¹ Àmyɛ́ Pwǝǝ, Yi ce à wɔ́ Yezu Kristǝ tùntúm ǹdǝ rǝ̀ gǝ́ n'ê yǎl nɛ́. Wɔ́ àmyɛ́ à n'â kɛ̃ sɛ́bɛ́ rɛ́ tɛ̀bɛ́ à la ámyɛ̌ byɛ̀bɛ́ á wɔ́ Yi lyì, á ŋwɛ́nɛ́ Efɛɛzɛ nɛ́, á zù Yezu Kristǝ mó ne pɔ. ² Nǝ́ Da Yi ǹdǝ́ nǝ́ Cinnǝ Yezu Kristǝ m'a cĩ́ bwǝl á yó, sǝ bǝ pǝ ába yǝ̀-zùlǝ́! ³ Bà-nà nǝ́ cèrhé nǝ́ Cinnǝ Yezu Kristǝ Da Yi rí, bǝ̀ rǝ̀ cĩ́ bwǝl dwí tɛ̀bɛ́ gakó rǝ̀ n'ê shí dɛ̃̌ Arǝzana w mɔ́ nǝ́ yó. Bwǝl ré rǝ̀myɛ́, wɔ́ Eshirhǝ náàcɛ̀nɛ́ sõ rǝ̀ n'ê shí ní, Kristǝ jàn yilǝ. ⁴ 4 Yi tó Kristǝ dɛnnɛ rǝ cír nǝ́ba ǹdǝ́ rǝ̀ gwẽ̌ yǝ̀ lũ w wɛ̀rhɛ́ yé, rǝ ce nǝ́ jǐrh rǝ̀ lyì zhǝ̀nà, dóó bǝ̀k'á jòm nǝ́ yó w rǝ̀ yé né yé. ⁵ Rǝ̀ gǝ́ só nǝ́ba mó ce, rǝ̀ gu rǝ̀ wẽ́ rǝ̀ n'ê yǎl bǝ̀ nǝ́ tó Yezu Kristǝ dɛnnɛ nǝ́ jǐrh rǝ̀ byǎ. Rǝ̀myɛ́ yàl rǝ̀ pùbùlǝ̀, rǝ̀ gǝ́ wɔ́ wu-bɔ̀nɔ̀ cí mú yilǝ. Rǝ̀ wɛ̀rhɛ́ èta nǝ́ yilǝ, ⁶ mùnì ga nǝ́ cèrhé re rǝ̀ gǝ́ tó rǝ̀ Byì-sónó w dɛnnɛ rǝ pǝ nǝ́ba rǝ̀ zùwǝ́ pɛnɛ́ y nánfó w mɔ́ yilǝ. ⁷ Kristǝ zǝ ń cìn n yǝ̀ vwĩ̀-kɔna. Nǝ́ zɛ̃̀ nǝ́ tó ń jal mɔ́ dɛnnɛ nǝ́ nǝ nǝ́ cìnǝ̀, nǝ́ jà nǝ́ nǝ nǝ́ dwǝ́ǝ́ré sǔbri. Èta, Yi byili rǝ̀ pɛnɛ́ nánfó w rǝ̀ wɛ̀rhɛ́ ǹdǝ́ nǝ́ba mɔ́. ⁸ Rǝ̀ pɛnɛ́ nánfò w já dɛ̃́dɛ̃́, rǝ̀ pɔ nǝ́ba surhǝ ǹdǝ́ lárma dwí gakó. ⁹ Kɔn ŋwɛ́nɛ́ rǝ̀ y'à shèè, Yi y'à dámǎ rǝ gu rǝ̀ wẽ́ rǝ̀ la tó Kristǝ dɛnnɛ rǝ wɛ̀rhɛ́, rǝ̀ gǝ́ wɔ́ wu-bɔ̀nɔ̀ cí mú yilǝ. Wɔ́ rǝ̀myɛ́ Yi ce nǝ́ lwar. ¹⁰ Yi n'ê yǎl rǝ pyìrh kɔn rɛ́ rǝ̀myɛ́ mɔ́ ǹdǝ́ rǝ̀ yi rí gǝ tú rǝ̀ yúwǝ́. Rǝ̀myɛ́ yi ní, Yi b'a mù kɔn dɛ̀bɛ́ rǝ̀ ŋwɛ́nɛ́ dɛ̃̌ ǹdǝ́ cɛ yó mó dwí gakó dwã w rǝ ce Kristǝ jɔ̃̀ w n cìní. ¹¹ Yi n'ê wὲrhέ kɔn gakó rə tó ǹdə rəmyέ cìcì gə n'ê yǎl. Wɔ rǝ̀myέ è ce rǝ̀ tó Kristə dɛnnɛ rə cír nǝ́ba mùnì nǝ́ jǐrh rǝ̀ sǝ̀pwà lyì. Wɔ́ èta rǝ̀ y'à dámǎ rə gu rǝ̀ wẽ rǝ̀ la nέ wɔ̀rhɔ́, ¹² mùnì ga nǝ́myɛ̌ byὲbέ nǝ́ tó yé nǝ́ r'é dɛ̃̀ kɔn Kristə sõ mó cèrhé re rǝ̀ zùwǝ́ y