¹ Cinu wɔ̀ Muyiisi ni: ² «Cànà nã́yə́ə́ y dɛ̃ nã́yéé ré, ǹ m'ǎ pú dwã-joló kòrhó wə́, Yi kòrhó wə́. ³ Ǹ m'ǎ cĩ́ kùlkṍ w dɔbrɛ́ nyə́ né wɔ ò wẽ́ mó, ò wẽ́, sə ǹ m'ǎ círhí kùlkṍ w gɔ̀nɔ̀ w ò n'ô bɔ̀n Yi kòrhó w dwã w mɔ́, kwã nɛ́. ⁴ Ǹ m'ǎ kwè tabəlɛ́ y ń bə̀ ń cĩ́ è jàà y w náàcɛ̀nɛ́ ǹdə́ búúrí bə̀ pɔ nɛ mɔ́ è yó. Ǹ m'ǎ kwè ku w bə̀ n'ê cĩ́ pàntámsɛ́ ò yó mó ń mə́ bà, sə́ súlí ń ji ò pàntámsɛ́. ⁵ Ǹ m'ǎ cĩ́ sánə́má vwĩ̀-jùlú w bə̀ la wẽ̀ ré rə̀ lwẽ́ nã́nyə̀nyɛ̀lɛ́ myǐn ju ò yó mó dɔbrɛ nyə́ né kùlkṍ w yé né, ǹ m'ǎ zɛ̃̀ ń lyẽ étwí-ènyí gɔ̀nɔ̀ w Yi kòrhó w étwí-ènyí rí ni. ⁶ Ǹ m'ǎ cĩ́ vwə̃̀ námpúmə́ cɛ̃́ɛ̃́ nɛ́ jùlú w dwã-joló kòrhó w étwí-ènyí rí ni. ⁷ Ǹ m'ǎ cĩ́ kàmmɔ zhǎ y dwã-joló kòrhó w ǹdə́ vwĩ̀-jùlú w cəcəl wə, sə́ ce nɛ̃̌ è wẽ́. ⁸ Ǹ m'ǎ zə kàmə̀jɛ̀sɛ́ ń mə́ kə́kɛ́lɛ́ kɔ̀nɔ́ w wu wə́, ń súlí ń lyẽ étwí-ènyí gɔ̀nɔ̀ w kɔ̀nɔ́ w nyí rí ni. ⁹ Ǹ m'ǎ zə nwə̃̌ y kɛ̀bɛ́ bə̀ m'ê pɛ Yi tum rí tũ̌ mú ŋwɔ̀nɔ́ w ń byèè Yi kòrhó w ǹdə́ kɔn rɛ́ tɛ̀bɛ́ gakó rə̀ wɔ ò wẽ́ mó yó, ń pə òmyɛ́ ǹd'ô wẽ̀ ré gakó Yi ni, sə rə̀ m'a jǐrh Yi nyǎn. ¹⁰ Ǹ m'ǎ twərh nwə̃̌ y vwə̃̀ námpúmə́ cɛ̃́ɛ̃́ nɛ́ vwĩ̀-jùlú w ǹd'ô wẽ̀ ré gakó yó, ǹ m'ǎ pə vwĩ̀-jùlú w Yi ni, sə ò m'a jǐrh Yi dúdú nyɔ̃̌. ¹¹ Ǹ m'ǎ twərh nwə̃̌ y kàmmɔ zhǎ y ǹdə́ ku w kɔ̀bɔ́ è kùr rí n'ê cĩ́ ò yó mó yó, ń mə́ pə kàmmɔ zhǎ y Yi ni. ¹² Rə̀myɛ́ kwã nɛ́, ǹ m'ǎ ce Aarɔ̃ ǹdə́ ń byǎ bɛ́ bə̀ bə zhì dwã-joló kòrhó w étwí-ènyí rí ni, ń shɛ bɛ nɛ̃̌ mɔ́, ¹³ ń zɛ̃̀ ń zù Aarɔ̃ ń vwĩ̀-zwə́lnə gàndɛ́, ń twərh nwə̃̌ ń yó wə, ń mə́ pɔ̃ Yi ni mùnì ga n twĩ̀ à vwĩ̀ rí zwə́l tum rí. ¹⁴ Ǹ m'ǎ ce Aarɔ̃ byǎ bɛ́ myɛ bwəlse, ń zù bi bə̀ kàmə̀zù-pɔ́lsɛ́; ¹⁵ Ǹ m'ǎ twərh nwə̃̌ y bə̀ yó w ǹdə bə̀ da ta, mùnì ga bə twĩ̀ à vwĩ̀ rí zwə́l tum rí. Nwə̃̌ y bə̀ m'e pə bɛ à tum rí tũ̌ mú ŋwɔ̀nɔ́ w mɔ́ m'a pə bɛ vwĩ̀ zwə́l tum rí tũ̌ ŋwɔ̀nɔ́ kɔ̀bɔ́ ò m'à j'â ŋwɛ́nɛ́ twéé twéé, byin byin gakó.» ¹⁶ Muyiisi já n zɛ̃̀ n wɛ̀rhɛ́ kɔn rɛ́ tɛ̀bɛ́ Cinu yà ń pɔ mɔ rə̀ nyí mú cìcì. ¹⁷ Byin nã́yéé ré, cànà nã́yə́ə́ y dɛ̃ nã́yéé ré, bə̀ pú Yi kòrhó w bə zhɛ̀. ¹⁸ 18 Muyiisi pú Yi kòrhó wə́: ń cĩ́ wẽ̀ ré tɛ̀bɛ́ rə̀ n'ê kwɛ̃́ w mɔ́ rə̀ jààsɛ́ wa, ǹdə́ sarha nɛ́ dǎr rɛ́ ǹdə́ də̀-byǎ bɛ́ bə̀ n'ê jarh dǎr rɛ́ yó mó, n súlí n ce ò yə né tɛ̃́. ¹⁹ N lɛ̀lɛ̀ kàmə̀jɛ̃̀ y dõ mó Yi kòrhó w yə́-pɛ̀lɛ́ wa, n zɛ̃̀ n pyìlì w ǹdə́ tàndɛ ǹdə Cinu gə́ yà ń pɔ nyí Muyiisi ni ní. ²⁰ N kwè dɔbrɛ nyə́ né bwə̀lsé n ce kùlkṍ w wə, n pwà də̀-byǎ bɛ́ n ce bə̀ jààsɛ́ wa, n zɛ̃̀ n kwè kùlkṍ w nyí-byǐ rí n pú ní. ²¹ N kwè kùlkṍ w n bə̀ n cĩ́ Yi kòrhó w wə, n zɛ̃̀ n lyẽ gɔ̀nɔ̀ w ò n'ô bɔ̀n Yi jì y dwã w mɔ́ ò jàà y wa, n mə n círhí dɔbrɛ nyə́ né kùlkṍ wə́, ǹdə Cinu gə́ yà ń pɔ mɔ nyí ní. ²² N cĩ́ tabəlɛ́ y dwã-joló kòrhó w wə, Yi kòrhó w jə̀-gwã̀ sõ, gɔ̀nɔ̀ w ò n'ô bɔ̀n Yi kòrhó w dwã w mɔ́ yé y wə. ²³ N cĩ́ búúrí bə̀ pɔ Cinu ni mú nà tabəlɛ́ y yó, ǹdə Cinu gə́ yà ń pɔ mɔ nyí ní. ²⁴ N cĩ́ ku w bə̀ n'ê cĩ́ pàntámsɛ́ ò yó mó dwã-joló kòrhó w wẽ́, jə̀-jĩ́ sõ, tabəlɛ́ y yé y wə. ²⁵ N ji pàntámsɛ́ Cinu yé né, ǹdə Cinu gə́ yà ń pɔ mɔ nyí ní. ²⁶ N cĩ́ sánə́má vwĩ̀-jùlú w dwã-joló kòrhó w wə, gɔ̀nɔ̀ w ò n'ô bɔ̀n Yi kòrhó w dwã w mɔ́ yé y wə; ²⁷ n zɛ̃̀ n ce bə ji wẽ̀ ré rə̀ lwẽ́ nã́nyə̀nyɛ̀lɛ́ y mɔ́ myǐn ò yó, ǹdə Cinu gə́ yà ń pɔ mɔ nyí ní. ²⁸ N lyẽ gɔ̀nɔ̀ w Yi kòrhó w étwí-ènyí rí ni. ²⁹ N cĩ́ vwə̃̀ námpúmə́ cɛ̃́ɛ̃́ nɛ́ jùlú w Yi kòrhó w dwã-joló kòrhó w étwí-ènyí rí ni. Rə̀myɛ́ kwã nɛ́, ń zwə́l vwĩ̀ námpúm cɛ̃́ɛ̃́ n súlí n pə jíjí byǎ vwĩ̀ yilə, ǹdə Cinu gə́ yà ń pɔ mɔ nyí ní. ³⁰ N cĩ́ kàmmɔ zhǎ y dwã-joló kòrhó w ǹdə́ vwĩ̀-jùlú w cəcəl wə, n zɛ̃̀ n ce nɛ̃̌ è wẽ́, yala nɛ́ sám yilə. ³¹ Muyiisi e súlí Aarɔ̃ ǹdə́ ń byǎ bɛ́ y'à n'ê sàm bə̀ jɛ̀sɛ́ ǹdə́ bə̀ nèsé gàà. ³² Bə̀ y'à n'ê sàm bə̀ jɛ̀sɛ́ ǹdə́ bə̀ nèsé, bə̀ gə tú bə̀ la dwã-joló kòrhó w zú ráá bə̀ gə tú bə la vwĩ̀-jùlú w nyí ni yi ní, ǹdə Cinu gə́ yà ń pɔ nyí Muyiisi ni ní. ³³ Muyiisi zə kàmə̀jɛ̀sɛ́ n mə n kə́kɛ́lɛ́ Yi kòrhó w kɔ̀nɔ́ w ǹdə́ vwĩ̀-jùlú wə́, n súlí n lyẽ kɔ̀nɔ́ w nyí rí gɔ̀nɔ̀ w nɛ́. Wɔ́ èta Muyiisi twĩ̀ tumə né gakó né, n zhɛ̀ nɛ́. ³⁴ Rə̀myɛ́ yó, ébɔ̃ w pyi dwã-joló kòrhó wə́, Cinu còrhó w j'a sú Yi kòrhó wə́. ³⁵ Muyiisi yà ń wàr ń nə́ ń zwì dwã-joló kòrhó w yé, bə̀ ébɔ̃ w y'à j'â ŋwɛ́nɛ́ ò wẽ́, Cinu còrhó w myɛ y'à sú wə. ³⁶ Ébɔ̃ w gə tú ò zɛ̃̀ ò ŋwɛ́nɛ́ Yi kòrhó w yə́-pɛ̀lɛ́ w yi ní gakó, Esərayɛl lyì byǎ bɛ́ y'a j'a k'a zɛ̃̀ bə̀ n'ê zhílí bə̀ sɔ́má y mùnì ga bə yí zulə́ jàà dõ wə. ³⁷ Sə ébɔ̃ w gə j'â yə̀ zɛ̃̀ ò wɔ Yi kòrhó w yə́-pɛ̀lɛ́ w yi ní, bə̀myɛ y'à t'â zhǐr bə̀ jàà y w yé; dɛ̃ rɛ́ tɛ̀bɛ́ ò y'a k'a zɛ̃̀ ò wɔ Yi kòrhó w yə́-pɛ̀lɛ́ w mɔ́ bə̀myɛ y'a zɛ̃̀ bə zhǐr. ³⁸ Cinu ébɔ̃ w y'à ŋwɛ́nɛ́ Yi kòrhó w yə́-pɛ̀lɛ́ w nə̀nyɛ́nɛ́ nɛ, sə cəcɛ̃ yá, ò y'à wɔ́ pwẽ̀ Esərayɛl lyì byǎ bɛ́ gakó yírh wə, kɔn yàl èta bə̀ sɔ́má y zhəl mó gakó yi ní.