¹ Da-byǎ, ámyɛ̌ byɛ̀bɛ́ á zù nǝ́ Cǐnnǝ Yezu Kristǝ mó ń wɔ́ zùwǝ́ cǝ́bal mɔ́, á bǝ̀k'á zǝ á yírhǝ́ á cír lyì bí yé. ² Dǝdɛ̃̌-nɛ, lò mɔ̀bɔ́ ń wɔ́ nǝ̀cɛ̀m-bal, ń co sánǝ́má cǝ̀byǐ ń jǝ̀fɔ́lɛ́ nɛ, n zù kàmǝ̀-zwǐ kɛ̀bɛ́ è n'ê jǝ́jɛ̀mɛ́ gǝ tú á dwã-gùlú w jàà wà. Nǝ̀mɔ̀ myɛ zɛ̃̀ n bà, ń zù kàmǝ̀-zù-ebwǝrse. ³ Á zɛ̃̀ á nyǐ mɔ̀bɔ́ ń zù kàmǝ̀-zwǐ y è càn mɔ́ á na, á wɔ̀ mɔ̀: «Bǝ̌ jòm nyɔ̀nɔ̀, bǝ̀ jàà y èmyɛ́ càn,» á zɛ̃̀ á wɔ̀ nǝ̀mɔ̀ mɔ́ nɛ: «Zhǐ dɛ̃̌, ráá jǒm tɛ̃́ shó w wǝ.» ⁴ Á gǝ n'â wɛ̀rhɛ́ èta, è dǝ̀ lyì bí á n'á zǝ á yírhǝ́ á círǝ́? Èta mɔ́, dǝ̀ lyì bí bùrsì á n'á kɛ́ ǹdǝ́ bùlǝ̀ námmǝlwǎlsɛ? ⁵ Da-byǎ nántwǝ̌rh, cili-nǝ: Yi cír byɛ̀bɛ́ lũ w lyì bí n'ê nyǐ ǹdǝ nǝ̀mwà ta mɔ́, mùnì bǝ yǝ̀ rǝ̀myɛ́ nɛ zhú mú nǝ̀cɛ̀nà, sǝ bǝ nǝ cǝl tǝnà y rǝ̀ bwǝl è nyí rǝ̀ lyì bí ni mú wẽ́. ⁶ Sǝ ámyɛ̌ t'á nyǐ nǝ̀mwà bɛ́ á nɛ yé. K'â wɔ́ nǝ̀cɛ̀nà bɛ́ á n'á nyǐ á nɛ, e jà wɔ́ bǝ̀myɛ́ bǝ̀ n'ê nwɛ̀nɛ̀ ába, bǝ̀ n'ê zǝ ába bǝ̀ zhǝ̀l bùrsì. ⁷ Wɔ́ bǝ̀myɛ́ bǝ̀ n'ê fulsi yil ré náàcɛ̀nɛ́ y Yi pɔ ába mɔ́. ⁸ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Swéné ǹ dõ ǹdǝ ǹ cìcì ta.» Nyí rí rǝ̀myɛ́ wɔ́ Yi pyɛ̀lɛ̀ rɛ́ nyí. Á gǝ zwẽ re, á wɛ̀rhɛ́ cɛ̀nɛ̀. ⁹ Sǝ á gǝ zǝ á yírhǝ́ á cír lyì bí, wɔ́ lwɛlɛ á n'á wɛ̀rhɛ́; sǝ Yi nyí rí n'ê kɛ́ á bùrsì, á gǝ́ t'á zwẽ re mó yilǝ. ¹⁰ Lò gǝ nǝ́ ǹ zwẽ nyǝ́ né gakó, ń zɛ̃̀ ń bǝ̌ dó rǝ̀dù, wɔ́ nǝ̀ gakó ǹ dówǝ́. ¹¹ Yi wòwǝ̀: «Bǝ̀ká fwǝ̌l yé.» Rǝ k'e wɔ̀: «Bǝ̀ká gu lò yé.» Ǹ gǝ tá ǹ fwǝ̀lǝ́, ń j'ǎ gu lò, wɔ́ Yi nyǝ́ né gakó ǹ yǝ̀ zwẽ yé. ¹² Zɔ̌m-na s'á wɛ̀rhɛ́ ǹdǝ lyì byɛ̀bɛ́ Yi b'a zǝ cìn-cìnú nyí rí rǝ kǝ́ bǝ̀ bùrsì ta. ¹³ Zhǝ̀nà, Yi gǝ la lò mɔ̀bɔ́ ń tá ń dùr ń dwã bɛ́ nɔ̀nɔ̀ bùrsí kɔ́, rǝ̀ t'â la ńmyɛ nɔ̀nɔ̀ dǔr yé. Sǝ lò mɔ̀bɔ́ ǹ zhe nɔ̀nɔ̀-dǔr, bùrsì ywẽ bǝ mɔ́ zhe yé. ¹⁴ Da-byǎ, lò gǝ wò bǝ̀ ǹ zhí Yi ni, ń jà ǹ tá ǹ wɛ̀rhɛ́ kɔn dɛ̀bɛ́ rǝ̀ n'ê byili bǝ̀ ǹ zhí Yi ni mú, Yi-ni-zhú mú mǝ̀myɛ́ dwí rí wɔ̌ mǝ̀ b'a vwǎrh mɔ́? ¹⁵ Dǝdɛ̃̌nɛ, á da-byǐ ráá á nǝkɔ́ mǝ̀dù gǝ bǝ gɔ̀nɔ̀ zhe ń la mǝ n círhí ń cìnǝ̀, ń bǝ kaka zhe ń la ń nyú w co, ¹⁶ á mǝ̀dù zɛ̃̀ n wɔ̀ mɔ̀: «Zhǝl ǹdǝ́ yǝ̀-zùlǝ́, ń pyà kàmǝ̀-zwǐ ń zù, ń bǝ́ cǝ̀r wàr rɛ́ yé ne, sǝ́ pyà kùjú ń jí,» n jà ń yǝ̀ mɔ kɔn rɛ́ dɛ̀bɛ́ ń zhe rǝ̀ tum mú pɛ, rǝ̀myɛ́ wɔ̌ rǝ̀ b'a sɛ̃ mɔ? ¹⁷ Wɔ́ èta ǹdǝ́ Yi-ni-zhú mú myɛ. Ǹ tùntwǝ̃̀ǝ̃̀ né gǝ t'â byili bǝ̀ ǹ zhí Yi ni, sǝ́ lwar bǝ̀ ǹ Yi-ni-zhú mú wɔ́ nánfò. ¹⁸ Lò gǝ wòwǝ̀: «Lyì jàlà zhí Yi ni; jàlà wɔ́ tùntwǝ̃̀ǝ̃̀ náàcɛ̀nà bǝ̀ n'ê twĩ̀,» à b'a wɔ̀ rǝ̀-ná-cí ni: «Ǹ b'ǎ wɛ̀rhɛ́ etǝr ń wɔ̀ bǝ̀ ǹ zhí Yi ni, ǹdǝ́ ǹ gǝ tá ǹ twĩ̀ tùntwǝ̃̀ǝ̃̀ nyɛ̀bɛ́ nǝ̀ mǝ̌ dwã ǹdǝ́ Yi-ni-zhú mú? Àmyɛ́ wɔ́ à tùntwǝ̃̀ǝ̃̀ né dɛnnɛ à b'a tó né a byili mú b'à zhí Yi ni.» ¹⁹ Ǹ nǝ́ ǹ zwẽ nyí bǝ̀ Yi wɔ́ rǝ̀dù sá? Kɔn càn. Nǝ̀cílsí námmǝlwǎlsɛ́ myɛ cìcì n'ê zwẽ nyí rí rǝ̀myɛ́, sǝ ywẽ zhe se, sǝ̀ n'ê kǝkǝ. ²⁰ Bǝ-surhǝ-zhe cí, ǹ yǝ̀l bǝ̀ ǹ gǝ zhí Yi ni, ń jà ǹ tá ǹ wɛ̀rhɛ́ kɔn dɛ̀bɛ́ rǝ̀ n'ê byili bǝ̀ ǹ zhí Yi ni, ǹ Yi-ni-zhú mú bǝ kùr zhe nà? ²¹ Nǝ́ nàmbal Abǝraham wɔ́ etǝr Yi tó né rǝ nyǐ mu ǹdǝ ń bǝ dóó zhe ta? Wɔ́ ń tùntwǝ̃̀ǝ̃̀ né dɛnnɛ rǝ̀ tó né, ń gǝ́ yà ń zɔ ń byǐ Yǝzakɛ n cĩ́ vwĩ̀-jìlú w yó ń la mǝ n zwǝ́l vwĩ̀ rí n pǝ Yi ni mú yilǝ. ²² Ǹ bǝ nɛ? Ń Yi-ni-zhú mú ǹdǝ́ ń tùntwǝ̃̀ǝ̃̀ né ga y'à n'ê tó dwã. Ń tùntwǝ̃̀ǝ̃̀ né zɛ̃̀ nǝ ce ń Yi-ni-zhú mú jǐrh námpúm. ²³ Èta, kɔn rɛ́ dɛ̀bɛ́ bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó pyìrh. Bǝ̀ kɛ̃ bǝ wɔ̀: «Abǝraham zhí Yi ni. Rǝ̀myɛ́ ce, Yi nyǐ mu ǹdǝ ń bǝ dóó zhe ta.» Rǝ byẽ̀ mò bǝ̀ rǝ̀ dɔwa. ²⁴ Á na? Numbyíní wɔ́ è tùntwǝ̃̀ǝ̃̀ né nǝ̀ n'ê ce è k'ê bǝ dóó zhe Yi yírh wǝ. Sǝ è dǝ̀ è gǝ́ zhí ri mú dúdú yé. ²⁵ Wɔ́ èta kɔn yàl nɛ́ ǹdǝ́ kǝ-nǝ̀fòló Arayaabɛ myɛ. Ń yà ń zwẽ Esǝrayɛl lyì bí tùntúmǝ́ ń sõ kɛ̀lɛ́ wa, n sɛ̃ bɛ bǝ k'a kwè sɔ́má dõ bǝ vò jè. Rǝ̀myɛ́ ce Yi nyǐ mu ǹdǝ ń bǝ dóó zhe ta. ²⁶ Shíshìrhǝ́ né gǝ tɛ̀nɛ́, yala nɛ́ cùwǝ̀. Èta myɛ, Yi-ni-zhú tùntwǝ̃̀ǝ̃̀ né gǝ tɛ̀nɛ́, Yi-ni-zhú mú bǝ kùr zhe yé.