jí ri yé. Wɔ́ cəl ré tɛ̀bɛ́ à n'â pɛ bɛ kùjírə́ nyɛ̀bɛ́ bə̀ n'ê ji nə̀ gakó myǐn bə̀ pɛ nɛ mɔ́ wẽ́ mó. Cəl ré rə̀myɛ́ wɔ́ Cinu dúdú nyǎn ǹdə kɔn rɛ́ tɛ̀bɛ́ rə̀ n'ê dàl yə̀-bəlɔ̀lɔ́ sǔbri lwə̌l vwĩ̀ rí ráá yò kɔrhɔ vwĩ̀ rí yi ní mú ta. ¹¹ Bal mɔ̀bɔ́ gakó ń wɔ́ Aarɔ̃ byǐ wɔ̌ ń jí ri; rə̀ wɔ́ nyí rə̀ m'à j'â ŋwɛ́nɛ́ twéé twéé á yilə, byin byin gakó, kùjírə́ nyɛ̀bɛ́ nə̀ gakó jú myǐn Cinu yil mú shò kwã nɛ́; kɔn dɛ̀bɛ́ gakó rə̀ dwə̀rh re m'a jǐrh Cinu nyǎn.» ¹² Cinu zɔ̀m ǹdə́ Muyiisi n wɔ̀: ¹³ «Nyǐ pɛnɛ́ y kɛ̀bɛ́ Aarɔ̃ ǹdə́ ń byǎ bɛ́ m'a zə bə bə̀ bə pə Cinu ni, dɛ̃ rɛ́ tɛ̀bɛ́ bə̀ m'a tútǔ mu ǹdə́ nwə̃̌ bə m'e cír mu mú: mún cəə́le rə̀tɔ̀ dɛ̃ wẽ́, mə̀ kə̀kàlà èdù y nəkɔkɔ́lɛ́, mə̀ kə̀kàlà y dõ mó də̀dɛ̀nɛ́. ¹⁴ Ǹ m'ǎ ywə́rh mún mú ǹdə́ nwə̃̌, ń zɛ̃̀ ń ji mu ǹdə́ ŋwàn-tɔ́rɔ́; ǹ m'ǎ kə́ kə́ ŋwɛ̀mɛ́ y éfòró ń zɛ̃̀ ń pɛ y Cinu ni, e yə̀ lwẽ́ nã́nyə̀nyɛ̀lɛ́ Cinu yilə. ¹⁵ Aarɔ̃ byǐ mú mɔ̀bɔ́ bə̀ m'a tútǔ ǹdə́ nwə̃̌ n jǐrh vwĩ̀-zwə́lnə náncɛ ń jàà w myɛ mà n wɛ̀rhɛ́ èta: rə̀ wɔ́ nyí rə̀ m'à j'â ŋwɛ́nɛ́ gaga yilə; bə̀ m'a ji pɛnɛ́ y myǐn dɔ́dɔ́ Cinu yilə. ¹⁶ Vɔ̀lɔ́ kɔn dɛ̀bɛ́ gakó vwĩ̀-zwə́lnə la pɔ mɔ́ púlə́púlə́ m'a jí myǐn Yi yilə: rə̀ kaka t'â la nyú w co yé.» ¹⁷ Cinu zɔ̀m ǹdə́ Muyiisi n wɔ̀: ¹⁸ «Wál Aarɔ̃ ǹdə́ ń byǎ bɛ́ nɛ: Nyǐ yə̀-bəlɔ̀lɔ́ sǔbri lwə̌l vwĩ̀ rí nə̀-twéésé: Bə̀ n'ê zwə́l yə̀-bəlɔ̀lɔ́ sǔbri lwə̌l vwĩ̀ kɔn rɛ́ jàà y kɛ̀bɛ́ bə̀ n'ê zwə́l vwĩ̀ námpúm cɛ̃́ɛ̃́ kɔn rɛ́ è wẽ́ mó, Cinu yé né; rə̀ wɔ́ Yi dúdú nyǎn. ¹⁹ Wɔ́ vwĩ̀-zwə́lnə mó mɔ̀bɔ́ ń zwə́l vwĩ̀ rí rə̀myɛ́ mɔ́ ń wɔ̌ ń mà n dɔ̃̀ rə̀ nàmá bɛ́, sə wɔ́ Yi jì y jàà y kɛ̀bɛ́ bə̀ cír rə̀myɛ́ mɔ́ yil mú w ń mà n dɔ̃̀ bɛ nɛ́, dwã-joló kòrhó w kɔ̀nɔ́ w wu w wə. ²⁰ Kɔn tɛ̀bɛ́ gakó rə̀ dwə̀rh vwĩ̀ rí nàmá bɛ́ m'a jǐrh Cinu nyǎn; vwǎm mɔ́ jal gə ló gɔ̀nɔ̀ yó, sə bə shɛ̀rh mə̀ jàà yá, Yi jì y jàà y kɛ̀bɛ́ bə̀ cír rə̀myɛ́ mɔ́ yil mú wə. ²¹ È gə wɔ́ dɔ ku bə̀ m'e shɛ̃̀ vwĩ̀ rí vwǎm mɔ́, sə bə mà w bə lo, sə è gə wɔ́ kàmmɔ ku bə̀ m'e shɛ̃̀ mɔ, sə bə kɔ̀rh ò wu wə́, bə zɛ̃̀ bə zhə́zhɛ́lɛ́ w ǹdə́ nɛ̃̌. ²² Bal mɔ̀bɔ́ gakó ń wɔ́ vwĩ̀-zwə́lnə bé kùkùl ré lò wɔ̌ ń dɔ̀m nàmá bɛ́ bə̀myɛ́ mɔ́: bə̀ wɔ́ Yi dúdú nyə̀ná. ²³ Sə bə̀ t'â la vwǎm mɔ̀bɔ́ bə̀ m'e zwə́l yə̀-bəlɔ̀lɔ́ sǔbri lwə̌l vwĩ̀, bə zɛ̃̀ bə zə mə̀ jal mɔ́ bə m'e bə̀ dwã-joló kòrhó w wə, Yi jàà y wa, sǔbri pɔ tũ̀twĩ̀ĩ̀ rí tũ̌ yil mú, nàmá bɛ́ dɔ́m yé. Bə̀ m'a ji bi myǐn. ²⁴ Bǝ zhɔ zhe zɔ̀m ǹdǝ́ Muyiisi n wɔ̀: ²⁵ Zɔ̌m ǹdǝ́ Arɔ̃ ǹdǝ́ ń byǎ bɛ́ n wɔ̀: Nyǐ yǝ̀-bǝlɔ̀lɔ́ vǔr vwĩ̀ rí. W:ó bǝ̀ gǝ́ n'ê zhwǝ́l vwĩ̀ námpúm cɛ̃́ɛ̃́ rɛ́ mǝ̀gã̌ mɔ́ wɔ́ gàà mɔ́ bǝ̀ n'ê zwǝ́l vwĩ̀ námpúm cẽ́ɛ̃́ rɛ́ bǝ̀ pǝ pǝ Bǝ zhɔ zhe ne mó: Bǝ̀ rǝ̀ wɔ́ kɔn dɛ̀bɛ́ rǝ̀ wɔ́ Yi kɔna. ²⁶ Vwĩ̀-zwǝ́lnǝ mó mɔ̀bɔ́ ń nǝ́ zwǝ́l vwĩ̀ rí mú nǝ́ ń dɔ̀m rǝ̀ nàmá bɛ́; bǝ̀ rǝ́ mǝ̌ rǝ jí jàà kɛ̀bɛ́ è wɔ́ Yi nyǎ mɔ́ wẽ́, dwã-joló kòrhó w wǝ. ²⁷ Lò mɔ̀bɔ́ gakó ń dwǝ̀rh ń dwǝ̀rh nàmá bɛ́ nɛ mɔ́ nǝ́ ń jǐrh wárhgáá. Sǝ jal mɔ́ gǝ dwǝ̀rh kàmmǝ-zwǐ ni, bǝ̀ m'a sharh y jàà kɛ̀bɛ́ è wɔ́ Yi nyǎ mɔ́ wẽ́. ²⁸ Dɔ nǝ̀zhĩ̌ kɛ̀bɛ́ bǝ̀ shɛ̃̀ nàmǝ́ bɛ́ è wẽ́ mó, sǝ bǝ lo yǝ; sɛ è gǝ wɔ́ kàmɔ nǝ̀zhĩ̌ wẽ́ bǝ shɛ̃̀ bɛ nɛ nɛ, sǝ bǝ shàrh y ǹdǝ́ nɛ̃̌. ²⁹ È kɔn námbya gakó, vwĩ̀-zwǝ́lnǝ bé n'ê jí ri: bǝ̀ rǝ̀ wɔ́ Yi kɔna. ³⁰ Sǝ è gǝ wɔ́ yǝ̀-bǝlwàálɛ shǎrh vwĩ̀ kɔn tɛ̀bɛ́ gakó bǝ̀ zǝ bǝ bǝ̀ dwã-joló jì y w mú jal sǝ bǝ ji ri myǐn.