¹ Àmyɛ́ Pwǝǝ, à wɔ́ Yezu Kristǝ tùntúm ǹdǝ́ Yi pùbùlǝ̀, àmyɛ́ ǹdǝ́ nǝ́ da-byǐ ² Timote nǝ́ n'é kɛ̃ sɛ́bɛ́ rɛ́ tɛ̀bɛ́ nǝ́ la lyì bí byɛ̀bɛ́ bǝ̀ zù Kristǝ mó ǹdǝ́ nǝ́ da-byǎ nántwǝ̌rh byɛ̀bɛ́ bǝ̀ ŋwɛ́nɛ́ Kɔlɔɔsɛ nɛ́ mɔ́ nɛ pɔ. Bǝ̀ Yi Pɛnɛ́ y nánfò w ǹdǝ́ Yi nǝ́ Da mɔ́ yǝ̀zùlǝ́ né yál nɛ́ ǹdǝ́ ába. ³ Nǝ́ n'é ce Yi, nǝ́ Cǐnnǝ Yezu-Kristǝ Da mɔ́ twéé twéé á yilǝ ⁴ ǝ́ nyɛ̀ɛ̀ á Yi ni zú mú Yezu Kristǝ wẽ́ mó, ǹdǝ́ sónó w kɔ̀bɔ́ á zhe ǹdǝ́ byɛ̀bɛ́ bǝ̀ vùr bǝ cĩ́ kwã Yi yil mó. ⁵ Á zhe sónó w òmyɛ́ kɔn rɛ́ tɛ̀bɛ́ á zhe rǝ̀ zhǝ̀n á n'á dɛ̃̀ Arǝzana w mɔ́ yilǝ. Á ju kùr á nyɛ̀ɛ̀ bǝ̀ zɔ̀m zhǝ̀n rɛ́ tɛ̀bɛ́ rǝ̀ wɔ́ zɔ̀mɛ̀ rɛ́ mɔ́, ⁶ yò-ècɔ̀nɔ̀ ní rí rǝ̀ tú á sono. yò-cɔ̀nɔ̀ nyí rí rǝ̀myɛ́ n'ê ce byǎ, sǝ byǎ bɛ́ làà dɛ̃̌ lũ w wẽ́. zɔ̀mɛ̀ rɛ́ n'ê twĩ́ dɛ̃ rɛ́ tɛ̀bɛ́ á nyɛ̀ɛ̀ rɛ á lwar Yi pɛnɛ́ nánfò w zhǝ̀n rɛ́ wẽ́ mó. ⁷ wɔ́ ǹdǝ yò-ècɔ̀nɔ̀ nyí rí á tó nǝ́ tó-dõ tùntùnnǝ Epafɔrasɛ nǝ́ só mó dɛnnɛ á nyɛ̀ɛ̀ mɔ́, ń wɔ́ Kristǝ tùntùnnǝ̀ zhǝ̀n-cǝ́bal nǝ́ yilǝ. ⁸ Epafɔrasɛ byili nǝ́ba á sónó w á zhe Yi Eshìrhǝ́ y wẽ́ mó. ⁹ Wɔ́ sónó w òmyɛ́ yilǝ, dɛ̃ rɛ́ tɛ̀bɛ́ nǝ́ nyɛ̀ɛ̀ rǝ̀myɛ́ mɔ́, nǝ́ j'á yǝ̀ yẽ̌ ǹdǝ́ Yi co á yil yé. Twéé twéé gakó nǝ́ n'é lwǝ̀l Yi mùnì ga á zǝ lárma dɛ̃́dɛ̃́ á lwar rǝ̀ pùbùlǝ̀ né á sú éshìrhǝ́ y nyǝ̀nɛ́ kùrǝ̀. ¹⁰ Nǝ́ gwẽ̌ cǝ̀ǝ̀le nǝ́ n'é lwǝ̀l Yi mùnì ga á n'á zhǝ̀l ǹdǝ kɔn gǝ́ mǝ̌ nɛ́ Cǐnnǝ mó yilǝ, á sú ń yírhǝ́. Nǝ́ gwẽ̌ cǝ̀ǝ̀le nǝ́ n'é lwǝ̀l Yi mùnì á ce byǎ tum tɛ̀bɛ́ rǝ̀ càn gakó wẽ́, sǝ á n'á byìl Yi pár lwar mɔ́ wẽ́. ¹¹ Nǝ́ n'é lwǝ̀l Yi s'á zǝ jàn kɔn