koussoube-marc-lee_1jn_text

Kǝ̀kàl-fwɛ̀lɛ̀ 1

¹ Wɔ́ zɔ̀mɛ̀ rɛ́ rǝ̀ n'ê pɛ nyǔ mú yil nǝ́ r'é kɛ̃ sɛ́bɛ́ rɛ́ tɛ̀bɛ́ nǝ́ la ába pɔ. Zɔ̀mɛ̀ rɛ́ rǝ̀myɛ́ jɛ̀nɛ̀ rǝ̀ ŋwɛ́nɛ́ ǹdǝ́ kaka y'à gwẽ̌ tɛ̀nɛ́ yé. Rǝ̀ zɔ̀m nǝ́ nyɛ̀ɛ̀; nǝ́ cìcì nǝ rɛ ǹdǝ́ nǝ́ yírhǝ́; nǝ́ nyǐ ri náàcɛ̀nɛ́; nǝ́ zǝ nǝ́ jɛ̀rh nǝ́ dwǝ̀rh rè. ² Mɔ̀bɔ́ ń wɔ́ nyǔ mú mú byili ń cìnǝ̀. Nǝ́ nǝ mɔ, nǝ́ zɛ̃̀ nǝ́ r'é byili zhǝ̀n ńmyɛ̌ mɔ̀bɔ́ ń wɔ́ nyǔ mǝ̀ t'â la zhɔ̌ mɔ́ shò-kwã nɛ́. Ń yà ń ŋwɛ́nɛ́ ń Da mɔ́ sõ, sǝ ń byili nǝ́ba ń cìnǝ̀, nǝ́ zɛ̃̀ nǝ́ r'é bwǝ̀l ń yò w nǝ́ byili ába. ³ Tɛ̀bɛ́ nǝ́ nyɛ̀ɛ̀ nǝ́ j'ǎ nǝ ǹdǝ́ nǝ́ yírhǝ́ mó, wɔ́ rǝ̀myɛ́ nǝ́ r'é byili ámyɛ nɛ, mùnì ga nǝ́myɛ̌ ǹd'ámyɛ̌ ga mù dwã nɛ nǝ́ yǝ̀ wu òdù, bǝ̀ nǝ́myɛ̌ ǹdǝ́ nǝ́ Da Yi ǹdǝ́ rǝ̀ Byǐ Yezu Kristǝ mù dwã nɛ nǝ́ wɔ́ wu òdù. ⁴ Nǝ́ r'é kɛ̃ sɛ́bɛ́ rɛ́ tɛ̀bɛ́ nǝ́ pɛ ába mùnì nǝ́myɛ̌ ǹd'ámyɛ̌ ga wu-nyɔ̃̀ w yǝ̀ námpúm. ⁵ Nǝ́ nyɛ̀ɛ̀ Yezu Kristǝ nyú w bǝ̀ Yi wɔ́ pwẽ̀, cǝ-byṹ námpɔ́lɛ́ myɛ yǝ̀ rǝ̀ gùlí yé. Wɔ́ rǝ̀myɛ́ nǝ́ zɛ̃̀ nǝ́ r'é bwǝ̀l nǝ́ byili ába. ⁶ Nǝ́ gǝ n'é wǝ̀l bǝ̀ nǝ́myɛ̌ ǹdǝ́ nǝ́ Da mɔ́ jǐrh wu òdù, nǝ́ j'ǎ k'á ŋwɛ́nɛ́ cǝ-byín wẽ́, wɔ́ kɔma nǝ́ r'é gòmǝ̀, nǝ́ tɛ̀nɛ́ zhǝ̀n sɔ́má yó yé. ⁷ Sǝ nǝ́ gǝ ŋwɛ́nɛ́ pwẽ̀ wǝ̀, ǹdǝ Yi cìcì gǝ́ ŋwɛ́nɛ́ pwẽ̀ w ta, sǝ́ nyǐ nǝ́ wɔ́ wu òdù, sǝ rǝ̀ Byǐ Yezu jal mɔ́ n'ê vùr nǝ́ yǝ̀-bǝlwàálɛ́ gakó nǝ́ jǐrh wárhgáá. ⁸ Nǝ́ gǝ n'é wǝ̀l bǝ̀ nǝ́ bǝ yǝ̀-bǝlwàálɛ zhe, wɔ́ nǝ́ cìn nǝ́ r'é jǝ́jɛ̀rɛ́; zhǝ̀n tɛ̀nɛ́ nǝ́ wẽ́ yé. ⁹ Yi wɔ́ zhǝ̀n ǹdǝ́ cángá cǝ́bal. Rǝ̀myɛ́ ce, nǝ́ gǝ n'é byili ri nǝ́ dwǝ́ǝ́ré, rǝ̀ b'a pǝ nǝ́ba rǝ̀ gakó sǔbri, sǝ rǝ̀ b'a vùr lwɛlɛ tɛ̀bɛ́ rǝ̀ ŋwɛ́nɛ́ nǝ́ wẽ́ mó gakó nǝ́ jǐrh wárhgáá. ¹⁰ Nǝ́ gǝ n'é wǝ̀l bǝ̀ nǝ́ yǝ̀ yǝ̀-bǝlwàálɛ wɛ̀rhɛ́, nǝ́ r'é zǝ Yi nǝ́ yàl kɔma cǝ́bal; rǝ̀ zɔ̀mɛ̀ rɛ́ tɛ̀nɛ́ nǝ́ wẽ́ yé.