koussoube-marc-lee_1ch_text

Kǝ̀kàl-fwɛ̀lɛ̀ 15

¹ Dəvyidi lù jìrh Dəvyidi Pyə̀-cɔ w w ń cìcì yilə; n tɛnɛ jàà n zɛ̃̀ n pú kòrhó né, Yi kùlkṍ w yilə. ² N zɛ̃̀ n wɔ̀: «Levyi dwí rí lyì bí dúdú bə̀ mə̌ sə bə kwè Yi kùlkṍ wə́, wɔ́ bə̀myɛ́ Cinu Yi cír bə̀ la n'ê zhĩ wə, sə bə súlí bə̀ n'ê nyǐ ò yò gaga yilə.» ³ Dəvyidi ce bə cĩ́ Esərayɛl lyì byǎ bɛ́ gakó dwã yó Zhərəzalɛm nɛ́ mùnì ga bə kwè Cinu kùlkṍ w bə m'e vò jàà y kɛ̀bɛ́ ń yà ń tɛnɛ ò yil mú wə. ⁴ N cĩ́ Aarɔ̃ byǎ bɛ́ ǹdə́ Levyi dwí rí lyì bí myɛ dwã yó: ⁵ Kəyaatɛ byǎ bɛ́ wẽ́, è yàl: bə̀ yó-cə́bal Urəyəə ǹdə́ ń da-byǎ bɛ́, nunə 120; ⁶ Mərəri byǎ bɛ́ wẽ́, è yàl: bə̀ yó-cə́bal Asaya ǹdə́ ń da-byǎ bɛ́, nunə 220; ⁷ Gɛrəshɔn byǎ bɛ́ wẽ́, è yàl: bə̀ yó-cə́bal Yɔwɛl ǹdə́ ń da-byǎ bɛ́, nunə 130; ⁸ Eləsafã byǎ bɛ́ wẽ́, è yàl: bə̀ yó-cə́bal Shəmaya ǹdə́ ń da-byǎ bɛ́, nunə ⁹ 200;9 Ebərɔ̃ byǎ bɛ́ wẽ́ è yàl: bə̀ yó-cə́bal Elyɛl ǹdə́ ń da-byǎ bɛ́, nunə 80; ¹⁰ Uzhəə byǎ bɛ́ wẽ́, è yàl: bə̀ yó-cə́bal Amyənadaabɛ ǹdə́ ń da-byǎ bɛ́, nunə 112. ¹¹ Dəvyidi byẽ̀ vwĩ̀-zwə́lnə* Sadɔɔkɛ ǹdə́ Abyataarɛ e súlí Levyi dwí rí lyì bí: Urəyəə ǹdə́ Asaya ǹdə́ Zuwəə ǹdə́ Shəmaya ǹdə́ Elyɛl ǹdə́ Amyənadaabɛ. ¹² N zɛ̃̀ n wɔ̀ bɛ: «Á wɔ́ Levyi dwí rí lyì bí yó-cìnə́. Tɛnɛ-na á cìn Cinu yilə, ámyɛ̌ ǹdə́ á da-byǎ bɛ́, sə á kwè Cinu, Esərayɛl Yi rí kùlkṍ wə́, á vò á cĩ́ jàà y kɛ̀bɛ́ à tɛnɛ ò yil mú wə. ¹³ Twər nã́yéé ré á gə́ y'ǎ tɛ̀nɛ́ nɛ́ mɔ́ ce, Cinu nə́ Yi rí pɔ nə́ba còrhò-tum mə tó ǹdə́ cu, bə̀ nə́ yə̀ kùlkṍ w kwè ǹdə nyə́ né gə́ n'ê byili ní yé.» ¹⁴ Rə̀myɛ́ yó, Vwĩ̀-zwə́lnə bé ǹdə́ Levyi dwí rí lyì bí zɛ̃̀ bə tɛnɛ bə̀ cìn Cinu yilə, bə̀ la m'e vò bə kwè Cinu Yi, Esərayɛl Yi rí kùlkṍ wə́. ¹⁵ Levyi dwí rí lyì bí zə cǎbrɛ nándə̀dwààlɛ̀ rə̀lyè bə m'e zhĩ Yi kùlkṍ w bə̀ pyə́pyɛla wa, ǹdə Cinu nyí rí tɛ̀bɛ́ Muyiisi yà ń pɔ rə tó Cinu zɔ̀mɛ̀ rɛ́ nɛ mɔ́. ¹⁶ Dəvyidi zɛ̃̀ n wɔ̀ Levyi dwí rí yó-cìnə́ bé ne bə̀ bə̀ cír bə̀ da-byǎ bɛ́ bə yə̀ núnnə ǹdə́ bə̀ dɛ̀lɛ̀ wẽ̀, lǔtibá ǹdə́ lyííribá* e súlí sɛmbálɛbá* bə̀ la bə dú ri ǹdə́ bə̀ jàn gakó bə m'e byili bə̀ wu-nyɔ̃̀ fùwə́ yə́. ¹⁷ Levyi dwí