¹ Àmyɛ́ Pwǝǝ à wɔ́ Yezu Kristǝ tùntúm ǹdǝ Yi gǝ́ n'ê yǎl nɛ́. Wɔ́ àmyɛ́ ǹdǝ́ nǝ́ da-byǐ Timote nǝ́ n'é kɛ̃ sɛ́bɛ́ rɛ́ tɛ̀bɛ́ nǝ́ la Yi gùúlí lyì bí bǝ̀ ŋwɛ́nɛ́ Kɔrɛ̃tɛ nɛ́ mɔ́ nɛ pɔ. È dǝ̀ ámyɛ̌ dúdú yé. Wɔ́ ǹdǝ́ Yi lyì bí byɛ̀bɛ́ bǝ̀ ŋwɛ́nɛ́ Akǝyi tǝnà y púlǝ́púlǝ́ wẽ́ mó. ² Nǝ́ Da Yi ǹdǝ́ nǝ́ Cǐnnǝ Yezu Kristǝ b'a cĩ́ bwǝl á yó, sǝ bǝ pǝ ába yǝ̀-zùlǝ́! ³ Bà-na nǝ́ cèrhé nǝ́ Cǐnnǝ Yezu Kristǝ Da Yi rí! Ń wɔ́ nǝ́ Da ǹdǝ́ nǝ́ Yi. Ń zhe wu-bɔ̀nɔ̀ dɛ̃́dɛ̃́. Ń nǝ́ ń pɛ nǝ́ba wu-jɔ̀ twéé twéé. ⁴ Ń nǝ́ ń zal nǝ́ wun ni zwini dwí gakó wẽ́, mùnì ga nǝ́myɛ ŋwɛ̀nɛ́ nǝ́ zǝ lyì byɛ̀bɛ́ bǝ̀ ŋwɛ́nɛ́ zwini wẽ́ mó wun ni ǹdǝ́ wu-jɔ̀ w kɔ̀bɔ́ Yi n'ê pɛ nǝ́ba mɔ́. ⁵ Nǝ́ n'é nɛ wu-jɔ̀ dɛ̃́dɛ̃́ Kristǝ jàn yilǝ, ǹdǝ nǝ́ gǝ́ n'é tó mo nǝ́ nwɛ̀nɛ̀ dɛ̃́dɛ̃́ nɛ́. ⁶ Sǝ nǝ́ gǝ́ n'é nwɛ̀nɛ̀ èta mɔ́, wɔ́ á wun ni zal ǹdǝ́ á vwǎrh yilǝ. Nǝ́ gǝ́ nɔ wu-jɔ̀ mɔ́, wɔ́ mùnì ga nǝ́ zǝ ámyɛ wun ni, á ŋwɛ̀nɛ́ á pyɛ́nɛ́ á zhì kẽkẽ á nɔ̀nɔ̀ w wẽ́ ǹdǝ nǝ́myɛ ta. ⁷ Nǝ́ yě náàcɛ̀nɛ́ b'ǎ gǝ́ n'á tó á nwɛ̀nɛ̀ mɔ́ ce, á b'ǎ tó á nǝ wu-jɔ̀ w myɛ. ⁸ Da-byǎ, nǝ́ n'é yǎl b'ǎ lwar bǝ̀ nǝ́ nwɛ̀nɛ̀ dɛ̃́dɛ̃́ Azhi tǝnà y wa. Nɔ̀nɔ̀ w kɔ̀bɔ́ nǝ́ nɔ gàà mɔ́ y'à du nǝ́ jàn. ⁹ Nǝ́ y'ǎ n'é bùl bǝ̀ nǝ́ b'ǎ cì. Nǝ́ y'ǎ n'é bùl bǝ̀ bǝ̀ kɔ́ nǝ́ bùrsi bǝ̀ la nǝ́ba gu. Rǝ̀myɛ́ ce, nǝ́ y'ǎ k'é bǝ nǝ́ cìcì zhǝ̀n zhe yé. Wɔ́ Yi zhǝ̀n nǝ́ y'ǎ zhe, bǝ̀ rǝ̀ n'ê bwìrhì cùùri. ¹⁰ Wɔ́ rǝ̀myɛ́ rǝ̀ zwẽ nǝ́ba cu jɔ̃̀ w rǝ̀myɛ́ yi ní, sǝ rǝ̀ gwẽ̌ b'a zwẽ nǝ́ba. Zhǝ̀nà, nǝ́ yě náàcɛ̀nɛ́ bǝ̀ rǝ̀ gwẽ̌ b'a zwẽ nǝ́ba. ¹¹ Ámyɛ n'á sɛ̃ nǝ́ba ǹdǝ́ Yi lwǝ̌l. Èta, lyì nánzhǝzhɔ̌ Yi-co jàn yilǝ, Yi b'a wɛ̀rhɛ́ nǝ́ba cɛ̀nɛ̀, sǝ nunǝ nánzhǝzhɔ̌ b'a tó rǝ̀myɛ́ dɛnnɛ bǝ ce Yi nǝ̀bán nǝ́ yilǝ. ¹² Kɔn dɛ̀bɛ́ rǝ̀ n'ê pɛ nǝ́ba wu-nyɔ̃̀ mɔ́, wɔ́ nǝ́ n'ê pwèlè nǝ́ wun nǝ́ zǝ nǝ́ cìn lũ w wẽ́ ǹdǝ́ cɛ̀nɛ̀ ǹdǝ́ zhǝ̀n rɛ́ tɛ̀bɛ́ rǝ̀ n'ê