¹ Zhǝ̀nà, à n'â yǎl b'ǎ lwar b'à n'â ce jàn nɛ́ ǹdǝ́ à wu gakó àmyɛ́ ǹdǝ́ Laɔdɛɛsɛ lyì bí ǹdǝ́ byɛ̀bɛ́ gakó bǝ̀ gwẽ̌ yǝ̀ nɛ nɛ ǹdǝ́ bǝ̀ yírh mó yilǝ, ² mùnì ga ámyɛ̌ ǹdǝ́ bǝ̀myɛ́ ga wun swẽ́, s'á zǝ sónó ǹdǝ́ nyì-dwìì, s'á zǝ lárma dɛ̃́dɛ̃́, á lwar Kristǝ mó ń wɔ́ kɔn dɛ̀bɛ́ Yi y'à shèè mó párá. ³ Wɔ́ ńmyɛ̌ sõ surhǝ ǹdǝ́ zhǝ̀n pár lwar dwí gakó n'ê shí ni. ⁴ À n'â byili ába rǝ̀myɛ́ mùnì ga á bǝ̀k'á yẽ̌ lò zǝ ń zɔ̀m-ènyǝ̀là n mǝ n jǝ́jɛ̀rɛ́ ába yé. ⁵ Bá nǝ́ gǝ nyɛ ǹdǝ́ dwã myɛ, à wu w ŋwɛ́nɛ́ ǹd'ába. À t'â swě á yò yé, sǝ à wu nyɛ̀ à gǝ́ nyɛ̀ɛ̀ b'ǎ zhí Kristǝ ne kẽkẽ, á jě ǹdǝ́ dwã cɛ̀nɛ̀ mɔ́ yilǝ. ⁶ Á zù Kristǝ ń wɔ́ á Cǐnnǝ, j'á n'á tó mo ǹd'á wun gakó. ⁷ Zhí-nǝ ńmyɛ̌ nɛ kẽkẽ ǹdǝ cǒ nèrh gǝ́ y'a pǝ tɛ̃́ nɛ́, s'á yẽ̌ á cìn ni námpúm á ce ń jɔ̃̀ wa. Cǝ̀ǝ̀le-nǝ á zhí mú námpúm ǹdǝ bǝ̀ gǝ́ cèrhè ába né, s'á ce Yi nǝ̀bán dɛ̃́dɛ̃́. ⁸ Dɛ̃̌-na, lò bǝ̀ká n zǝ numbyínsi lárma ǹdǝ́ kɔma zɔ̀mà n jǝ́jɛ̀rɛ́ ába yé, bǝ̀ rǝ̀myɛ́ gakó wɔ́ numbyínsi lùl-e-pwírí ǹdǝ́ lũ w wẽ̀ tɛ̀bɛ́ yírhǝ́ wàr nǝ̀ nɛ wẽ́ rǝ 'ê shí ní, s'e dǝ̀ Kristǝ sõ yé. ⁹ Lwar-na bà Yi cìcì ŋwɛ́nɛ́ Kristǝ nɛ́ wẽ́ námpúm. ¹⁰ Á gǝ́ mù dwã nɛ ǹdǝ́ ńmyɛ̌ mɔ́ ce, á nɔ kɔn gakó ń sõ, bǝ̀ ń cǐ ŋwɔ̀nɔ́ cinǝ́ ndǝ́ jàn cìnǝ́ byɛ̀bɛ́ gakó yírhǝ́ wàr nǝ̀ nɛ mɔ́. ¹¹ Wɔ́ ńmyɛ̌ wẽ́ bǝ̀ gòm ába nɛ́, sǝ bǝ̀ yǝ̀ ába gòm ǹdǝ numbyíní gǝ́ n'ê gòm né yé. ámyɛ̌ góm mó shí Kristǝ sõ, sǝ mǝ̀ vùr kɔn rɛ́ dɛ̀bɛ́ rǝ̀ y'à ŋwɛ́nɛ́ á wẽ́ rǝ̀ n'ê ce á wɛ̀rhɛ́ lwɛlɛ rɛ́ mɔ́. ¹² Bǝ̀ tó nɛ̃̌-mɔ́lɔ́ mɔ́ dɛnnɛ bǝ mù ába Kristǝ ne bǝ ce lúèbɔ̀l wa, sǝ Yi bwìrhì mu n zɛ̃̀ n du cùùri wẽ́. Á gǝ́ zhí Yi jàn rɛ́ nánfɔ̀lɔ w nɛ mɔ́ ce, á k'á tó mo myɛ á bwìrhì. ¹³ Shãã ga, á lwɛlɛ rɛ́ ndǝ́ bǝ̀ gǝ́ y'à ába gòm mó ce, á y'ǎ cùwǝ̀. Sǝ èlǎsɛ̃́, Yi k'a tó Kristǝ dɛnnɛ rǝ bwìrhì ába, rǝ pa nǝ́ba nǝ́ yǝ̇bǝlwàálɛ́ subri. ¹⁴ Sɛ́bɛ́ rɛ́ tɛ̀bɛ́ nǝ́ yǝ̀-bǝlwàálɛ́ y'à kɛ̃ rǝ̀ wẽ́ rǝ̀ n'ê byili bǝ̀ nǝ́ mǝ̌ ǹdǝ́ còrhò-tum mú, Yi kǎr rɛ. Kɔn nyɛ̌ ǹdǝ́ wɔ́ Kristǝ dǝ̀-jɔrhɔ́ yó rǝ̀ pǝpa nɛ́ ta. ¹⁵ Èta, Yi zwẽ ŋwɔ̀nɔ́ cìnǝ́ ǹdǝ́ jàn cìnǝ́ byɛ̀bɛ́ yírhǝ́ wàr nǝ̀ nɛ mɔ́ jàn rɛ́, rǝ zǝ bɛ rǝ m'e byili lyì bí gakó yé né bǝ̀ rǝ̀ Byǐ mú jú bɛlɛ bǝ̀ yó. ¹⁶ Rǝ̀myɛ́ yilǝ, lò bǝ mǝ̌ sǝ n zɔ̀m á sõ kùjú, ráá sɛ̃́ nyɔ́ shò-kwã nɛ́ yé.Lò bǝ mǝ̌ sǝ n zɔ̀m á sõ myɛ címsi jú, ráá càn-dùlí, ráá shìrhǝ́ dɛ̃ rɛ́ yil yé, ¹⁷ bǝ̀ rǝ̀myɛ́ gakó wɔ́ rɛ́ dɛ̀bɛ́ rǝ̀ bàn mɔ́ èsã̌yùlú, sǝ kɔn rɛ́ cìcì mú wɔ́ Kristǝ. ¹⁸ Lyì ŋwɛ́nɛ́ bǝ̀ n'ê wùlì màlɛ́kabá yé né bǝ̀ n'ê cèrhé be. Bǝ̀ n'ê bùl bǝ̀ kɔn dɛ̀bɛ́ bǝ̀ n'ê nɛ bǝ̀ dàrhà wẽ́ mó wɔ́ kɔn nánfɔ̀lɔ̀. Lyì bi bǝ̀myɛ́ mɔ́ bùlǝ̀ né wɔ́ numbyínsi nyǝ̀ná. nǝ zɛ̃̀ nǝ ce bǝ̀ n'ê zhẽ̌ bǝ̀ cìn dɛ̃̌. Á bǝ̀ká yẽ̌ lyì bí bǝ̀myɛ́ mɔ́ dwĩ̀ ába á mùrì kwǎndɛ́ tɛ̀bɛ́ Yi tɛnɛ rǝ cĩ́ ába mɔ́ yé. ¹⁹ Bǝ̀myɛ́ t'â pyɛ́nɛ́ bǝ̀ zhí Kristǝ ne kẽkẽ yé, e jà wɔ́ ńmyɛ̌ ń wɔ́ yala nɛ́ yó wǝ́. Wɔ́ yó w ò n'ô pɛ yala nɛ́ nɛ kɔn dɛ̀bɛ́ gakó nǝ̀ zhe rǝ̀ tum. Wɔ́ òmyɛ́ ò ce yala nɛ́ kǝ̀kàlsɛ́ gakó zhí dwã nɛ náàcɛ̀nɛ́, Yi zɛ̃̀ rǝ ce nǝ̀ n'ê byìl ǹdǝ rǝ̀ gǝ́ n'ê yǎl nɛ́. ²⁰ Ámyɛ̌ tó Kristǝ ne á cì. Èta, á zwẽ á cìn lũ w wẽ̀ ré tɛ̀bɛ́ yírhǝ́ wàr nǝ̀ nɛ mɔ́ jɔ̃̀ wa. Byě yil á nǝ m'ǎ wɛ̀rhɛ́ ǹdǝ lũ w gwẽ̌ cǐ ába ta? Byè yil á nǝ́ yẽ̌ bǝ̀ n'ê pɛ ába nyǝ́ né nyɛ̀bɛ́ èta? ²¹ Nyǝ́ né nǝ̀myɛ́ mɔ́ n'ê byili: Bǝ̀ká kwè tɛ̀bɛ́ yé; bǝ̀ká jí tɛ̀bɛ́ yé; bǝ̀ká dwǝ̀rh tɛ̀bɛ́ yé. ²² E jà wɔ́ wẽ̀ tɛ̀bɛ́ ǹ gǝ kwè ǹ mǝ́ ǹ wɛ̀rhɛ́ kɔn j'â wɔ́ rǝ̀ ga; wɔ́ wẽ̀ ré rǝ̀myɛ́ yil bǝ̀ n'ê pɛ nyǝ́ né nǝ̀myɛ́, e j'à wɔ́ numbyínsi nyǝ́. ²³ Zhǝ̀nà, e wùlì tɛ̃́ e cèrhé Yi ǹdǝ́ cìn-lwǝl ǹdǝ ǹ gǝ́ nǝ́ ǹ yǎl nɛ́, wɔ́ ǹ yala nɛ́ nɔ̀nɔ̀; rǝ̀myɛ́ gakó nyě ǹdǝ surhǝ kɔn ta. Nyǝ́ né nǝ̀myɛ́ j'â bǝ kùr zhe yé. Nǝ̀ wɔ́ numbyínsi yala shil kɔna.