¹ Tiiri pyɔ̌ Yəram twĩ̀ lyì Dəvyidi sõ ǹdə́ sɛ́ɛ́dərɛbá dǎr ǹdə́ nə́kul-sə̀lnə ǹdə́ də̀-sə̀lnə bə̀ la lù jì bə pɔ̃. ² Rə̀myɛ́ yó, Dəvyidi lwar bə̀ Cinu Yi yà ń cír mu ń la n yə̀ Esərayɛl pyɔ̌, sə ń pyɛ̀lɛ̀ rɛ́ còrhó w y'à já dɛ̃́dɛ̃́ Esərayɛl Yi dwí rí yilə. ³ Dəvyidi jú kana dwã Zhərəzalɛm nɛ́, sə ń súlí n lù bala-byǎ ǹdə́ kana-byǎ dwã. ⁴ Nyǐ byɛ̀bɛ́ ń lùl Zhərəzalɛm nɛ́ mɔ́ yilə né: Shãməwa ǹdə́ Shɔbaabɛ ǹdə́ Natã ǹdə́ Saləmɔ, ⁵ ǹdə́ Yəbaarɛ ǹdə́ Elyəshəwa ǹdə́ Eləpəlɛɛtɛ ⁶ ǹdə́ Nɔga ǹdə́ Nəfɛɛgɛ ǹdə́ Yafəya ⁷ ǹdə́ Eləshama ǹdə́ Bəəlyada e súlí Elyəfɛlɛɛtɛ. ⁸ Shilisəti lyì bí nyɛ̀ɛ̀ bə̀ bə̀ tútǔ Dəvyidi ǹdə́ pyɛ̀lɛ̀ nwə̃̌ n jǐrh Esərayɛl púlə́púlə́ pyɔ̌. Rə̀myɛ́ ce, bə̀ gakó j'a zɛ̃̀ bə̀ n'ê pyà mɔ bə̀ la zal. Dəvyidi nyɛ̀ɛ̀ rɛ, ń zɛ̃̀ n du ń la n vò n jəl be. ⁹ Shilisəti lyì bí bə̀ bə yí bə bú bə zwẽ Erəfəyitəbá vɔlɔ wá. ¹⁰ Dəvyidi zɛ̃̀ n bwə̀rh Yi n wɔ̀: «À mə̌ s'a vò a bú ǹdə́ Shilisəti lyì bí? Ǹ m'ǎ ce be à jɔ̃̀ wa?» Cinu Yi lyár mɔ n wɔ̀: «Zhəl, à m'a ce be ǹ jɔ̃̀ wa.» ¹¹ Rə̀myɛ́ yó, Shilisəti lyì bí zhə̀l bə yí Baal-Pərəsim, sə Dəvyidi ŋwɛ̀nɛ́ bɛ gàà. N zɛ̃̀ n wɔ̀: «Cinu tó à dɛnnɛ n pul bɔ̀l à zwə̀ bé cəcəl w ǹdə nɛ̃̌ gə́ y'a kǎr byìbyílú ní!» Wɔ́ rə̀myɛ́ è ce, bə̀ co jàà y èmyɛ́ mɔ́ yil bə̀ Baal-Pərəsima». ¹² Shilisəti lyì bí dùr bə yẽ̌ bə̀ yə né ne gàà; sə Dəvyidi pɔ nyí n wɔ̀: «bə̀ ji ni myǐn». ¹³ Rə̀myɛ́ kwã nɛ́, Shilisəti lyì bí k'e bà, bə̀ la bú bə zwẽ Erəfəyitəbá vɔlɔ wá. ¹⁴ Dəvyidi zɛ̃̀ n kə́ n bwə̀rh Yi, sə Yi wə̀l mo: «Bə̀k'á tó bə̀ kwã nɛ́ ń mə́ bú ǹdə́ bɛ yé: byə́byɛ́lɛ́ bɛ ń tó kwã nɛ́, ń ce cèmé né ǹ yé né, ń zɛ̃̀ ń vò ń bə̀ bə̀ səta. ¹⁵ Sə ǹ gə tú ǹ nyɛ̀ɛ̀ nə̀rh dweme cèmé né yə́-pɛ̀lɛ́ wa, sə́ j'á du n ji búlə́ né kùrə̀, bə̀ wɔ́ Yi rə̀ du rə̀ wɔ ǹ yé né rə̀ la bú rə ŋwɛ̀nɛ́ Shilisəti lyì bí shə̀dɛ́ɛ́sɛ́.» ¹⁶ Sə Dəvyidi wɛ̀rhɛ́ ǹdə Yi gə́ y'à pɔ mɔ nyí ní, bə j'a ŋwɛ̀nɛ́ Shilisəti lyì bí shə̀dɛ́ɛ́sɛ́ kɔn zhì Gəba e m'e yí Gəzɛɛrɛ. ¹⁷ Dəvyidi yil ré j'a zɛ̃̀ rə du tənèsé gakó wẽ́, Cinu Yi ce Dəvyidi ywẽ zə dwə́ né gakó.