¹ Àmyɛ́ Zhakɛ, à wɔ́ Yi ǹdǝ́ Cinu Yezu Kristǝ tùntùnnǝ̀, à n'â kɛ̃ sɛ́bɛ́ rɛ́ tɛ̀bɛ́ à m'â ce ámyɛ̌ Yi dwí rí kwálsɛ́ shí ǹdǝ́ sǝ̀lyè y lyì bí á làà lũ w gakó wẽ́ mó. ² Da-byǎ, yò-cǝ̀ǝ̀lè dwí gakó gǝ pú ába, s'á nyǐ á cìn ǹdǝ lyì byɛ̀bɛ́ bǝ̀ zhe wu-nyɔ̃̀ námpúm ta. ³ Á yě bǝ̀ zwini gǝ n'ê zhẽ̀ á Yi-ni-zhú mú, rǝ̀myɛ́ n'ê ce á wun t'â gɛ yé. ⁴ Ce-nǝ á cìn-pyɔ́nɔ́ mɔ́ pyìrh tùm-ècɛ̀nà wẽ́, mùnì ga á cɛ̀nɛ̀ rɛ́ yǝ̀ námpúm, yò bǝ̀k'a zhì á yó w yé, sǝ kaka bǝ̀k'a mwìrì ába yé. ⁵ Lármɔ gǝ mwìrì ámyɛ̌ mǝ̀dù, sǝ n lwǝ̀l Yi ni, bǝ̀ rǝ̀ b'a pɔ̃. Yi t'â nyǐ rǝ̀ m'e pǝ yé, rǝ̀ t'â cír yé. ⁶ Sǝ n lwǝ̀l ǹdǝ́ Yi-ni-zhú, ń bǝ̀ká n ce tǝ́tɔ̀ná yé. Lò mɔ̀bɔ́ ń nǝ́ ń ce tǝ́tɔ̀ná, ń nyɛ̌ ǹdǝ nǝ̀-fɔ̀lɔ̀ nɛ̃̌ ta, zho w gǝ n'ô ce, mǝ̀ n'ê shìì mǝ j'à n'ê zɛ̃̀. ⁷ Lò mó ńmyɛ̌ mɔ́ bǝ̀ká n bù bǝ̀ ń mà n nǝ kɔn Cǐnnǝ mó sõ yé, ⁸ bǝ̀ ń wu dǝ̀ òdù, n jà ń tá ń zhì nà èdù yó yé. ⁹ Da-byǐ mɔ̀bɔ́ ń wɔ́ nǝ̀mɔ̀, ń mǝ̌ sǝ n ce ń wu yǝ̀ nyɛ̀n, Yi gǝ́ zhẽ̌ ń yó dɛ̃̌ mɔ́ yilǝ. ¹⁰ Sǝ mɔ̀bɔ́ ń wɔ́ nǝ̀cɛ̀m-bal, ńmyɛ mǝ̌ sǝ n ce ń wu yǝ̀ nyɛ̀n, Yi gǝ́ lwǝl ń yó tɛ̃́ mɔ́ yilǝ, bǝ̀ ń nyɛ̌ ǹdǝ gɔ pùní ta. Ń tá ń la nɛ́ mãɔ̃ yé. ¹¹ Nǝ̀nyɔ́nɔ́ w gǝ byìlǝ̀, ò lumi rí n'ê mà rɛ̀ rǝ tu tɛ̃́, rǝ̀ cɛ̀nɛ̀ rɛ́ jé. Èta myɛ, nǝ̀cɛ̀m-bal mɔ́ mà n pyɛ̀nɛ̀ ǹdǝ gɔ pùní ta ń tumǝ né wẽ́. ¹² Lò mɔ̀bɔ́ ǹ zhì kẽkẽ yò-còlò yi ní, ǹ b'ǎ yǝ̀ wu-nyɔ̃̀ cí, bǝ̀ yò-còlò w gǝ́ zɔ mɔ́ ń j'ǎ ŋwɛ̀nɛ́ ń zhì kẽkẽ mó ce, ǹ b'ǎ nǝ nyǔ mǝ̀ t'â la zhɔ̌. Nyǔ mú mǝ̀myɛ́ wɔ́ kwǎndɛ́ tɛ̀bɛ́ Yi bwǝl rǝ̀ nyí byɛ̀bɛ́ bǝ̀ só re mó ne mó. ¹³ Sòlò gǝ tú ò zhe lò lwɛlɛ wɔ̀rhɔ́ yilǝ, sǝ ń bǝ̀ká n bù bǝ̀ wɔ́ Yi rǝ̀ n'ê cìrh mò rǝ̀ ce lwɛlɛ rɛ́ wẽ́ yé. Kaka wàr Yi rǝ̀ la sòlò rǝ wɛ̀rhɛ́ lwɛlɛ yé, Yi myɛ t'â cìrh lò lò rǝ̀ ce lwɛlɛ wẽ́ yé. ¹⁴ Lò gakó wɔ́ ǹ shil námmǝlwɛ̀lɛ́ y è ŋwɛ́nɛ́ ǹ wẽ́ mó è n'ê swèlè mó è ce ǹ wɛ̀rhɛ́ lwɛlɛ. ¹⁵ Ǹ gǝ yẽ̌ shil námmǝlwɛ̀lɛ́ y nɛ ǹ wẽ́, è n'ê ce ǹ wɛ̀rhɛ́ yǝ̀-bǝlɔ̀lɔ́; sǝ ǹ gǝ cǝ̀ǝ̀lè ǹ nǝ́ ǹ wɛ̀rhɛ́ wa, wɔ́ ǹ cu sɔ́má yó ò zǝ mɔ́ ò ŋwɛ́nɛ́. ¹⁶ À da-byǎ nántwǝ̌rh, á bǝ̀k'á jǝ́jɛ̀rɛ́ á cìn yé. ¹⁷ Kɔ̀-ècɛ̀nɛ́ dwí gakó, wɔ́ dɛ̃̌ yi w rǝ̀ n'ê shí ní. Rǝ̀ n'ê shí dɛ̃̌, Yi rí rǝ̀ wɛ̀rhɛ́ nǝ̀nyɔ́nɔ́ w ǹdǝ́ cànà y ǹdǝ́ cã̀mǝ́sɔ̌sɛ́ mɔ́ sõ. Cǝ-byṹ tɛ̀nɛ́ Yi sõ yé; rǝ̀ wɔ́ rǝ̀myɛ́ twéé twéé, rǝ̀ t'â lyǝ́r námpɔ́lɛ́ myɛ cìcì yé. Rǝ̀ sõ mó è bǝ zhe bǝ̀ cǝcɛ̃ ráá nǝ̀nyɔ́nɔ́ yé. ¹⁸ Rǝ̀ tó rǝ̀ zɔ̀mɛ̀ rɛ́ rǝ̀ wɔ́ zhǝ̀n mɔ́ dɛnnɛ rǝ pǝ nǝ́ba nyǔ ǹdǝ́ rǝ̀ sǝ̀pwà pùbùlǝ̀, mùnì ga nǝ́ yǝ̀ nã́yǝ́ǝ́ wẽ̀ ré tɛ̀bɛ́ gakó rǝ̀ wɛ̀rhɛ́ mɔ́ wẽ́. ¹⁹ À da-byǎ nántwǝ̌rh, lwar-na bǝ̀ lò gakó mǝ̌ dwã sǝ́ cili zɔ̀mɛ̀ rɛ́ cɛ̀nɛ̀, sǝ ǹ bǝ̀ká zɔ̀m làlà yé, sǝ ǹ lyim myɛ bǝ̀k'a zɛ̃̀ làlà yé. ²⁰ Lwar-na bǝ̀ lò mɔ̀bɔ́ ń zhe lyim tá ń wɛ̀rhɛ́ kɔn dɛ̀bɛ́ rǝ̀ wɔ́ cángá Yi yírh w yé. ²¹ Rǝ̀myɛ́ ce, zhɛ̃́-na kɔn dɛ̀bɛ́ gakó rǝ̀ wɔ́ jìmdì, ǹdǝ́ tùntùm-bǝlwǎlsɛ dwí gakó. Zwẽ-nǝ zɔ̀mɛ̀ rɛ́ Yi co á wun ní wẽ́ mó ǹdǝ́ wu-bɔ̀nɔ̀, bǝ̀ rǝ̀ wɔ̌ ába rǝ̀ la vwǎrh. ²² Yál-na zɔ̀mɛ̀ rɛ́ zwennǝ, s'á bǝ̀k'á yǝ̀ rǝ̀ cilnǝ dúdú yé. È gǝ dǝ̀ rǝ̀myɛ́, wɔ́ ámyɛ̌ cìcì á n'á jǝ́jɛ̀rɛ́ á cìnǝ̀. ²³ Lò mɔ̀bɔ́ ǹ nǝ́ ǹ cili Yi zɔ̀mɛ̀ rɛ́ ń zɛ̃̀ ǹ tá ǹ wɛ̀rhɛ́ ǹdǝ rǝ̀ gǝ́ n'ê byili ní, ǹ nyɛ̌ ǹdǝ lò mɔ̀bɔ́ ń nǝ́ ń nyǐ ń yé zhǝ̀zhé wẽ́ ta, ń nǝ ń cìn ǹdǝ ń gǝ́ wɔ́ nɛ́. ²⁴ Ń gǝ nyǐ ń cìn ń zhɛ̀, n zhǐr ń la, n pú n swě ń gǝ́ wɔ́ nɛ́. ²⁵ Yi nyí rí wɔ́ kɔ̀-ècɛ̀nɛ́, rǝ̀ n'ê pɛ cìn-cìnú numbyíní ni è wu w wẽ́. Rǝ̀myɛ́ ce, lò mɔ̀bɔ́ ǹ nǝ́ ǹ cili nyí rí rǝ̀myɛ́, ń tɛ́rɛ́ rɛ ǹ wẽ́, ń zɛ̃̀ ǹ zhǐ ǹ nà y yó rǝ̀ wẽ́, ǹ nǝ́ ǹ wɛ̀rhɛ́ ǹdǝ rǝ̀ gǝ́ n'ê byili ní, ǹ tá ǹ swě re, ǹ b'ǎ nǝ wu-nyɔ̃̀ kɔn dɛ̀bɛ́ ǹ nǝ́ ǹ wɛ̀rhɛ́ mɔ́ wẽ́. ²⁶ Lò gǝ nǝ́ ǹ bùl bǝ̀ ǹ nǝ́ ǹ tó Yi ni cɛ̀nɛ̀, ń jà ǹ wàr ǹ mǝ̀jòlò w ǹ nǝ́ ǹ zala, wɔ́ ǹ cìn ǹ nǝ́ ǹ jǝ́jɛ̀rɛ́, e jà ǹ Yi-ni-tó mó myɛ wɔ́ nánfò. ²⁷ Yi-ni-tó mó mɔ̀bɔ́ mǝ̀ wɔ́ nǝ́ Da Yi pùbùlǝ̀ mó, wɔ́ bǝ̀tǎlsɛ ǹdǝ́ ejǝ̀nǝ̀ nè sãɔ̃ bǝ̀ zúzúnú w wẽ́, sǝ́ dɛ̃̀ ǹ cìn ǹdǝ́ lũ w jìmdì dwí gakó.