¹ Bə̀ zɔ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́, bə m'e sɔ̃̀ vwĩ̀-zwə́l tum rí gàndɛ́ còrhó-jì y w mú e súlí Aarɔ̃ vwĩ̀-zwə́lnə gàndɛ́, ǹdə Cinu gə́ yà ń pɔ nyí Muyiisi ni ní. ² Bəsalɛl zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ n mə n sɔ̃̀ vwĩ̀-zwə́lnə náncɛ y kàmə̀zwǐ yə́, n zɛ̃̀ n zə sánə́má n zò yə. ³ Bə̀ lù sánə́má bə ce mə jǐrh ǹdə sá-jɛ̃̀ ta, bə zɛ̃̀ bə bàà bàà mɔ nə̀rh námmyɛ̀ɛ́sɛ bə m'e gàn dwã nɛ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌, rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum. ⁴ Bə̀ nyal vɔla nə̀lyè bə ce kàmə̀zwǐ y nyə́ né ne, è lyẽ e zhì jàà èdù mú yilə. ⁵ Vwĩ̀-zwə́lnə náncɛ y kàmə̀zwǐ y lyẽẽ́sé sə̀ y'à pyɛ̀lɛ́ è yó mó myɛ y'à sɔ̃̀ ǹdə kàmə̀zwǐ y ta: pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, sə̀ y'à súlí sə zò ǹdə́ sánə́má, ǹdə Cinu gə́ yà ń pɔ nyí Muyiisi ni ní. ⁶ Rə̀myɛ́ kwã nɛ́, bə̀ y'à tɛnɛ nə́kul-shɛ̀mà dwí rə̀dù yə́, bə dɛ̃ dɛ̃ shisí sə̀ y'à zùrhì ǹdə́ sánə́má mɔ́ yó; bə̀ y'à zɛ̃̀ bə kɛ̃ Esərayɛl lyì byǎ bɛ́ kwálsɛ́ shí ǹdə́ sə̀lyè y yilə né sə̀ yó ǹdə bə̀ gə́ y'a kɛ̃ zhə̀n-pɔ ku w yó né. ⁷ N dɛ̃ nə́kulə né nə̀ wɔ́ Esərayɛl lyì byǎ bɛ́ yò lyǐrh wẽ̀ ré mó, vwĩ̀-zwə́lnə kàmə̀zwǐ y pyə́pyɛla nɛ́ nɛ, ǹdə Cinu gə́ yà ń pɔ nyí Muyiisi ni ní. ⁸ Rə̀myɛ́ kwã nɛ́, ń sɔ̃̀ nə̀bán yó kàmə̀jɛ̃̀ y ǹdə vwĩ̀-zwə́lnə náncɛ y kàmə̀zwǐ y ta: ń zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ n mə n sɔ̃̀ ya, n zɛ̃̀ n zò y ǹdə́ sánə́má, rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum. ⁹ Nə̀bán yó kàmə̀jɛ̃̀ y y'à kɔ́ e pú dwã wa, è sarha nɛ́ nə̀na y ga dwɛ̀lɛ̀ rɛ́ y'à mə̌ dwã, nə̀ dwɛ̀lɛ̀ rɛ́ ǹdə́ nə̀ wɛ̃̀ rɛ́ ga y'à wɔ́ jɛ̃̀-wàn. ¹⁰ 10 Bə̀ y'à tùrhì nə́kulə náàcɛ̀nà nə̀rh sə̀na è yó, è bɔ́bwár yilə: nà nã́yə́ə́ y nə́kulə né wɔ́ sarədwaanɛ ǹdə́ tɔpaazɛ e súlí emərɔ́ɔ́dɛ. ¹¹ Nə̀rh sə̀lyè nyǎ y nə́kulə né y'à wɔ́ esəkarəbúúkəli ǹdə́ ləzulyiiti e súlí zhaasəpɛ. ¹² Nə̀rh sə̀tɔ̀ nyǎ y nə́kulə né y'à wɔ́ agaatɛ ǹdə́ korənəlyiini e súlí amətiisəti. ¹³ Nə̀rh sə̀na nyǎ y nə́kulə né y'à wɔ́ kərizolyiiti ǹdə́ beriili e súlí onikəsi. Nə́kulə né, òmyɛ́ òdù gakó y'à dɛ̃ sánə́má ka cəcəl wə. ¹⁴ Nə́kulə né y'à mɛrhɛ Esərayɛl lyì byǎ bɛ́ kwálsɛ́ yilə né yó wə́, nə̀ y'à wɔ́ shí ǹdə́ nə̀lyè ǹdə Esərayɛl lyì byǎ bɛ́ kwálsɛ́ yó w ta. Bə̀ y'à kɛ̃ kwálá èdù gakó yil ré nə́kulu òdù gakó yó, kwálsɛ́ gə́ wɔ́ shí ǹdə́ sə̀lyè yilə, ǹdə bə̀ gə́ y'a kɛ̃ zhə̀n-pɔ ku w yó né. ¹⁵ Bə̀ zùrhì nyáná nə̀lyè námpɔ́lsɛ ǹdə́ sánə́má mɔ̀bɔ́ mə̀ càn, nə pyɛ́pyɛ́rɛ́ dwã nɛ ǹdə wɔ́ nyínsi bə̀ nyɔ̀ ta, bə ce nə̀bán yó kàmə̀jɛ̃̀ y nɛ. ¹⁶ Bə̀ zùrhì sánə́má shisí shɛ̀bɛ́ bə̀ wɔ̌ bə̀ dɛ̃ nə́kulə sə̀ yó mó sə̀lyè ǹdə́ sánə́má cìbyǔr rə̀lyè, bə zɛ̃̀ bə lyẽ cìbyǔr rí nə̀bán yó kàmə̀jɛ̃̀ y dɛ̃̌ sõ nə̀gúlə́ né nə̀lyè y ne. ¹⁷ Bə̀ lyẽ sánə́má nyáná námpɔ́lsɛ́ nə̀ pyɛ́pyɛ́rɛ́ dwã nɛ mɔ́ cìbyǔr rí rə̀lyè y ne, nə̀bán yó kàmə̀jɛ̃̀ y nyə́ né ne; ¹⁸ bə zɛ̃̀ bə lyẽ sánə́má nyáná námpɔ́lsɛ́ nyə́ né nə̀lyè y sánə́má shisí sə̀lyè y ne, bə súlí bə tó vwĩ̀-zwə́lnə náncɛ y kàmə̀zwǐ y yé y w bə lyẽ ne è vɔla nɛ́ nɛ. ¹⁹ Bə̀ lù sánə́má cìbyǔr rə̀lyè, bə kwè re bə lyẽ nə̀bán yó kàmə̀jɛ̃̀ y tɛ̃́ sõ nə̀gúlə́ né nə̀lyè y ne, nə̀ gə́ n'ê pyẽ̀ vwĩ̀-zwə́lnə náncɛ y kàmə̀zwǐ y yó mə̀gã̌ mɔ́. ²⁰ Bə k'e lù sánə́má cìbyǔr dwã rə̀lyè bə ce vwĩ̀-zwə́lnə náncɛ y kàmə̀zwǐ y vɔla nɛ́ tɛ̃́ mɔ́ nɛ, è yé né, vɔla nɛ́ gə́ nyal nə dɛ̃ kàmə̀zwǐ y ni mə̀gã̌ mɔ́, kàmə̀zwǐ y lyẽẽ́sé yó. ²¹ Bə zə kàmə̀jɛ̃̀ námpùlí bə m'e lyẽ nə̀bán yó kàmə̀jɛ̃̀ y cìbyǔr rí ǹdə́ vwĩ̀-zwə́lnə náncɛ y kàmə̀zwǐ y cìbyǔr rí dwã nɛ, mùnì ga nə̀bán yó kàmə̀jɛ̃̀ y pyẽ̀ vwĩ̀-zwə́lnə náncɛ y kàmə̀zwǐ y lyẽẽ́sé yó. Èta mɔ́ è y'à t'â dùr vwĩ̀-zwə́lnə