shí Yi sono mó. Sǝ kɔn du, wɔ́ nǝ́ gǝ́ n'é wɛ̀rhɛ́ èta ǹd'ámyɛ mɔ́. Rǝ̀myɛ́ wɔ́ Yi pɛnɛ́, sǝ è dǝ̀ numbyíní surhǝ tum yé. ¹³ Nǝ́ yǝ̀ kɔn dõ kɛ̃ nǝ́ pǝ á ába ǹdǝ́ è dǝ̀ tɛ̀bɛ́ á wɔ̌ á b'ǎ kàrmǝ á sú rǝ̀ kùr náàcɛ̀nɛ̀ mɔ́ yé. ¹⁴ Èlǎsɛ̃́ á nyɛ̌ rǝ̀ kùr námpɔ́lɛ́, sǝ dɛ̃ rɛ́ tɛ̀bɛ́ Cǐnnǝ Yezu ká ń bàn mɔ́ yùwǝ̀, á wun b'a yǝ̀ nyɛ̀n ǹdǝ́ nǝ́ba, sǝ nǝ́myɛ wun b'a yǝ̀ nyɛ̀n ǹd'ámyɛ. ¹⁵ Wɔ́ à gǝ́ y'à yě rǝ̀myɛ́ pamparɛ̃ɛ̃ mɔ́ è ce à y'à n'â yǎl a jɛ̀rɛ̀ a tó á sono, mùnì ga á wun kwɛrhɛ nǝ zǝ nyɛ̀n nǝ súlí, ¹⁶ s'a zhì á sono a lyɛ̃ a vò Masɛdwanɛ; sǝ á sɛ̃ nɛ a lyɛ̃ a yí Zhide. ¹⁷ À gǝ́ byili b'à la rǝ̀myɛ́ wɔ̀rhɔ́ mɔ́, à tɛ́rɛ́ a m'a byili ri nà? Nà à gǝ gu à wẽ́ à la kɔn wɔ̀rhɔ́, à zɛ̃̀ à wò bǝ̀ ɔ̃́'ɔ̃, wɔ́ numbyíní pùbùlǝ̀ tum nà? ¹⁸ Nyǐ Yi wɔ́ à zhǝ̀n-cí. Rǝ̀ cìcì yě bǝ̀ kɔn dɛ̀bɛ́ à byili mú dǝ̀ wó à wò bǝ̀ ɔ̃̀ɔ̃̂, a j'a k'a wɔ̀ bǝ̀ ɔ̃́'ɔ̃, myɛ yé. ¹⁹ Àmyɛ́ ǹdǝ́ Shǝlaasɛ ǹdǝ́ Timote gǝ́ bwǝ̀l Yi Byǐ Yezu Kristǝ yò w nǝ́ byili ába mɔ́, , rǝ̀ yǝ̀ ɔ̃̀ɔ̃̂ yàl rǝ k'a yǝ́yɛ́lɛ́ rǝ yǝ̀ ɔ̃́'ɔ̃ yé. Ń zɔ̀mà nɛ́ yàl ɔ̃̀ɔ̃̂ twéé twéé gaga. ²⁰ Zhǝ̀nà, Yezu zɔ̀mà nɛ́ wɔ́ ɔ̃̀ɔ̃̂ twéé twéé gaga, Yi nyǝ́ né rǝ̀ bwǝl mó gakó yilǝ. Wɔ́ ńmyɛ̌ dɛnnɛ nǝ́ n'é tó né nǝ́ cèrhé Yi nǝ́ wɔ̀ bǝ̀ Amɛ̀n. ²¹ Wɔ́ Yi cìcì rǝ̀ n'ê súlí nǝ́myɛ̌ ǹd'ámyɛ̌ ga jàn Kristǝ jàn yilǝ. Wɔ́ rǝ̀myɛ́ rǝ̀ cír nǝ́ba rǝ cĩ́ nǝ́ dúdú rǝ̀ cìcì yilǝ. ²² Rǝ cĩ́ rǝ̀ myɔrhɔ nǝ́ yó, rǝ jɛ̀rɛ̀ rǝ ce rǝ̀ Eshirhǝ y nǝ́ wun ní wẽ́, rǝ m'e byili bǝ̀ rǝ̀ b'a pǝ nǝ́ba kɔn dɛ̀bɛ́ gakó rǝ̀ bwǝl nǝ́ba rǝ̀ nyí mú. ²³ Zhǝ̀n zhǝ̀nà, Yi wɔ́ à zhǝ̀n-cí. À gǝ gòm kɔma, s'a cì! Wɔ́ à gǝ́ t'â yǎl a zhìlì á wun ni mú è ce, à k'â yǝ̀ kwɛ̃̀ a bǝ̀ Kɔrɛ̃tɛ yé. ²⁴ Á zhí Yi ni kẽkẽ, nǝ́ zɛ̃̀ nǝ́ n'é yǎl nǝ́ mù dwã nɛ ǹd'ába nǝ́ pyà á wu-nyɔ̃̀, s'e dǝ̀ yál nǝ́ n'é yǎl nǝ́ byili ába á Yi-ni-zhú gǝ́ mǝ̌ sǝ mǝ yǝ̀ nɛ́ yé.