¹ «Lò gə wɛ̀rhɛ́ yə̀-bəlɔ̀lɔ́, ń gə́ nyɛ̀ɛ̀ bə̀ n'ê byẽ̀ bə̀ bə̀ bà, bə pə zhə̀n yò shò kwã nɛ́, n zɛ̃̀ ń yə̀ zhə̀l n cĩ́ mú yilə, e jà ń nɔ yò w ò twĩ̀ mú ǹdə́ ń yírhə́, ráá ń nyɛ̀ɛ̀ kɔn ò shò kwã, rə̀myɛ́ yi ní ń mà n zhĩ ń dóó wə́; ² lò gə dwə̀rh kɔn dɛ̌ dɛ̌ rə̀ zhe jìmdi ǹdə́ ń yə̀l, è wɔ́ gɔ-nǎm mɔ̀bɔ́ mə̀ zhe jìmdi cùù ráá jè vwǎm mɔ̀bɔ́ mə̀ zhe jìmdi cùù ráá kò-nyì tɛ̀bɛ́ rə̀ zhe jìmdi cùù, rə̀myɛ́ yi ní, ń já n jǐrh jìmdi cə́bal n súlí n jǐrh dóó cə́bal; ⁴ lò gə dwə̀rh kɔn dɛ̀bɛ́ rə̀ zhe jìmdi rə̀ shí numbyíní sõ, jìmdi tɛ̌ tɛ̌ rə̀ n'ê ce lò dõ jǐrh jìmdi cə́bal, ǹdə́ ń yə̀l, ń gə tú ń lwar rɛ, ń jǐrh dóó cə́bal; lò gə yẽ̌ bwelé kɛ̀bɛ́ è n'ê zhìlì ń yò ráá è n'ê kwɛrhɛ ń yò shə́r ń nyú w e jà ń yə̀ ń yala nɛ zhìlì n tɛ́rɛ́, ³ yò kɔ̀bɔ́ numbyíní gakó gə́ wɔ̌ è bwəl nyí ǹd'ê yə̀ è yala nɛ zhìlì mú wẽ́, ń gə tú ń lwar rɛ, ń jǐrh dóó cə́bal. ⁵ Lò gə dó ywẽ̀ né nə̀myɛ́ òdù shò kwã nɛ́, ń mə̌ sə n byili kɔn rɛ́ tɛ̀bɛ́ ń mə n dó mó, ⁶ sə n zə vwǎm námpɔ́lɛ́ nã́nyɔ̃̀, pyì-nyɛ̀ ráá bɔ̀-nyɔ̃̀, n bə̀ n pə Cinu ni ń yò kɔrhɔ yilə, yə̀-bəlɔ̀lɔ́ w kɔ̀bɔ́ ń wɛ̀rhɛ́ mɔ́ sǔbri lwə̌l vwĩ̀ rí zwə́l yilə; rə̀myɛ́ yi ní vwĩ̀-zwə́lnə mó mà n twĩ̀ sǔbri pɔ tũ̀twĩ̀ĩ̀ rí ń yó. ⁷ «Lò gə wàr ń mà n nə vwǎm námpɔ́lɛ́, ń wɔ̌ ń zə épwěnse sə̀lyè ráá épò-bwə̀r rə̀lyè ń twí ń pɛ Cinu ni, ń yò kɔrhɔ yə̀-bəlɔ̀lɔ́ w kɔ̀bɔ́ ń wɛ̀rhɛ́ yil mú sǔbri lwə̌l yilə; kúmí y èdù y m'a yə̀ yə̀-bəlɔ̀lɔ́ w sǔbri lwə̌l yilə, è dõ mó yə̀ vwĩ̀ námpúm cɛ̃́ɛ̃́ yilə. ⁸ Ń mà n zə sɛ n bə̀ n pə vwĩ̀-zwə́lnə mó ne; sə vwĩ̀-zwə́lnə mó mà n jɛ̀nɛ̀ n zwə́l yə̀-bəlɔ̀lɔ́ sǔbri lwə̌l nyǎ y n pə Cinu ni. Ń mà n pyípyíní è byã y sə ń tá ń la è yó w mǔr yé. ⁹ N zhɛ́rhɛ́ è jal mɔ́ vwĩ̀-jùlú w sarh rɛ́ nɛ, n zɛ̃̀ n kã̀ kã̀ mə̀ kùr ré vwĩ̀-jùlú w kùr wə. Vwĩ̀ rí rə̀myɛ́ mɔ́ wɔ́ yə̀-bəlɔ̀lɔ́ w sǔbri lwə̌l vwĩ̀. ¹⁰ Rə̀myɛ́ kwã, vwĩ̀-zwə́lnə mó mà n zɛ̃̀ n zə kúmsí sə̀lyè nyǎ y n mə n zwə́l vwĩ̀ námpúm cɛ̃́ɛ̃́ ǹdə kɔn gə́ mə̌ sə rə tó né. Vwĩ̀-zwə́lnə mó gə twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí mɔ̀bɔ́ ń wɛ̀rhɛ́ yə̀-bəlɔ̀lɔ́ w mɔ́ yó n zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri. ¹¹ Sə lò mó gə bə épwěnse sə̀lyè ráá épò-bwə̀r rə̀lyè ŋwɔ̀nɔ́ zhe, ń wɔ̌ ń nə́ ń zə mún cəə́le rə̀tɔ̀ ń twí ń pɛ yə̀-bəlɔ̀lɔ́ w ń wɛ̀rhɛ́ mɔ́ sǔbri lwə̌l vwĩ̀ rí yilə. Ń tá ń la nwə̃̌ mə̀ yó ló yé, ń tá ń la ãsã́ myɛ mə̀ yó cṹ yé, è gə́ wɔ́ yə̀-bəlɔ̀lɔ́ sǔbri lwə̌l vwĩ̀ yilə. ¹² Ń mà n zə mún mú n bə̀ n pə vwĩ̀-zwə́lnə mó ne; vwĩ̀-zwə́lnə mó mà n tɛ̃́ mɔ jə̀-gúl yírh, lyìrhə́ kɔn rɛ́ yilə, n ji mu myǐn vwĩ̀-jùlú w yó n mə n súlí kùjírə́ nyɛ̀bɛ́ nə̀ gakó n'ê jí myǐn Cinu yil mú ni; vwĩ̀ rí rə̀myɛ́ mɔ́ wɔ́ yə̀-bəlɔ̀lɔ́ sǔbri lwə̌l vwĩ̀. ¹³ Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ywẽ̀ né nə̀myɛ́ òdù shò kwã nɛ́ ń zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri. Vwĩ̀-zwə́lnə mó mà n kwè vɔ̀lɔ́ kɔn pɔ tũ̀twĩ̀ĩ̀ rí nə̀-twéésé n mə n twĩ̀ tũ̀twĩ̀ĩ̀ rí rə̀myɛ́ mɔ́.» ¹⁴ Cinu Yi zɔ̀m ǹdə́ Muyiisi n wɔ̀: ¹⁵ «Lò gə gar nyə́ né kɔn rɛ́ tɛ̀bɛ́ Cinu mə̌ ǹdə́ rɛ mɔ́ shò kwã nɛ́ ǹdə́ ń yə̀l, n zɛ̃̀ n wɛ̀rhɛ́ yə̀-bəlɔ̀lɔ́ nánfɔ̀lɔ̀, ń mà n zə pyì-bya kɛ̀bɛ́ kaka bə y zhe, ń və̌-ywàálɛ́ wẽ́, è ye y yí wár-kùlsi màngɛlɛ́, sə wár-kùlì y ye y yə̀ wár-kùlì y kɛ̀bɛ́ è n'ê jí còrhó-jì y w mú ye yə́, n bə̀ n pə Cinu ni, ń la mə n zwə́l vwĩ̀ ń yò w kɔrhɔ yilə. ¹⁶ Ń mà n càrh còrhó-jì y kɔn rɛ́ tɛ̀bɛ́ ń zwẽ mó n súlí rə̀ kùr rə̀dù y ní ǹdə́ bə̀ gə bɔ̀n rɛ kùrə̀ nə̀nu mú, n zɛ̃̀ n kwè re n pə vwĩ̀-zwə́lnə mó ne. Vwĩ̀-zwə́lnə mó gə zə pyì-bya y bə̀ la m'e zwə́l vwĩ̀ rí yò w kɔrhɔ yil mú n mə n twĩ̀ yə̀-bəlɔ̀lɔ́ sǔbrí pɔ tũ̀twĩ̀ĩ̀ rí ń zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbri. ¹⁷ Lò mó gə gar Cinu nyə́ né rə̀dù ǹdə́ ń yə̀l, n zɛ̃̀ n wɛ̀rhɛ́ yə̀-bəlɔ̀lɔ́, dóó ŋwɛ́nɛ́ ń yó wə, sə ń mà n zhĩ wə, ¹⁸ ń mà n zə pyì-bya kɛ̀bɛ́ kaka bə y zhe ń və̌-ywàálɛ́ wẽ́, è ye y mɛrhɛ dwã ǹdə́ kɛ̀bɛ́ bə̀ m'ê zwə́l yò kɔrhɔ vwĩ̀ rí ye yə́, n bə̀ n pə vwĩ̀-zwə́lnə mó ne. Vwĩ̀-zwə́lnə mó gə tú ń twĩ̀ yə̀-bəlɔ̀lɔ́ w kɔ̀bɔ́ ń wɛ̀rhɛ́ ǹdə́ ń yə̀l mó sǔbri pɔ tũ̀twĩ̀ĩ̀ rí ń zhɛ̀, yə̀-bəlɔ̀lɔ́ w cə́bal mɔ́ já n nə ń yə̀-bəlɔ̀lɔ́ w sǔbrí. ¹⁹ Vwĩ̀ rí rə̀myɛ́ mɔ́ wɔ́ yò kɔrhɔ vwĩ̀, bə̀ lò mó yà ń dó Cinu ni zhə̀n ga.»