nánfɔ̀lɔ̀ w yilə. ¹³ Kɔn wɔ́ èta ǹd'ámyɛ; á nyɛ̀ɛ̀ zɔ̀mɛ̀ rɛ́ tɛ̀bɛ́ rǝ̀ wɔ́ zhǝ̀n mɔ́. Wɔ́ rǝ̀myɛ́ rǝ̀ wɔ́ yò-ècɔ̀nɔ̀ nyí rí Yi tó rǝ̀ dɛnnɛ rǝ vwǎrh ába mɔ́. Á zù Kristǝ, Yi ce Eshirhǝ náàcɛ̀nɛ́ y rǝ̀ y'à bwǝl è nyí mú só á yó wǝ. Eshirhǝ y èmyɛ́ wɔ́ rǝ̀ cìcì myɔrhɔ rǝ̀ cĩ́ á yala nɛ. ¹⁴ Yi gǝ́ ce Eshirhǝ náàcɛ̀nɛ́ só nǝ́ yó mó n'ê byili bǝ̀, dɛ̃ rɛ́ tɛ̀bɛ́ Yi lyì bí la vwǎrh nɔ námpúm mú gǝ yúwǝ́, rǝ̀ b'a pǝ nǝ́ba kɔn rɛ́ dɛ̀bɛ́ rǝ̀ bwǝl nyí bǝ̀ rǝ̀ la nǝ́ba pɔ mɔ́ gakó, mùnì ga nǝ́ cèrhé re rǝ̀ zùwǝ́ y nánfɔ̀lɔ̀ w yilǝ. ¹⁵ Wɔ́ rǝ̀myɛ́ gakó è ce, èlǎsɛ̃́ à gǝ́ nyɛ̀ɛ̀ b'ǎ zhí Cinnǝ Yezu ni, á j'ǎ só byɛ̀bɛ́ bǝ̀ wɔ́ ń lyì mú, ¹⁶ à n'â ce Yi nǝ̀bán twéé gakó á yilǝ. À gǝ la Yi-co wɔ̀rhɔ́ gakó, à t'â swě á yò yé. ¹⁷ À n'â lwǝ̀l mɔ̀bɔ́ ń wɔ́ nǝ́ Cinnǝ Yezu Kristǝ Yi rí, n jà ń wɔ́ ń Da, ń mǝ̌ ǹdǝ́ còrhó mó ne, bǝ̀ ń ce Eshirhǝ náàcɛ̀nɛ́ pǝ ába surhǝ á lwar ń pár náàcɛ̀nɛ́. ¹⁸ À n'â lwǝ̀l mò bǝ̀ ń pul á wun ní pamparɛ̃ɛ̃, mùnì á sú kɔn dɛ̀bɛ́ ń byẽ̀ ába á n'á dɛ̃̀ ń sõ mó kùrǝ̀, s'á lwar kɔn rɛ́ nánfɔ̀lɔ̀ w kɔ̀bɔ́ ń bwǝl nyí bǝ̀ ń la ń lyì bí ni pɔ mɔ́ myɛ gǝ́ wɔ́ nɛ́, ¹⁹ s'á j'ǎ lwar jàn rɛ́ nánfɔ̀lɔ̀ w rǝ̀ ŋwɛ́nɛ́ nǝ́myɛ̌ byɛ̀bɛ́ nǝ́ zù mù mú wẽ́ rǝ̀ n'ê twĩ̀ mú yé-shò. Yi ce jàn nánfɔ̀lɔ̀ w òmyɛ́ mɔ́ n'ô twĩ̀. ²⁰ Rǝ̀ tó rǝ̀ gǝ́ bwìrhì Kristǝ rǝ ce n zɛ̃̀ n vò dɛ̃̌ Arǝzana w ń jě rǝ̀ jǝ̀jĩ́ ní mú dɛnnɛ, rǝ byili rǝ̀ jàn nánfɔ̀lɔ̀ wá. ²¹ Èta, rǝ̀ ce Kristǝ cǐ jàn cìnǝ́ bé bǝ̀ ŋwɛ́nɛ́ dɛ̃̌ bǝ̀ zhe ŋwɔ̀nɔ́, bǝ̀ n'ê jí pyɛ̀lɛ̀ mɔ́ dwí gakó. Ń zhe ŋwɔ̀nɔ́ du kɔn dɛ̀bɛ́ dwí gakó rǝ̀ ŋwɛ́nɛ́ èlǎsɛ̃́ lũ w wẽ́, ǹdǝ́ tɛ̀bɛ́ rǝ̀ la lũ w kɔ̀bɔ́ ò bàn mɔ́ wẽ́ yál mɔ́ gakó. ²² Yi co kɔn gakó Kristǝ nǝ̀rh kùr w ń cǐ. Rǝ̀ ce ń wɔ́ ń lyì bí gùlú w yó-cǝ́bal. ²³ Gùlú w wɔ́ Kristǝ yala. Ń ŋwɛ́nɛ́ ò wẽ́ námpúm. Yi cìcì zɛ̃̀ rǝ̀ ŋwɛ́nɛ́ Kristǝ wẽ́ námpúm.