gakó wẽ́, á zǝ cìn-pyɔ́nɔ́ ǹdǝ́ yala nɛ zhùlù kɔn gakó wẽ́ rǝ̀ jàn rɛ́ ǹdǝ́ rǝ̀ zuwǝ́ y wẽ́. Nǝ́ n'é lwǝ̀l Yi, ¹² s'á ce Da mɔ́ nǝ̀bán ǹdǝ́ wu-nyɔ bǝ̀ ń ce ámyɛ wɔ̌ á nɛ cǝl kɔn rɛ́ dɛ̀bɛ́ ń tɛnɛ n cĩ́ ń lyì bí ni pwẽ̀ jàà w mɔ́ wẽ́. ¹³ Ń vùr nǝ́ba cǝ-byí wǝ, cǝ-byín rí k'ê bǝ ŋwɔ̀nɔ́ zhe nǝ́ yó yé, ń ce nǝ́ zù ń Byì-sónó w tǝnà y wa. ¹⁴ Wɔ́ ń Byǐ mú ńmyɛ̌ dɛnnɛ nǝ́ tó né nǝ́ nǝ nǝ́ cìnǝ̀, nǝ́ nǝ nǝ́ yǝ̀-bǝlwàálɛ́ sǔbri. ¹⁵ Lò lò wàr Yi ń la nɔ ǹdǝ́ ń yírhǝ́ yé. Wɔ́ Kristǝ ń nǝ́ ń byili rǝ̀ gǝ́ wɔ́ nɛ́ ma cìcì. Ńmyɛ̌ ń wɔ́ Yi Byì-cɛ, ń cǐ dɛ̀bɛ́ gakó Yi wɛ̀rhɛ́ mɔ́, ¹⁶ bǝ̀ wɔ́ nmyɛ̌ dɛnnɛ Yi tó né rǝ wɛ̀rhɛ́ kɔn dɛ̀bɛ́ gakó rǝ̀ ŋwɛ́nɛ́ dɛ̃̌ ǹdǝ́ cɛ yó, tɛ̀bɛ́ yírhǝ́ wɔ̌ nǝ̀ nɛ, ǹdǝ́ tɛ̀bɛ́ yírhǝ́ wàr nǝ̀ nɛ, jàn cìnǝ́ byɛ̀bɛ́ bǝ̀ ŋwɛ́nɛ́ dɛ̃̌ bǝ̀ zhe ŋwɔ̀nɔ́, bǝ̀ n'ê jí pyɛ̀lɛ̀ mɔ́ dwí gakó. Wɔ́ ńmyɛ̌ dɛnnɛ yi tó né rǝ wɛ̀rhɛ́ kɔn gakó, e jà wɔ́ ńmyɛ̌ yil Yi wɛ̀rhɛ́ rɛ. ¹⁷ Ń jɛ̀rɛ̀ kɔn gakó ń ŋwɛ́nɛ́. Wɔ́ ńmyɛ̌ jàn yil kɔn gakó zhǐ rǝ̀ jàà wa. ¹⁸ Wɔ́ Ńmyɛ̌ ń wɔ́ yala nɛ́ yó wǝ́. Yala nɛ́ nǝ̀myɛ́ wɔ́ ń gùlú wǝ́. Wɔ́ ńmyɛ̌ ń wɔ́ kɔn gakó kùr-jirǝ́. Byɛ̀bɛ́ bǝ̀ cù mú wẽ́, wɔ́ ńmyɛ̌ ń yàl nã́yǝ́ǝ́ mó ń bwìrhì, mùnì n yǝ̀ kɔn gakó yé né. ¹⁹ Kɔn yàl Yi pùbùlǝ̀ bǝ̀ rǝ̀myɛ́ cìcì yál rǝ̀ Byǐ wẽ́ námpúm. ²⁰ Bǝ̀ pǝpa rǝ̀ Byǐ mú dǝ̀-jɔrhɔ́ yóń jal mɔ́ ló tɛ̃́. Kɔn yàl rǝ̀ pùbùlǝ̀ bǝ̀ rǝ̀ tó ń jal mɔ́ mǝ̀myɛ́ dɛnnɛ rǝ ce yǝ̀-aùlǝ́ yǝ̀ nɛ́. Èta, rǝ̀ tó ńmyɛ̌ dɛnnɛ rǝ kwɛrhɛ kɔn dɛ̀bɛ́ gakó cɛ yó, ǹdǝ́ tɛ̀bɛ́ gakó rǝ̀ ŋwɛ́nɛ́ Arǝzana w mɔ́ yò ǹdǝ́ rǝ̀ cìcì. ²¹ Shãã ga, ámyɛ y'ǎ nyɛ ǹdǝ́ Yi; á bùlǝ̀ námmǝlwǎlsɛ́ ǹdǝ́ á tumǝ námmǝlwǎlsɛ́ ce á y'ǎ wɔ́ rǝ̀ zwǝ̀. ²² Sǝ Yi byǐ mú jǐrh numbyíní n cì. Èlǎsɛ̃́, Yi tó ń cu mú dɛnnɛ rǝ k'a kwɛrhɛ á yò ǹdǝ́ rǝ̀ cìcì, mùnì ga á yǝ̀ rǝ̀myɛ́ lyì, á yǝ̀ wárhgáá, dóó bǝ̀k'a yǝ̀ á yó w yé, á b'á ŋwɛ̀nɛ́ á zhì rǝ̀ yé né. ²³ Sǝ á mǝ̌ s'á pǝ á nà tɛ̃́ á zhì kẽkẽ á ni zhú mú wẽ́. Á bǝ̀k'á yẽ̌ yò-ècɔ̀nɔ̀ nyí rí bǝ̀ bwǝ̀l bǝ byili ába mó ne yé, bǝ̀ wɔ́ rǝ̀myɛ́ rǝ̀ ce nǝ́ n'é dɛ̃̀ kɔn dɛ̀bɛ́ Yi la nǝ́ba pɔ mɔ́. Bǝ̀ bwǝ̀l yò-ècɔ̀nɔ̀ nyí rí rǝ̀myɛ́ mɔ́ bǝ byili lũ w púlǝ́púlǝ́ ne, sǝ àmyɛ́ wɔ́ rǝ̀myɛ́ yil à n'â twĩ̀. ²⁴ Sǝ à wu-nyɛ̀ èlǎsɛ̃́ à gǝ́ n'â nwɛ̀nɛ̀ á yil mó. Wɔ́ nɔ̀nɔ̀ w kɔ̀bɔ́ Kristǝ nwɛ̀nɛ̀ ń yala nɛ́ yil mó àmyɛ n'â tó mo à nwɛ̀nɛ̀. Yala nɛ́ nǝ̀myɛ́ mɔ́ wɔ́ ń gùlú wǝ́. ²⁵ Yi twĩ̀ ni b'à bwǝ̌l rǝ̀ zɔ̀mɛ̀ rɛ́ a byili lyì bí ni. Wɔ́ rǝ̀myɛ́ à jǐrh gùlú w tùntùnnǝ, mùnì a bwǝ̀l re námpúm a byili ába. ²⁶ Lũ w kùr-ju yi ní ga, Yi y'à shèè re lyì dwí gakó yé né. Sǝ èlǎsɛ̃́, rǝ̀ byili ri rǝ̀ lyì bí ni pamparɛ̃ɛ̃. ²⁷ Zɔ̀mɛ̀ rɛ́ rǝ̀myɛ́ zhe kùr dɛ̃́dɛ̃́. Wɔ́ rǝ̀myɛ́ è ce Yi byili rǝ̀myɛ́ ǹdǝ́ rǝ̀ zùwǝ́ y rǝ̀ lyì bí ni nunǝ dwí gakó yilǝ.Zɔ̀mɛ̀ rɛ́ rǝ̀myɛ́ n'ê byili bǝ̀ Kristǝ ŋwɛ́nɛ́ á wẽ́; wɔ́ ńmyɛ̌ ń ce á n'á dɛ̃̀ kɔn Yi zùwǝ́ y wẽ́. ²⁸ Wɔ́ Kristǝ mó ńmyɛ̌ yò w nǝ́ n'é bwǝ̀l nǝ́ byili bí gakó ne. Nǝ́ n'é cící bi, nǝ́ n'é byili bi ǹdǝ́ surhǝ nyɛ̀bɛ́ gakó nǝ́ zhe, mùnì ga nǝ́ sɛ̃ bɛ bǝ ŋwɛ̀nɛ́ bǝ yǝ̀ náàcɛ̀nà Yi yé né. ²⁹ Wɔ́ rǝ̀myɛ́ yil à n'â ce jàn nɛ́ à twĩ̀ ǹdǝ́ jàn rɛ́ nánfɔ̀lɔ̀ w Kristǝ pɔ nɛ mɔ́.