rí lyì bí cír Zuwəə byǐ Emã ǹdə́ ń da-byǐ Bərəca byǐ Asaafɛ; bə̀ da-byǎ Mərəri byǎ bɛ́ wẽ́ bə̀ cír, Kəshaya byǐ Etã; ¹⁸ e súlí bə̀ da-byǎ bɛ́ bə̀ y'à pú bi mú: Zakarɛ ǹdə́ Bɛn ǹdə́ Yazhɛl ǹdə́ Shəməramɔɔtɛ ǹdə́ Yəyəə ǹdə́ Unni ǹdə́ Eləyaabɛ ǹdə́ Bənaya ǹdə́ Maasəya ǹdə́ Matəca ǹdə́ Eləfələwu ǹdə́ Myəkənəya ǹdə́ Obɛɛdɛ-Edɔm e súlí Yəyəə. ¹⁹ Núnnə bé wẽ́, è yàl: Emã ǹdə́ Asaafɛ e súlí Etã, bə̀ y'à n'ê dwí kàmmɔ sɛmbálɛbá nyɛ̀bɛ́ nə̀ zhe cəl; ²⁰ Zakarɛ ǹdə́ Azhɛl ǹdə́ Shəməramɔɔtɛ ǹdə́ Yəyəə ǹdə́ Unni ǹdə́ Eləyaabɛ ǹdə́ Maasəya e súlí Bənaya y'à n'ê ji nwísí ǹdə́ árəpəbá; ²¹ Matəca ǹdə́ Eləfələwu ǹdə́ Myəkənəya ǹdə́ Obɛɛdɛ-Edɔm ǹdə́ Yəyəə e súlí Azazha y'à n'ê kwɛ̃́ ǹdə́ lyííribá. ²² E súlí Kənanya, Levyi dwí rí lyì bí byɛ̀bɛ́ bə̀ y'à n'ê zhĩ kùlkṍ w mó yó-cə́bal mɔ́, yà ń nə́ ń nyǐ kùlkṍ w zhũ mú yò, bə̀ ń yà ń zhe rə̀ yàlà. ²³ Bərəca ǹdə́ Eləkana y'à wɔ́ kùlkṍ w dɛ̀nna. ²⁴ Vwĩ̀-zwə́lnə Shəbanya ǹdə́ Yɔshafaatɛ ǹdə́ Nətanəyəə ǹdə́ Aməsəyi ǹdə́ Zakarɛ ǹdə́ Bənaya e súlí Elyəzɛɛrɛ y'à wɔ Yi kùlkṍ w yé né bə̀ n'ê wúl pɔ́lsɛ. Obɛɛdɛ-Edɔm ǹdə́ Yəyəya y'à wɔ́ kùlkṍ w dɛ̀nna. ²⁵ Rə̀myɛ́ kwã nɛ́, Dəvyidi ǹdə́ Esərayɛl náncɛsɛ́, e súlí nunə mɔ̀rhɔ̀ mɔ̀rhɔ̀ yó-cìnə́ bé du bə̀ la vò bə kwè Cinu Yi dɔbrɛ kùlkṍ w Obɛɛdɛ-Edɔm sõ kɛ̀lɛ́ wa, ǹdə́ wu-nyɔ̃̀. ²⁶ Bə zə nə̀-byərh shàlpyɛ̀ ǹdə́ pyì-byərh shàlpyɛ̀ bə m'e zwə́l vwĩ̀ bə pə mùnì ga Yi sɛ̃ Levyi dwí rí lyì bí bə̀ y'à la dɔbrɛ kùlkṍ w zhũ mú ni. ²⁷ Dəvyidi yà ń zù lɛ̃̌ kàmə̀zù-fwɛ̀lɛ̀, ńmyɛ̌ ǹdə́ Levyi dwí rí lyì bí byɛ̀bɛ́ gakó bə̀ y'à n'ê zhĩ kùlkṍ w mó, ǹdə́ núnnə bé e súlí Kənanya ń yà ń nə́ ń nyǐ kùlkṍ w zhũ mú yò mó ga. Dəvyidi yà ń súlí n zù vwĩ̀-zwə́lnə kàmə̀zwǐ è sɔ̃̀ ǹdə́ lɛ̃̌. ²⁸ Esərayɛl lyì byǎ bɛ́ gakó kwè Cinu Yi dɔbrɛ kùlkṍ w bə̀ m'ê bàn Zhərəzalɛm ǹdə́ bə̀ n'ê jəjɛ, bə̀ n'ê wúl pyì-byərh nyu pɔ́lsɛ ǹdə́ pɔ́lsɛ, bə̀ n'ê dwí sɛmbálɛbá ǹdə́ lǔtibá e súlí lyííribá. ²⁹ Cinu Yi kùlkṍ w gə́ yú Dəvyidi Pyə̀-cɔ w yi ní, Səyuuli bə̀kɔ́ Myəkal tó cə̀-zhɛ̃̌ rɛ́ n gwɛ̃ n nyǐ pwẽ̀ ne. N nə pyɔ̌ Dəvyidi ń nə́ ń fwɛ̃́ n jà ń nə́ ń sɛ, n fulsi mu ń wẽ́.