koussoube-marc-lee_ezr_text

Kǝ̀kàl-fwɛ̀lɛ̀ 1

¹ Pǝrɛsɛ pyɔ̌ Sǝrisi pyɛ̀lɛ̀ rɛ́ byin nã́yéé ré, zɔ̀mɛ̀ rɛ́ tɛ̀bɛ́ Yi y'à co rǝ̀ nyì-zwennǝ Zheremi nyú w n bwǝ̀l n byili mú pyìrh, rǝ̀myɛ́ yi ni Yi co bùlǝ̀ Pǝrɛsɛ pyɔ̌ Sǝrisi wẽ́ n zɛ̃̀ n zɔ̀m ǹdǝ́ ń nyí n byili, n kɛ̃ nɛ sɛ́bɛ́ wẽ́ n pǝ ń tǝnà y púlǝ́púlǝ́ lyì bí n wɔ̀: ² Wɔ́ àmyɛ́ Pǝrɛsɛ pyɔ̌ Sǝrisi à n'â wǝ̀lǝ̀: Nyǐ Bǝ-zhɔ̌-zhe, dẽ̌ Yi rí rǝ̀ pɔ nɛ lũ w tǝnèsé gakó mó, rǝ zɛ̃̀ rǝ pɛ̃ nyí b'à lú jì Zhǝda Zhǝrǝzalɛm nɛ́ a bǝ rɛ. ³ Mɔ̌ ń wɔ́ ń dwí rí lò á cəcəl w mó? Bə̀ ń Yi rí yál ǹdə́ mɔ! Rə̀-ná-cí zhəl Zhǝrǝzalɛm, Zhəda né, n vò n lù Cinu, Esərayɛl Yi rí jì yə́. Wɔ́ Yi rí tɛ̀bɛ́ rə̀ wɔ Zhǝrǝzalɛm nɛ́ mɔ́a. ⁴ Jààsɛ shɛ̀bɛ́ Esərayɛl lyì byǎ bɛ́ ŋwɛ́nɛ́ sə̀ wẽ́ mó gakó sə sə̀ lyì bí zə sə̀byǐ ǹdə́ sánə́má ǹdə́ jɛ̃̀-kɔn dõ ǹdə́ vwàmá e súlí pùbùlə̀ pánsɛ bə b'e pə bə̀ mə̀dù mə̀dù gakó ne, Yi jì y è ŋwɛ́nɛ́ Zhərəzalɛm nɛ mɔ́ yilə.» ⁵ Rə̀myɛ́ yó, Zhəda ǹdə́ Bɛ̃zhamɛ kwálsɛ́ jìsí yó-cìnə́ bé náncɛsɛ́ ǹdə́ vwĩ̀-zwə́lnə bé ǹdə́ Levyi dwí rí lyì bí, byɛ̀bɛ́ gakó Yi y'à co Cinu jì y lú Zhərəzalɛm nɛ́ mɔ́ shil ré bə̀ wẽ́ mó j'a zɛ̃̀ bə̀ n'ê tɛnɛ bə̀ la. ⁶ Bə̀ jè-dwã bɛ́ ju bi jɛ̃̀. Bə sɛ̃ bɛ ǹdə́ wẽ̀ rə̀ zùrhì ǹdə́ sə̀byì-kùlì ǹdə́ sánə́má, e súlí jɛ̃̀-kɔn dõ ǹdə́ vwàmá ǹdə́ pánsɛ shɛ̀bɛ́ sə̀ càn dɛ̃́dɛ̃́ e súlí kɔn tɛ̀bɛ́ gakó rə̀ yàl pùbùlə̀ pánsɛ mɔ́. ⁷ Pyɔ̌ Səruusi ce bə vùr Cinu jì y wẽ̀ ré tɛ̀bɛ́ gakó Nabəkɔdɔnɔzɔɔrɛ yà ń ce bə pwà Zhǝrǝzalɛm nɛ́ n bə̀ n ce ń yə né jì y w mú. ⁸ N ce ń nə̀cɛ̀ndɛ́ yìlnə Myətərədaatɛ vùr re n ce pwẽ̀ ne, n gə̀ rɛ n lwar rə̀ yó, n zɛ̃̀ n kwè re n pə Zhəda pyɔ̌ byǐ Shəshəbasaarɛ nɛ. ⁹ Nyǐ rə̀ yó wə́: sánə́má nə̀zhĩ̌si shə́-ètɔ̀ (30); sə̀byì-kùlì nə̀zhĩ̌si mɔ̀rhɔ̀ (1000); shǐsi shí-èlyè ǹdə́ nə̀bɔ́ (29); ¹⁰ sánə́má nə̀zhì-fwààlɛ̀ shə́-ètɔ̀ (30); sə̀byì-kùlì nə̀zhì-fwààlɛ̀ nə̀ yə̀ nã́yə́ə́ né yí zwã̌-èna ǹdə́ shíyə́ (410); ǹdə́ wẽ̀ dwã mɔ̀rhɔ̀ (1 000). ¹¹ Wẽ̀ ré tɛ̀bɛ́ gakó rə̀ y'à zùrhì ǹdə́ sánə́má e súlí sə̀byǐ mú y'à wɔ́ mɔ̀ɔ̀rhɛ̀ rə̀nu ǹdə́ zwã̌-èna (5 400). Shəshəbasaarɛ pwà rə̀ gakó n mə n lyɛ̃, ńmyɛ̌ ǹdə́ ń dwã bɛ́ bə̀ y'à pwà mɔ́ gə́ tú bə shə́r Babyəlɔnɛ nɛ́ bə̀ la Zhǝrǝzalɛm mɔ́ yi ní.