¹ Bũn man, a ĩ man le Donbeeni tonkaroɓa numa naa a ɓa dĩn ho dĩmiɲa sãa mi bia naa yi a ho ho pĩnpiro hen na ɓa dĩnka yi, a ha yi va ho ta, le mu ɲun-beera, le hã vĩntĩɛ wan. ² A ĩ bĩniɛ le ĩ lon, a ĩ man le Donbeeni tonkaro bĩni a a lo le le wii hɛɛnii. Le dii na le Donbeeni, dii le le mukɛ̃ni manso, a lee be le ũ fĩimini a a ɓuan. A a bii biikɛ pãnpãn le le Donbeeni tonkaroɓa numa nan mu, biɛ le nan ho panka yi a ɓa yaaraa ho ta le mu ɲunbeera: ³ «Ho ta le mu ɲunbeera le hã vĩntĩɛ a mi dĩn yi yaaka wa yi bo le fĩimini wɛ̃n Donbeeni tontaɓa ɓuraa wan yi vo». ⁴ A biɛ le fĩimini mu bo wan a ɓa zeeniɛ ɲii naa mi. Ɓa ɓuenɓuen wo niviɛ muaasie ɓuara heɲun naa muaasie naa. Ɓa le a *Isirayɛɛle nipomu zĩɲuna ɓuenɓuen ɲii. ⁵ A *Zudaa zĩɲuhũ niviɛ na le fĩimini mu bo wan lee muaasie piru ɲun. A a Urubɛ̃n, le a Kaade, ⁶ le a Azɛɛre, le a Nɛfutalii, le a Manasie zĩɲuhũ niviɛ lee muaasie piru ɲun, ⁷ le a Simiɔn, le a Levii, le a Izakaare zĩɲuhũ niviɛ lee muaasie piru ɲun, ⁸ a Zabulon zĩɲuhũ niviɛ lee muaasie piru ɲun, a Zozɛɛfu zĩɲuhũ niviɛ lee muaasie piru ɲun, a Bɛ̃nzamɛɛ zĩɲuhũ niviɛ lee muaasie piru ɲun, ban ɓuenɓuen a le fĩimini mu bo wan. ⁹ Bũn man, a ĩ le ĩ lon, a lee minka zãamakuii na. Ɓa ɲii yi da man zũn. Ɓa lo ho dĩmiɲa kãna niviɛ le ũ siiɓa ɓuenɓuen yi, hari ɓa we laho lee laho, hari ɓa bii biini le biini. Ĩ man ɓa a ɓa dĩn mu bazamu kanɓoni yaho, le a Piiza yaho. Ɓa zã hã tĩpoa, a ɓuanka hã ƙuoho vɔ̃nna a zeeni le mi tĩɛ wan. ¹⁰ Biikɛ lebii ɓa lee bii pãnpãn : «Wɛ̃n Donbeeni na kãna mu bazamu kanɓoni wan le a Piiza, le ban kãniɛ wiɛ». ¹¹ A le waani tonkaroɓa ɓuenɓuen dĩn kĩnia ɓa nikĩɛ ɓoni naa numa nan , le ɓa baa baa naa na dĩn kiiriɛ mu bazamu kanɓoni yi a lii ɓura le yaho, a lee ɓuaani le Donbeeni ¹² ka ɓa a bio: «*Amin na! Mu bozũnlole ho danlo le ho panka a bio sã wɛ̃n Donbeeni yi. Le ko le le kanbiĩ le ho cuku. Wa ko wa ƙooni le a de le baraka fuuu hã loliɓa na ɲii miɛ yi. *Amin na!» ¹³ A ɓa nikĩɛ nikeni wãa tuara min: «Ɓa tĩpoa manso wa mu a fo zũ ni? Ɓa lee le wen?» ¹⁴ A ĩ bii nan a yi: «Wan miɛ, ũnɛ le fo zũ ɓa». A a ni-kĩnle mu bĩniɛ bii : « biɛ ka le biɛ kãa le lonbebebeeni yi. Ɓa siɛra mi tĩzĩnia a Piiza cɛ̃ni yi a hã lee ce pũiapũia. ¹⁵ Lebũn te bii ɓa dĩnnaa le Donbeeni bazamu kanɓoni yaho. Ɓa lee sa na le Donbeeni yi le wisoni le ũ tĩnaahũ fuuu le zĩbeeni na bio sã le yi yi. A le Donbeeni, dii kara mu bazamu kanɓoni wan a a kɛn naa ba, a a pa ɓa bio. ¹⁶ Hĩni naa ɲuhãni man bĩni man dan ɓa. Wii man bĩni man ɲi ɓa, a wunwuro mun man bĩni man bee ɓa lo. ¹⁷ Lebii a a Piiza na wi mu bazamu kanɓoni tĩni yi a a pa ɓa bio naa biɛ a a pipa lee we paraa ũ piiɓa buo. A we e di ɓa yaho a varaa le ɲundɛ̃ni yi, dii lee ni le mukɛ̃ni binbiri, a le Donbeeni a a niɛka ɓa yiicaa ɓuenɓuen».