náncɛ y kàmə̀zwǐ y yó yé, ǹdə Cinu gə́ yà ń pɔ nyí Muyiisi ni ní. ²² Rə̀myɛ́ kwã nɛ́, ń sɔ̃̀ kàmə̀zù-èdɔ̀lɔ̀ w kɔ̀bɔ́ vwĩ̀-zwə́lnə náncɛ y n'ê zwì è kàmə̀zwǐ y kùr w mú, ò púlə́púlə́ y'à j'a sɔ̃̀ ǹdə́ pyì-kur rə̀ mɔ́rh námpùúli, rə̀myɛ́ mɔ́ yàl sɔ́rá tum. ²³ Bə̀ y'à vùr byã kàmə̀zù-èdɔ̀lɔ̀ w cəcəl ré w yó w gə́ y'à la mə̀gã̌ tó mó. Byã y nyí rí y'à kwərə, rə̀myɛ́ mɔ́ y'à ce è y'à də̀ kɔn tɛ̀bɛ́ rə̀ m'a kǎr yé. ²⁴ Bə̀ y'à zò gərənəjé byǎ myaarhɛ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀wà, bə cĩ́ kàmə̀zù-èdɔ̀lɔ̀ w tɛ̃́ sõ nyə́ né yó. ²⁵ Bə̀ zùrhì sánə́má mɔ̀bɔ́ mə̀ càn lòmə̀ námpɔ́lsɛ bə lyẽ bə lwẽ̌ lwẽ̌ gərənəjé byǎ bɛ́ nɛ, kàmə̀zù-èdɔ̀lɔ̀ w tɛ̃́ sõ nyə́ né ne, bə kə́kɛ́lɛ́: ²⁶ lòmə̀ né námpɔ́lsɛ́ ǹdə́ gərənəjé byǎ bɛ́ y'à lwẽ̌ dwã nɛ èdù èdù kàmə̀zù-èdɔ̀lɔ̀ w nyə́ né ne rə kə́kɛ́lɛ́, vwĩ̀-zwə́l tum rí tũ̌ yilə, ǹdə Cinu gə́ yà ń pɔ nyí Muyiisi ni ní. ²⁷ Rə̀myɛ́ kwã nɛ́, bə̀ sɔ̃̀ lɛ̃̌ kàmə̀zwǐsí Aarɔ̃ ǹdə́ ń byǎ bɛ́ yilə, rə̀myɛ́ mɔ́ yàl sɔ́rá tum, ²⁸ bə súlí bə sɔ̃̀ lɛ̃̌ yó-bɔrɔ́ wá, ǹdə́ lɛ̃̌ yə́-púr bɔ́bwár wẽ̀ ré e súlí lɛ̃̌ jar rɛ́, ǹdə́ lɛ̃̌ bə̀ nyɔ̀wà; ²⁹ e súlí lɛ̃̌ bə̀ nyɔ̀ cã̌-tàndɛ́ rə̀ zò ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́, ǹdə Cinu gə́ yà ń pɔ nyí Muyiisi ni ní, sə rə̀myɛ́ mɔ́ yàl lò mɔ̀bɔ́ ń yà ń yě tum rí rə̀myɛ́ mɔ́ yé shò mó tum. ³⁰ Rə̀myɛ́ kwã nɛ́, bə̀ zə sánə́má mɔ̀bɔ́ mə̀ càn bə zùrhì ku ǹdə pùní ta, ò wɔ́ kɔn rɛ́ tɛ̀bɛ́ bə̀ pɔ Cinu ni mú myɔrhɔ, bə zɛ̃̀ bə kɛ̃ ò yó ǹdə bə̀ gə́ y'a kɛ̃ zhə̀n-pɔ ku yó né bə wɔ̀: «Bə̀ pɔ Cinu ni». ³¹ Bə zə kàmə̀jɛ̃̀ námpùlí bə m'e lyẽ ku w òmyɛ́ mɔ́ yó-bɔrɔ́ w cíl rí ni, ǹdə Cinu gə́ yà ń pɔ nyí Muyiisi ni ní. ³² Wɔ́ èta Yi kòrhó w dwã-joló kòrhó w tumə né gakó tó né nə twĩ̀ nə zhɛ̀. Esərayɛl lyì byǎ y'à twĩ̀ tum rí tɛ̀bɛ́ Cinu yà ń pɔ rə̀ nyí Muyiisi ni mú cìcì. Muyiisi