¹ Shãã ga, Yi tó rǝ̀ nyì-zwennǝ bé dɛnnɛ rǝ zɔ̀m ǹdǝ́ nǝ́ nàmbala bɛ́ twǝr nánzhǝzhɔ̌. Rǝ̀ tó tùntwǝ̃̀ǝ̃̀ nánzhǝzhɔ̌ dɛnnɛ myɛ rǝ zɔ̀m ǹdǝ́ bɛ. ² Sǝ èlǎsɛ̃́, rǝ̀ tó rǝ̀ Byǐ mú dɛnnɛ rǝ zɔ̀m ǹdǝ́ nǝ́myɛ̌, dwã nɛ́ nyɛ̀bɛ́ èta nánkwaá nɛ́ wẽ́. Wɔ́ ńmyɛ̌ dɛnnɛ myɛ rǝ̀ tó né rǝ wɛ̀rhɛ́ lũ w ǹdǝ́ ò wẽ̀ ré gakó. Wɔ́ ńmyɛ̌ rǝ̀ cír bǝ̀ ń cìní kɔn gakó. ³ Wɔ́ ńmyɛ̌ ń nǝ́ ń byili ń Da zùwǝ́ yǝ́. Ń gakó námpúm wɔ́ ǹdǝ Yi gǝ́ wɔ́ nɛ́ ma cìcì. Ń zǝ ń zɔ̀mà nɛ́ jàn rɛ́ n kwɛ̃́ kɔn gakó. Ń vùr numbyínǝ́ bé yǝ̀-bǝlwàálɛ́; rǝ̀myɛ́ kwã nɛ́, n zɛ̃̀ n vò ń jě Yi rí rǝ̀ zhe zùwǝ́ mó jǝ̀jĩ́ ni Arǝzana wa. ⁵ Yi pɔ mɔ yil dɛ̀bɛ́ rǝ̀ du màlɛ́kabá yilǝ né; rǝ̀myɛ́ ce, ń du màlɛ́kabá dɛ̃́dɛ̃́. ⁴ Yi gǝ́ wòwǝ̀: «Ǹ wɔ́ à byǐ; kɔn zhí zà, à jǐrh ǹ Da» mɔ́, è dǝ̀ màlɛ́ka èdù ga nɛ rǝ̀ wò yé. Rǝ̀ gǝ́ wòwǝ̀: «À b'a yǝ̀ ń Da, sǝ ń mà n yǝ̀ à byǐ» mú myɛ, è dǝ̀ màlɛ́ka yò rǝ̀ zɔ̀m yé. ⁶ Sǝ rǝ̀ gǝ́ tú e ce rǝ̀ Byì-cɛ y bàn cɛ yó yi ní, rǝ̀ wòwǝ̀: «Yi màlɛ́kabá gakó mǝ̌ sǝ bǝ wùlì ń yé né bǝ cèrhé mo.» ⁷ È gǝ wɔ́ màlɛ́kabá yilǝ, Yi wòwǝ̀: «À màlɛ́kabá wɔ́ à tùntùnnǝ̀, à n'â ce bǝ̀ jǐrh ǹdǝ zho ta; bǝ̀ lum ǹdǝ myìn-zhù ta.» ⁸ Sǝ è gǝ wɔ́ rǝ̀ Byǐ mú yilǝ, rǝ̀ wò mò: «Ǹ wɔ́ Yi; ǹ nǝ́ ǹ jí pyɛ̀lɛ̀ byinǝ nǝ̀ bǝ zhɔ̌ zhe yilǝ. Sǝ ǹ nǝ́ ǹ jí ǹ pyɛ̀lɛ̀ rɛ́ ǹ lyì bí yó w ǹdǝ́ wu-cángá. ⁹ Ǹ só kɔn dɛ̀bɛ́ rǝ̀ wɔ́ cángá, sǝ lwɛlɛ wɔ́ ǹ súsúlú. Wɔ́ rǝ̀myɛ́ è ce Yi rí rǝ̀ wɔ́ ǹ Yi mú cír mó ǹ dwã bɛ́ wẽ́, rǝ ló nwǝ̃̌ è lwẽ́ nã́nyǝ̀nyɛ̀lɛ́ ǹ yó wǝ, rǝ ce ń fùù ǹdǝ́ wu-nyɔ̃̀.» ¹⁰ Yi súlí rǝ wɔ̀: «Kùr-ju yi ní, wɔ́ ǹmyɛ́ ǹ wɔ́ Cǐnnǝ mú ǹ wɛ̀rhɛ́ cɛ yá. Dɛ̃̌ yi rí myɛ wɔ́ ǹmyɛ́ jɛ̃̀ è wɛ̀rhɛ́ rɛ. ¹¹ Sǝ rǝ̀myɛ́ gakó b'a jé, sǝ ǹmyɛ́ já ǹ ŋwɛ́nɛ́. Dɛ̃̌ ǹdǝ́ cɛ y b'a cɔ̀ ǹdǝ gàndɛ ta. ¹² Ǹ b'ǎ pú ri ǹdǝ gàndɛ ta; ǹ b'ǎ lyǝ́r re ǹdǝ gàndɛ ta. Sǝ ǹmyɛ́ bǝ zhɔ̌ zhe yé; ǹ b'ǎ já ǹ wɔ́ ǹmyɛ́ twéé twéé.» ¹³ Yi gwẽ̌ yǝ̀ màlɛ́ka èdù ga nɛ wǝ̀l: «Bǝ̌ jòm à jǝ̀jĩ́ ni; à b'a ce ń nɔ̀ ǹ zwǝ̀ bé tɛ̃́ ǹ nǝ̀rh kùr wǝ̀.» ¹⁴ Numbyíní yírhǝ́ t'â nɛ màlɛ́kabá yé. Bǝ̀ wɔ́ Yi tùntúmǝ́ rǝ̀ n'ê twĩ̀, mùnì ga bǝ sɛ̃ lyì byɛ̀bɛ́ bǝ̀ mǝ̌ sǝ bǝ nǝ vwǎrh mɔ́ rǝ̀ y'à bwǝl mǝ̀ nyí mú ne.