¹ Cinu zɔ̀m ǹdə́ Muyiisi n wɔ̀: ² «Pə nyí Esərayɛl lyì byǎ bɛ́ nɛ, bə̀ n'ê pɛ mɔ́ olyivyé byǎ nwə̃̌ y kɛ̀bɛ́ è wɔ́ zwẽ́zwẽ́, kaka myɛ yə̀ y gùlí yé, ku w bə̀ n'ê cĩ́ pàntámsɛ́ ò yó mó yilə, mùnì ga pàntámsɛ́ j'a zə twéé twéé, ³ gɔ̀nɔ̀ w kɔ̀bɔ́ ò círhí dɔbrɛ́ kùlkṍ wə́, dwã-joló kòrhó w w mó, yé y wə. Aarɔ̃ mà n cĩ́ pàntámsɛ́, sə ŋwɛ̀nɛ́ sə zə də̀dɛ̀nɛ́ kɔn m'e yí nəkɔkɔ́lɛ́, Cinu yé né, twéé twéé. Wɔ́ nyí rə̀ m'à j'â ŋwɛ́nɛ́ gaga, á yilə, byin byin gakó. ⁴ Ń mà n cĩ́ pàntámsɛ́ ku w bə̀ n'ê cĩ́ pàntámsɛ́ ò yó ò zùrhì ǹdə́ sánə́má mɔ̀bɔ́ mə̀ càn mɔ́ yó, sə sə̀ m'a zə Cinu yé né twéé twéé. ⁵ Ǹ m'ǎ zə mún mə̀ búl mə̀ càn ń ji ŋwǎmsɛ shí ǹdə́ sə̀lyè, èdù gakó ji ǹdə́ mún cəə́le tə̀ldù. ⁶ Ǹ m'ǎ pyɛ̀lɛ́ pyɛ̀lɛ́ sɛ dwã yó shə̀ldù shə̀ldù, púlə́ nə̀lyè tabəlɛ́ y è zùrhì ǹdə́ sánə́má mɔ̀bɔ́ mə̀ càn mɔ́ yó, Cinu yé né; ⁷ ǹ m'ǎ cĩ́ ãsã́ kɛ̀bɛ́ kaka yə̀ y gùlí mú púl rə̀dù gakó yə́-pɛ̀lɛ́ wa; è m'a yə̀ lyìrhə́ kɔn búrú w jàà wa; rə̀myɛ́ mɔ́ m'a yə̀ kùjú kɔ̀bɔ́ ò gakó n'ô jí myǐn mú Cinu yilə; ⁸ shìrhə́ y dɛ̃ gakó, bə̀ m'a cĩ́ si Cinu yé né, twéé twéé, sə sə̀ m'a shí Esərayɛl lyì byǎ bɛ́ sõ; wɔ́ dɔbrɛ nyí rə̀ m'à j'â ŋwɛ́nɛ́ twéé twéé. ⁹ Ŋwǎmsɛ́ sə̀myɛ́ m'a yə̀ Aarɔ̃ ǹdə́ ń byǎ bɛ́ cəl; bə̀ m'a dɔ̃̀ sɛ jàà y kɛ̀bɛ́ bə̀ vùr rə̀myɛ́ mɔ́ yil mú wẽ́, bə̀ sə̀ wɔ́ à dúdú cəl bə̀ vùr kùjírə́ nyɛ̀bɛ́ nə̀ gakó n'ê jí myǐn Cinu yil mú wẽ́; rə̀ j'â wɔ́ bə̀ cəl twéé twéé yilə.» ¹⁰ Dɛ̃ rə̀dù Esərayɛl lyì bə̀kɔ́ byǐ, ń da mɔ́ yà ń wɔ́ Ezhibti lò, zù Esərayɛl lyì bí wẽ́, ńmyɛ̌ ǹdə́ Esərayɛl lyì byǐ mə̀dù j'a zɛ̃̀ búlə́ ne, zulə́ jàà y cəcəl wə. ¹¹ Esərayɛl lyì bə̀kɔ́ mɔ́ byǐ mú já n fuuli Yil réa, n tùrh mu; rə̀myɛ́ ce, bə zə mɔ bə vò Muyiisi sõ. Byǐ mú ná mɔ́ yà ń yíl Shəlomiiti, Dəvri bə̀kɔ́, Dan kwálá y lò. ¹² Bə ce bə̀ n'ê yìlì mu náàcɛ̀nɛ́ bə̀ m'ê dɛ̃̀ nyí tɛ̀bɛ́ cìcì Cinu la pɔ. ¹³ Rə̀myɛ́ yó Cinu zɔ̀m ǹdə́ Muyiisi n wɔ̀: ¹⁴ «Ce lò mó mɔ̀bɔ́ ń tùrh tùùrhí mú du zulə́ jàà y wa; sə lyì byɛ̀bɛ́ gakó bə̀ nyɛ̀ɛ̀ ǹdə́ ń nə́ ń tùrh mú cĩ́ jɛ̀rh ń yó w yó, sə Esərayɛl lyì byǎ bɛ́ gakó dul mu ǹdə́ nə́kulə. ¹⁵ Ǹ m'ǎ zɛ̃̀ ń wɔ̀ Esərayɛl lyì byǎ bɛ́ nɛ: Lò gə tùrh ń Yi rí, ń mà n zhĩ ń yə̀-bəlɔ̀lɔ́ w yò wə́; ¹⁶ rə̀myɛ́ ce, bə̀ m'a gu lò mɔ̀bɔ́ ń fuuli Cinu yil ré: lyì bí gakó m'a dul mu ǹdə́ nə́kulə; ń wɔ́ zhə-bal ráá tənà y cìcì lò, bə̀ m'a gu mu ń gə́ fuuli Yil ré mó yilə. ¹⁷ Bə̀ m'a gu lò mɔ̀bɔ́ ń mà numbyíní kɛ̌ kɛ̌ n gu mú, ¹⁸ Ń gə gu lò dõ vwǎm, ń mà n càrh vwǎm, kò-nyì bə̀ m'a cĩ́ kò-nyì jàà wa. ¹⁹ Lò gə cɛ̀mɛ̀ ń da-dǒ lò, bə̀ m'a cɛ̀mɛ̀ ńmyɛ kɔn mɛrhɛ dwã ǹdə ń gə́ cɛ̀mɛ̀ mó né: ²⁰ kɔn bə̀ y'a ká bə m'e cĩ́ kɔn rə̀ kɔ́ jim; yírh bǝ̀ y'a jàrh bǝ m'e cĩ́ yírh rə̀ jàrh jim, yélé bǝ̀ y'a wǔr bǝ m'e cĩ́ yélé rə̀ wǔr jim; bə̀ m'a cɛ̀mɛ̀ ńmyɛ kɔn mɛrhɛ dwã ǹdə ń gə́ cɛ̀mɛ̀ ń dõ mó né. ²¹ Lò mɔ̀bɔ́ ń gu vwǎm, ń mà n càrh mə̀ dõ mə̀ jàà wa; lò mɔ̀bɔ́ ń gu numbyíní, sə bə gu mu. ²² 22 Á nyə́ né m'a yə̀ nə̀myɛ́ nə̀dù y zhə-bal ǹdə́ tənà y cìcì lò mó ga yilə; bə̀ wɔ́ àmyɛ́ Cinu à wɔ́ á Yi rí.» ²³ 23 Wɔ́ èta Muyiisi zɔ̀m ǹdə́ Esərayɛl lyì byǎ bɛ́ nɛ́. Bə j'a zə mɔ̀bɔ́ ń tùrh tùùrhí mú bə m'e du zulə́ jàà y wa, bə dul mu ǹdə́ nə́kulə. Esərayɛl lyì byǎ bɛ́ j'a wɛ̀rhɛ́ kɔn rɛ́ tɛ̀bɛ́ Cinu yà ń pɔ rə̀ nyí Muyiisi ni mú cìcì.