zwẽ kɔn rɛ́ tɛ̀bɛ́ gakó Esərayɛl lyì byǎ bɛ́ wɛ̀rhɛ́ mɔ́ ³³ Esərayɛl lyì byǎ bɛ́ zə Yi kòrhó y wẽ̀ ré gakó bə m'e bə̀ Muyiisi yé né: kòrhó w ǹd'ô wẽ̀ ré dwã bɛ́: ò pyə́lsɛ́ ǹd'ô sarha nɛ́ dǎr rɛ́, ǹd'ô də̀-byǎ bɛ́ bə̀ n'ê jarh dǎr rɛ́ yó mó, ǹd'ô yə né ǹdə́ wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó; ³⁴ 34 ǹdə́ pyì-byərh tàndɛ rə̀ mɔ́rh nánshɛ̀n ǹdə́ dɔfɛ̃́ɛ̃́sɛ tàndɛ e súlí gɔ̀nɔ̀ w ò n'ô bɔ̀n Yi jì y dwã w mɔ́; ³⁵ ǹdə́ dɔbrɛ nyə́ né kùlkṍ w ǹd'ô də̀-byǎ bɛ́ ǹd'ô nyí-byǐ rí; ³⁶ ǹdə́ tabəlɛ́ y ǹdə́ è wẽ̀ ré dwã bɛ́ gakó ǹdə́ búrú w bə̀ n'ê pɛ Yi ni mú; ³⁷ ǹdə́ ku w bə̀ n'ê cĩ́ pàntámsɛ́ ò yó, ò y'à zùrhì ǹdə́ sánə́má mɔ̀bɔ́ mə̀ càn mɔ́ ǹd'ô pàntámsɛ́ sə̀ y'à cĩ́ sə tùrhì nà èdù mú, ǹd'ô wẽ̀ ré dwã bɛ́ ǹdə́ pàntámsɛ́ nwə̃̌ yə́; ³⁸ ǹdə́ sánə́má vwĩ̀-jùlú w ǹdə́ nwə̃̌ y bə̀ m'ê pɛ Yi tum rí tũ̌ mú ŋwɔ̀nɔ́ w mɔ́ ǹdə́ wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú e súlí kòrhó w étwí-ènyí rí gɔ̀nɔ̀ wá; ³⁹ ǹdə́ kàmmɔ vwĩ̀-jùlú wə́, ǹd'ô ku w ǹd'ô bɔ̀là ǹdə zhəzhərhá ta mɔ́ ǹd'ô də̀-byǎ bɛ́ ǹd'ô wẽ̀ ré dwã bɛ́ gakó, ǹdə́ kàmmɔ zhǎ y ǹdə́ ku w kɔ̀bɔ́ è kùr rí n'ê cĩ́ ò yó mó; ⁴⁰ ǹdə́ kɔ̀nɔ́ w kàmə̀jɛ̀sɛ́ ǹd'ô yə né ǹdə́ wẽ̀ ré tɛ̀bɛ́ nə̀ kùrə̀ né n'ê cĩ́ rə̀ yó mó, ǹdə́ kɔ̀nɔ́ w nyí rí gɔ̀nɔ̀ w ǹd'ô nyínsí ǹd'ô pálá nɛ́ e súlí Yi kòrhó wə́, dwã-joló kòrhó w tum rí wẽ̀ ré dwã bɛ́ yilə; ⁴¹ ǹdə́ vwĩ̀ rí zwə́l tum rí gàndɛ́ bə̀ n'ê zwì bə̀ m'ê twĩ̀ còrhó-jì y wẽ́ mó ǹdə́ vwĩ̀-zwə́lnə Aarɔ̃ gàndɛ́ e súlí gàndɛ́ tɛ̀bɛ́ ń byǎ bɛ́ y'à n'ê zwì bə̀ m'ê twĩ̀ vwĩ̀ rí zwə́l tum rí mú. ⁴² Esərayɛl lyì byǎ bɛ́ y'à twĩ̀ tum rí rə̀myɛ́ mɔ́ gakó kɔn tó nyə́ né nyɛ̀bɛ́ gakó Cinu yà ń pɔ Muyiisi ni mú. ⁴³ Muyiisi gə́ nyǐ n púrí kɔn tɛ̀bɛ́ gakó Esərayɛl lyì byǎ bɛ́ y'à wɛ̀rhɛ́ mɔ́ y'à tó kɔn rɛ́ tɛ̀bɛ́ cìcì Cinu yà ń pɔ rə̀ nyí mú ni, Muyiisi cĩ́ bwəl bə̀ yó.